Два аўтобусы беларусаў павезлі ў Маскву на хрэсны ход з мошчамі Данскога на чале з патрыярхам Кірылам
Моляцца за перамогу ў вайне супраць Украіны. Тэлеканал РПЦ назваў святыню знакам непазбежнай перамогі Расіі.
На хрэсны ход на чале з патрыярхам Кірылам арганізавана прывезлі вернікаў з Беларусі. Як паведамляе тэлеграм-канал «Праваслаўе і зомбі», пасля адпаведнага ліста ў Мінску сабралі прынамсі два аўтобусы — каля 100 чалавек. У Маскву таксама накіравалі навучэнцаў Мінскай духоўнай семінарыі і акадэміі.
Галоўнай святыняй шэсця стаў каўчэг з мошчамі маскоўскага князя Дзмітрыя Данскога. Мінабароны Расіі паведамляла, што каўчэг вырабілі па блаславенні патрыярха Кірыла, каб вазіць па вайсковых частках расійскай арміі, у тым ліку на вайну супраць Украіны. У ведамстве назвалі гэта «для нашага суцяшэння і нашай перамогі».
У эфіры праваслаўнага тэлеканала «Спас» святар Валерый Духанін заявіў, што Дзмітрый Данскі цяпер «дапамагае ў супрацьстаянні з непрыяцелем»: «Нам будзе дадзеная перамога ў тых баявых дзеяннях, якія цяпер вядуцца, і Расія несумненна пераможа. Таму і явіліся мошчы князя як знак таго, што Гасподзь зноў побач з намі».
Гаворачы пра гістарычных ворагаў князя, святар згадаў не толькі мангола-татар, але і Літву, назваўшы яе «сімвалам заходняй цывілізацыі, якая супрацьстаіць».
Напрыканцы жніўня РПЦ абвясціла пра цуд і «другое здабыццё» мошчаў Дзмітрыя Данскога, хаця месца яго пахавання ў Архангельскім саборы Маскоўскага Крамля было вядома раней і нікуды не знікала.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж16
Каментары