Ікра і пеністае — без абмежаванняў. Што даюць у мінскім гатэлі на сняданак за 150 рублёў ФОТА
Прыходзіць у рэстаран могуць не толькі пастаяльцы гатэля.
Сняданак за 150 рублёў прапануюць у рэстаране Zolo пры гатэлі Waldorf Astoria, які нядаўна адкрыўся на беразе Свіслачы каля Вялікага тэатра. Наведваць рэстаран могуць не толькі пастаяльцы, піша Onlíner.
У будні сняданак падаюць з 6:30 да 10:30, у выхадныя — да 11:00. А дзявятай раніцы ў будны дзень зала была амаль пустая, але бліжэй да заканчэння сняданку наведнікаў стала больш.
Пры ўваходзе гасцям прапануюць безалкагольны «вітамінны шот» з рабіны, яблыка, малочнага ўлуну і інжыру. Далей — выпечка, тарты, запяканка, садавіна, пяць відаў ёгурту, тварог. Ёсць асобны стол з прадуктамі без глютэну і дзіцячая зона з пюрэ, сокамі, хлябцамі, садавіной і глазураванымі сыркамі.
Найбольш прыкметная пазіцыя — чырвоная ікра ў вялікай ікорніцы. Браць яе можна без абмежаванняў, аднак, паводле назіранняў журналіста, ажыятажу каля ікры не было: госці клалі да бліноў па адной лыжцы.
Чорнай ікры на шведскім стале няма. Яе можна замовіць асобна: 30 грамаў ікры бялугі з міні-блінамі каштуюць 210 рублёў.
З рыбы ёсць ласось, селядзец, палтус і вугор. Таксама прапануюць сыр з цвіллю, марынаваныя грыбы і некалькі відаў расліннага малака, у тым ліку бананавае і фісташкавае.
Гарачыя стравы больш звыклыя: скрэмбл, бекон, сасіскі, сырнікі, варэнікі з бульбай і дранікі, якія назвалі хэшбраўнамі. Яечныя стравы гатуюць на замову. У агульны кошт за 150 рублёў уваходзіць, напрыклад, «мінскі бенедыкт» з ласосем, шпінатам, чырвонай ікрой і галандскім соусам. Асобна ў меню ён каштуе 45 рублёў.
Без даплаты можна заказваць каву, свежавыціснутыя апельсінавы, грэйпфрутавы і змешаны сокі, а таксама крэман — французскае пеністае віно. Колькасць келіхаў не абмяжоўваецца, ёсць і безалкагольны варыянт.
Калі заказваць сняданак не ў фармаце шведскага стала, французскі тост каштуе 30 рублёў, сырнікі — 25, дранікі — 40, капучына — 15, а шклянка свежавыціснутага апельсінавага соку — 30 рублёў.
Самы танны нумар у гатэлі каштуе ад 1400 рублёў за ноч.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж14
Каментары