У Расіі экс-міністра родам з Беларусі асудзілі паўторна — яму сядзець яшчэ 14 гадоў
Першы прысуд Міхаілу Абызаву вынеслі ў снежні 2023 года.
Таганскі суд Масквы вынес другі прысуд былому міністру па пытаннях Адкрытага ўрада Міхаілу Абызаву. На гэты раз яго прызналі вінаватым па справе аб махлярстве з інвестыцыямі Расійскай венчурнай кампаніі (РВК), піша Moskvichmag.
Паводле версіі следства, у 2016 годзе Абызаў арганізаваў крадзеж 5 млн даляраў, якія дзяржаўная РВК інвеставала ў амерыканскую кампанію Alion Energy, што займалася сонечнай энергетыкай. Грошы прызначаліся для развіцця перспектыўных тэхналогій, аднак, паводле версіі абвінавачання, былі выведзеныя праз падкантрольныя структуры і прысвоеныя.
Абызаў не прызнаў сваю віну. Ён сцвярджаў, што сам укладаў сродкі ў Alion Energy і страціў грошы разам з іншымі інвестарамі. Бок абароны настойваў, што няўдалая венчурная інвестыцыя не раўназначная махлярству.
З улікам папярэдняга прысуду канчатковы тэрмін склаў 14 гадоў калоніі. Таксама яму прызначылі дадатковы штраф больш за 80 млн расійскіх рублёў (каля мільёна даляраў). Пракуратура прасіла прызначыць экс-міністру восем гадоў пазбаўлення волі па новай справе, а па сукупнасці з папярэднім прысудам — 15 гадоў калоніі строгага рэжыму і штраф 90 млн рублёў.
Першы прысуд Абызаву вынеслі ў снежні 2023 года. Праабражэнскі суд Масквы прызначыў яму 12 гадоў калоніі строгага рэжыму і штраф у памеры 80 млн рублёў за стварэнне злачыннай супольнасці, махлярства і іншыя злачынствы.
Суд вызначыў, што Абызаў і ягоныя саўдзельнікі ў 2011—2014 гадах скралі каля 4 млрд рублёў у буйных навасібірскіх энергетычных кампаній «Сібэка» і «Рэгіянальныя электрычныя сеткі». Для гэтага, згодна з прысудам, выкарыстоўваліся фіктыўныя здзелкі па набыцці акцый праз кіпрскую кампанію па завышаных цэнах.
Былога міністра таксама прызналі вінаватым у незаконным удзеле ў прадпрымальніцкай дзейнасці.
Міхаіл Абызаў нарадзіўся ў Мінску ў 1972 годзе, вучыўся там у школе пасля чаго перабраўся ў Маскву. Абызава арыштавалі вясной 2019 года па абвінавачанні ў крадзяжы і вывадзе за мяжу чатырох мільярдаў расійскіх рублёў. У 2023 годзе яго прысудзілі да 12 гадоў калоніі і штрафу 80 млн расійскіх рублёў (каля мільёна даляраў).
Цяпер чытаюць
Суддзі, якія плакалі, суддзі, якія атрымлівалі асалоду, і суддзі, якія прыніжаліся перад міліцыяй3
Каментары
Любімая схема: узяць крэдыт ці дамову па пастаўцы чаго-небудзь а потым, калі не выгарыць прыдбаць заклад і з ім пайсці ў наступную здзелку. Пагарэў, калі пытаўся гэтак развезці больш зубастых гангстараў з Альфа-груп. Тыя пайшлі адразу да Пуціна.
Дарэчы, а як ён стаў багатым? У 1995 годзе паставіў у Сібір пад залог акцый паліва з Мазырскага НПЗ... За паліва не расплаціліся, ён атрымаў акцыі.
Цікава, хто тады быў па гэтай тэме ва ўрадзе, наўрацці Купрыянаў сам бы на такое палез. Кокараў? Марыніч? Ці вышэй?