Мэр Мінска патлумачыў, чаму дрэвы на праспекце Незалежнасці замянілі на расліны ў кадках
Паводле яго слоў, прычынай гібелі дрэў стаў перагрэў каранёвай сістэмы.
Старшыня Мінгарвыканкама Уладзімір Кухараў распавёў у эфіры тэлеканала СТБ, чаму дрэвы, якія некалькі гадоў раслі ў грунце на праспекце Незалежнасці, давялося замяніць раслінамі ў спецыяльных кадках, піша Mlyn.by.
Паводле яго слоў, прычынай гібелі дрэў стаў перагрэў каранёвай сістэмы. На гэтым участку праспекта пад зямлёй праходзяць камунікацыі цеплазабеспячэння, прычым трубы размешчаныя адносна неглыбока.
«Яны ўжо раслі некалькі гадоў, усё ішло нармальна, але ёсць асаблівасць: на праспекце Незалежнасці на гэтым адрэзку пракладзены камунікацыі, гэта значыць цеплазабеспячэнне, трубы знаходзяцца неглыбока пад зямлёй», — растлумачыў Кухарэў.
Як адзначыў мэр, асабліва сур'ёзнай праблема стала пасля зімы з працяглымі маразамі.
Каб падтрымліваць неабходную тэмпературу ў дамах, камунальным службам даводзілася забяспечваць высокую тэмпературу цепланосьбіта.
«І вось гэтая зіма, калі сапраўды на працягу двух месяцаў былі маразы, патрабавала падтрымліваць высокую тэмпературу цепланосьбіта, каб забяспечыць ацяпленне ў дамах. Гэта прывяло да таго, што адбылося пераграванне каранёвай сістэмы гэтых дрэў, і яны загінулі», — распавёў Кухараў.
Гаворка ідзе пра вязы і ясені, якія спецыяльна падбіралі спецыялісты Нацыянальнай акадэміі навук Беларусі і адаптавалі да ўмоў гарадскога асяроддзя.
Пасля таго як расліны пачалі гінуць, спецыялісты паспрабавалі іх аднавіць. Для гэтага выкарыстоўвалі падкормку і іншыя метады рэанімацыі, а да працы прыцягнулі спецыялістаў Батанічнага саду і профільных навуковых устаноў. Аднак выратаваць дрэвы не ўдалося.
Пасля гэтага гарадскія ўлады прыйшлі да высновы, што паўторная высадка дрэў непасрэдна ў зямлю можа праз некалькі гадоў прывесці да той жа праблемы.
Карані новых раслін з часам зноў дасягнулі б камунікацый, размешчаных пад праспектам, пасля чаго дрэвы маглі б загінуць.
«Але, бачачы гэтую сітуацыю і разумеючы, што і далей, калі высадзіць дрэвы, праз 4—5 гадоў каранёвая сістэма зноў падыдзе да камунікацый, мы прынялі ўзважанае рашэнне, што гэта будзе няправільна. Было прынята рашэнне высаджваць дрэвы ўжо менавіта ў кадках. Яны будуць расці, і іх каранёвая сістэма дазволіць ім знаходзіцца там 15 гадоў і больш», — патлумачыў Кухараў.
Пры гэтым сам ён удакладніў, што ўстаноўленых кадкаў павінна хапіць прыкладна на дзесяць гадоў.
Цяпер чытаюць
Гэтая беларуская інстазорка дайшла да Playboy — але, у адрозненне ад многіх, не спынілася5
Каментары
Пра магчымы негатыўны ўплыў цеплатрас я казаў раней (тут спрачаліся).
Насамрэч, некалькі прычын маглі ў комплексе дабіць дрэвы: паменшаная прастора для каранёў пад зямлёй з-за шчыльных камунікацый, пашкоджанні іх пры будаўніцтве метро і перакладцы камунікацый, шкодны цеплавы рэжым зімой, паменшаная прастора газонаў зверху з-за вялікіх палёў пліткі, і паверх усяго гэтага яшчэ і слой солі зімою.
Правільным рашэннем было б своечасова ахоўваць зялёны калідор з дрэў, газонаў і кустоўя як асобны аб’ект, не адносіцца да іх як да апошняга, што павінна выжыць, калі здолее. А кадкі ўжо вынік. Калі думаць стратэгічна, не позна яшчэ прыняць такія ахоўныя нормы для іншых тэрыторый.