У Ждановічах прадаюць катэдж, створаны па праекце Zrobim. Нават недакончаны ён уражвае
Участак — 17 сотак, з хвоямі. Шырокія шкляныя тэрасы нібы ўбудаваныя ў бор.
Былыя дачныя пасёлкі ў Ждановічах, дзе знаходзіцца і лецішча-музей Васіля Быкава, ужо не пазнаць. Тэрыторыя ўсяго за пару кіламетраў ад МКАД за апошнія гады забудавалася дарагімі сучаснымі катэджамі, якія ўражваюць архітэктурай і маштабам.
Лецішча Быкава — на 6‑й Дачнай вуліцы. А недалёка, на 1‑й Дачнай,у Ждановічах выставілі на продаж адзін з самых незвычайных будынкаў у гэтай частцы прыгарада. Катэдж будуецца паводле праекта бюро Zrobim Architects, да якіх у красавіку прыходзілі сілавікі.
Мяркуючы па фота, асноўныя будаўнічыя работы ўжо завершаныя. Дом атрымаў гатовы фасад, панарамнае шкленне, дах і вонкавае аздабленне. А вось унутры працы яшчэ — пачаць і скончыць.
Будынак вылучаецца строгімі геаметрычнымі формамі, плоскім дахам, панарамным шкленнем амаль на ўсю вышыню паверхаў. Аздабленне выканана керамічнымі плітамі і натуральным дрэвам. Фасады спалучаюць светлыя і графітавыя адценні, а ўся кампазіцыя нібыта ўбудаваная ў сасновы лес.
Асабліва эфектна задуманы галоўны фасад: двухпавярховы аб’ём з шырокімі тэрасамі. Праект прадугледжвае вялікую адкрытую зону адпачынку, а таксама басейн і саўну.
Агульная плошча катэджа — 657 квадратных метраў. Участак — 17,46 соткі ў прыватнай уласнасці.
На першым паверсе запраектавалі велізарную гасцёўню плошчай больш за 90 «квадратаў», асобную зону адпачынку амаль на 62 квадратныя метры, некалькі кабінетаў, трэнажорную залу, кухню, гараж на дзве машыны і вялікую тэрасу.
На другім паверсе — тры спальні, у тым ліку спальня бацькоў амаль на 50 квадратных метраў з уласным санвузлом і выхадам на тэрасу больш як 55 «квадратаў». У падвальнай частцы размясцілі тэхнічныя памяшканні для сістэм водаачысткі і абслугоўвання дома.
Адпаведна апісанню сайта Realt.by, дом пабудаваны па маналітна-каркаснай тэхналогіі, а сцены запоўнены керамічнымі порыстымі блокамі — гэта сучасны матэрыял з мноствам дробных паветраных пораў, які лепш утрымлівае цяпло і дае добрую гукаізаляцыю.
Для фасадаў выкарысталі керамічныя пліты Laminam — аднаго з самых вядомых еўрапейскіх брэндаў у сегменце архітэктурнай керамікі, і лістоўніцу, якая прапітаная фінскай алівай. Плоскі дах пакрылі сучаснай ізаляцыйнай сістэмай Hyperdesmo, якая павінна надзейна абараняць дом ад працёкаў і вільгаці. Да дома ўжо падведзены газ, вада і цэнтральная каналізацыя.
Ад катэджа лясной сцежкай можна пешшу за 8 хвілін дайсці да пляжа №5 Мінскага мора. Побач знаходзяцца санаторыі «Беларусачка» і «Ракета», навучальна-спартыўная база БДУ і Федэрацыі прафсаюзаў. На супрацьлеглым беразе Свіслачы — забаўляльны цэнтр «Сябры», медыцынскі цэнтр «Неа» і Рэспубліканскі клінічны медцэнтр Кіраўніцтва справаў Лукашэнкі.
Да Кастрычніцкай плошчы ці плошчы Перамогі ад дома аўтамабілем можна даехаць за 25 хвілін. Але побач ёсць і прыпынак грамадскага транспарту.
За няскончаны катэдж просяць 1,7 мільёна даляраў.
На гэтай жа вуліцы за мільён даляраў цяпер прадаецца яшчэ адзін катэдж — з участкам на дзве соткі меншым. Сам дом прыкладна на 200 квадратных метраў кампактнейшы. Таксама ў продажы ёсць пусты ўчастак на 11 сотак — за яго просяць каля 395 тысяч даляраў у эквіваленце.
У мінскім гандлёвым цэнтры Palazzo сабралася даўжэзная чарга. Па дармовых мядзведзікаў!5
Каментары
Не ведаю, хто бы хацеў жыць у гэтым.