Чарговае звальненне ў Пентагоне: пайшоў у адстаўку міністр ВМС Джон Фелан, які меўся будаваць «залаты флот» Трампа
Пентагон абвясціў пра адстаўку міністра Ваенна-марскіх сіл ЗША Джона Фелана. Ён стаў чарговым амерыканскім ваенным чыноўнікам, які застаўся без пасады з прыходам у Белы дом Дональда Трампа і міністра абароны Піта Хегсета, піша Бі-бі-сі.
Афіцыйны прадстаўнік Міністэрства абароны Шон Парнэл паведаміў, што Фелан неадкладна пакідае сваю пасаду і выканаўцам абавязкаў міністра будзе яго намеснік Хунг Као.
Пра адстаўку Фелана стала вядома ў момант, калі працягваецца вайна ЗША і Ізраіля супраць Ірана (хоць у ёй аб'яўлена перамір'е), а амерыканскія ваенна-марскія сілы працягваюць марскую блакаду ў Армузскім праліве.
Дональд Трамп заяўляе, што блакада Ірана будзе працягвацца, аднак улады гэтай краіны расцэньваюць яе як парушэнне пагаднення аб перамір'і.
ВМС ЗША не растлумачылі, з чым звязана звальненне Фелана.
У пачатку красавіка Хегсет звольніў начальніка штаба Сухапутных войскаў ЗША Рэндзі Джорджа.
Пасля вяртання Трампа ў Белы дом сваіх пасад пазбавіліся ўжо больш за 10 высокапастаўленых ваенных, у тым ліку старшыня Аб'яднанага камітэта начальнікаў штабоў генерал Чарльз Браўн, начальнік штаба ВМФ адмірал Ліза Франкеці, намеснік кіраўніка штаба ВПС генерал Джым Слайф, і начальнік ваеннай разведкі Джэфры Круз.
«Залаты флот»: хто такі Фелан і што пра яго звальненне пішуць СМІ
Фелан не з'яўляецца вайскоўцам, да прызначэння міністрам ВМС ён узначальваў прыватны інвестыцыйны фонд у Фларыдзе.
Дональд Трамп называў яго «адным з самых паспяховых бізнэсменаў у краіне», нагадвае New York Times.
«Ён напэўна атрымаў гэтую працу з найбольшым у гісторыі зніжэннем зарплаты, але ён хоча гэта рабіць, — казаў Трамп на прэс-канферэнцыі падчас прызначэння Фелана. — Ён хоча аднавіць наш Ваенна-марскі флот. І каб зрабіць гэта як след, патрэбныя менавіта такія мазгі».
Паводле даных выдання, калі Фелан быў кіраўніком ВМС, ён займаўся стварэннем «Залатога флоту», які павінен быць пабудаваны ў выніку значных інвестыцый у новыя караблі, у тым ліку лінейных караблёў класа «Трамп».
Трамп казаў, што ўхваліў будаўніцтва двух новых лінкараў, а ў перспектыве плануецца пабудаваць да 25. «Яны будуць самымі хуткімі, самымі вялікімі і, безумоўна, у 100 разоў магутнейшымі за любы лінкор, калі-небудзь пабудаваны», — заяўляў прэзідэнт ЗША ў снежні мінулага года.
Аднак, як піша NYT са спасылкай на неназваных чыноўнікаў, праца Фелана ў міністэрстве суправаджалася канфліктамі з кіраўніцтвам Пентагона, у тым ліку з Хегсетам і з намеснікам міністра абароны Стывенам Файнбергам. Прычынай напружаных адносін былі «стыль менеджменту, асабістыя рознагалоссі і іншыя пытанні», сказана ў публікацыі.
Крыніцы CNN паведамляюць, што Фелан канфліктаваў з Хегсетам ужо некалькі месяцаў. Пры гэтым кіраўнік Пентагона лічыў, што той занадта павольна рэалізуе праграму па будаўніцтве караблёў, — і таксама быў незадаволены прамымі кантактамі Фелана з Трампам: міністр абароны расцэньваў іх як спробу дзейнічаць праз яго галаву, сказана ў публікацыі CNN.
Паводле даных CNN, Файнберг таксама хоча кантраляваць будаўніцтва караблёў, хоць гэтая праца звычайна ўваходзіць у зону адказнасці міністра ВМС. Гэтыя звесткі пацвярджаюць і суразмоўцы NYT.
Па звестках NYT газеты, у Фелана таксама склаліся напружаныя адносіны з Хунгам Као, які стаіць нашмат бліжэй да Хегсета, у тым ліку па сацыяльных і культурных пытаннях.
Цяпер чытаюць
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4444
Каментары