Пад Віцебскам выставілі на аўкцыён аб’ект незавершанага будаўніцтва завода па вытворчасці паліўных драўняных гранул. Да паўнавартаснага прадпрыемства гэта будоўля пакуль далёкая: на ўчастку плошчай 13 га будаўніцтва знаходзіцца толькі на пачатковай стадыі. Але за аб’ект хочуць атрымаць амаль 10,6 мільёна рублёў, піша Office Life.
Уладальнікам аб’екта з’яўляецца ТАА «Акітама». Кампанію зарэгістравалі ў СЭЗ «Віцебск» у 2019 годзе. Яна планавала інвеставаць у будаўніцтва завода па выпуску паліўных гранул 14 мільёнаў еўра.
75% кампаніі належала замежным інвестарам з «недружалюбных» дзяржаў: 50% — літоўскай кампаніі «Майтрэя», яшчэ 25% — брытанскай «Аак Прайм Інвестментс С.А.».
У канцы 2024 года Эканамічны суд Віцебскай вобласці накіраваў «Акітаму» ў санацыю тэрмінам на тры гады. На той момант запазычанасць кампаніі перавышала 44 мільёны рублёў, прычым амаль палову яе актываў складала дэбіторская запазычанасць.
Падчас пазапланавай праверкі, якая праходзіла ў 2024—2025 гадах, у кампаніі знайшлі недаплату падаткаў, збораў і іншых абавязковых плацяжоў на суму больш за 21 тысяч рублёў.
Кантралёры таксама выявілі выпадкі продажу кампаніяй аўтамабіляў фізічным асобам, у тым ліку сваім супрацоўнікам, па рэшткавым кошце. Пасля некаторыя з гэтых аўтамабіляў перапрадаваліся ўжо ў дзясяткі разоў даражэй.
Цяпер на аўкцыён выставілі менавіта той праект, дзеля якога кампанія і пачынала сваю дзейнасць. Будаўніцтва, аднак, прасунулася нязначна: на тэрыторыі падрыхтавалі пляцоўку, праклалі грунтавую дарогу, правялі сеткі водазабеспячэння і водаадвядзення, а таксама электрычнасць.
Аўкцыён прызначаны на 28 верасня. Тэрмін санацыі ТАА «Акітама» заканчваецца 12 снежня 2027 года.
Цяпер чытаюць
З псіхбальніцы збег былы начальнік Ганцавіцкай міліцыі14
Каментары