У Нацыянальным аэрапорце Мінск плануюць значна павялічыць ёмістасць аўтамабільнай паркоўкі Р3. Пасля рэалізацыі праекта на ёй з'явіцца яшчэ 884 новыя машына-месцы, паведаміла прэс-служба аэрапорта.
Большая частка новых месцаў — 542 — будзе прызначаная для пасажыраў і наведвальнікаў аэрапорта. Яшчэ 342 месцы аддадуць пад службовы транспарт. Работы плануецца правесці на ўчастку плошчай каля 3,39 гектара.
У адміністрацыі аэрапорта адзначылі, што пашырэнне паркоўкі неабходнае ў сувязі з развіццём інфраструктуры прывакзальнай тэрыторыі, а таксама для захавання якасці паслуг, якія аказваюцца пасажырам. Акрамя таго, дадатковыя месцы патрэбныя супрацоўнікам самога аэрапорта.
Праект прадугледжвае стварэнне безбар'ернага асяроддзя. Для людзей з інваліднасцю і іншых маламабільных грамадзян будзе абсталявана шэсць спецыяльных парковачных месцаў. На перасячэннях пешаходных дарожак з праезнай часткай не будзе высокіх бардзюраў, а тратуары і пешаходныя дарожкі атрымаюць трывалае, роўнае і няслізкае пакрыццё.
Калі менавіта завершацца работы і адкрыюцца новыя парковачныя месцы, пакуль не паведамляецца.
Каментары