Вячорка: Калі Еўропа пачне здаваць перад Лукашэнкам, гэта аслабіць амерыканскія пазіцыі
У эфіры тэлеканала «Белсат» галоўны дарадца Святланы Ціханоўскай Франак Вячорка закрануў пытанне перамоў Захаду з Аляксандрам Лукашэнкам. Па яго словах, амерыканцы працягваюць высілкі дзеля вызвалення палітвязняў, хоць у маі не адбыўся візіт у Мінск спецпрадстаўніка прэзідэнта ЗША Джона Коўла, які ён перад тым сам і анансаваў.
«Амерыканцы настроеныя рашуча. І Коўл званіў Ціханоўскай, запэўніў, што ўсё ідзе, яно не спынілася. Ёсць пэўныя складанасці ў гэтых перамовах, перамовы з Лукашэнкам — гэта вельмі складана. Лукашэнка пастаянна мяняе правілы гульні, мяняе ўмовы», — сказаў Вячорка.
Па яго словах, Лукашэнка намагаецца праз ЗША «праціснуць» ЕС з тым, каб былі скасаваныя еўрапейскія санкцыі:
«У Лукашэнкі з'яўляецца адчуванне, што ён можа паламаць Еўропу. У яго спадзяванне, што ён праз Амерыку зможа зламаць цэласную пазіцыю Еўропы. І мне здаецца, што калі Еўропа пачне здаваць і пачне гэты трэк, гэта аслабіць амерыканскія пазіцыі.
Чаму Лукашэнка ўсё аддае Трампу? Таму што ён разумее, што ад Еўропы нічога не атрымае. І цяпер, магчыма, ёсць у Лукашэнкі спадзяванне, што калі Еўропа пахіснецца, калі зараз пачне развальвацца еўрапейскі фронт, то яму ўжо і амерыканцы будуць не патрэбныя».
Вячорка назваў важным, каб перамовы Вашынгтона з Мінскам працягваліся:
«Важна гэты амерыканскі трэк падтрымліваць, мы падтрымліваем, мы камунікуем, і мы спадзяемся, што ў гэтым годзе будзе больш вызваленняў, а ідэальна, каб усе выйшлі на волю».
Наконт імавернага візіту ў Мінск кіраўніка французскай разведкі Нікаля Лернэра, пра які раней пісаў палітычны актывіст Валерый Цапкала, Вячорка сказаў, што, па-першае, афіцыйных пацвярджэнняў гэтага не было, а па-другое, у такіх кантактах няма нічога незвычайнага:
«Лінія камунікацыі з Мінскам заставалася заўжды. З Мінскам сустракаюцца дэлегацыі еўрапейскіх краін, кожны год прыязджаюць на ўзроўні дырэктараў ці асобных аддзелаў міністэрстваў замежных спраў, па лініі спецслужбаў. І Польшча, калі займаліся вызваленнем Пачобута, таксама сустракаліся — і фізічна, і не толькі».
Такім чынам, як падкрэсліў дарадца Ціханоўскай, камунікацыя не перарывалася, і «калі нехта кажа, што няма дыялогу, Еўропа не размаўляла, то гэта няпраўда, усе шэсць гадоў быў дыялог».
«Праблема была з боку Мінску, што Мінск не хацеў вызваляць, не хацеў гаварыць пра палітвязняў, не хацеў спыняць рэпрэсій. Але зараз у Мінску сапраўды складаная сітуацыя, таму што прыбыткі змяншаюцца, вось гэты эканамічны бум пасля пачатку паўнамаштабнай вайны прасеў, эканоміка ў стагнацыі, цяпер ён чапляецца за кожную саломінку», — працягнуў Вячорка.
Акурат цяпер, паводле яго, на Лукашэнку варта аказваць большы ціск:
«Ён зараз хапаецца за кожную саломінку, каб зменшыць санкцыйны ціск, і гатовы нават вызваляць палітвязняў. У такія моманты слабасці Лукашэнкі не трэба змякчаць, а трэба, наадварот, патрабаваць больш, трэба аказваць яшчэ большы ціск. І я думаю, еўрапейская роля — гэты ціск аказваць. А амерыканцы, якія ўжо ўступілі ў трэк перамоваў, выстаўляць і класці на стол патрабаванні».
«Давераная асоба Макрона, якая прыедзе ў Мінск», аказалася адстаўным паслом, што пабывае на «Мінскім дыялогу»
Джон Коўл патлумачыў, чаму не паехаў у Мінск разам з прапаведнікам Грэмам
«Мы яшчэ не скончылі. Не страчвайце надзеі!» Джон Коўл адрэагаваў на словы Ціханоўскай пра 800 палітвязняў у Беларусі
Ціханоўская пракаментавала прапанову ЗША суседзям Беларусі зняць санкцыі на транзіт калію
Цяпер чытаюць
65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?4
Каментары
Толькі гэтым і тлумачыцца згаворлівасьць Лукашэнкі ў перамовах з прадстаўніком ЗША, што да вызваленьня палітвязьняў у абмен на нейкія палёгкі з санкцыямі. Гэта ж не простае супадзеньне - праблемы Масквы на фронце ва Ўкраіне і, адначасова, раптоўная згаворлівасьць Лукашэнкі на перамовах з Коўлам, чаго не было раней(!)...
Чаму ён размаўляе з амерыканцамі, а не з еўрапейцамі ? Тут ізноў выкананьне крамлёўскіх інструкцыяў, бо Масква грэбліва ставіцца да еўрапейцаў, не разглядае іх у якасьці перамоўшчыкаў з Украінай, адмыслова падымаючы значнасьць Трампа, і супрацьпастаўляючы яго ЕЗ. У Лукашэнкі тут таксама гэта ўзгодненыя з Масквой паводзіны з мэтаю, дзе гэта толькі магчыма, 1) сутыкнуць ЕЗ і Вашынгтон, і 2) скарыстацца Трампам дзеля адмены санкцыяў ЕЗ...
Напрыклад, амэры пагадзіліся зьняць санкцыі з Белкалія і купляць яго, а санкцыі ЕЗ робяць немагчымым ажыцьцявіць гэта на практыцы. Ня дзіва, што й чарговая сустрэча не адбылася (Коўл-Лукашэнка), бо рэжым патрабуе сьпярша выканаць ужо ўзгодненыя дамоўленасьці, маўляў, мы зрабілі свой крок, зрабіце яго й вы, прадавіце Еўропу, бо санкцыі ЕЗ стаяць колам...
Спадзеў на ціск Трампа на Брусэль і Літву, на спрэчкі, на страту там даверу, і, як сьлед, магчымыя праблемы з пастачаньнем зброі Ўкраіне, за што цяпер адказвае ЕЗ, калі Еўропа заўпарціўся, альбо палёгка санкцыйнага ціску ЕЗ, калі Трамп павядзецца.