«Можаце называць мяне «мой капітан». Лідар гурта «Дай Дарогу!» Юрый Стыльскі адвучыўся на яхтсмена
Музыка, лідар групы «Дай Дарогу!» Юрый Стыльскі атрымаў пасведчанне Міжнароднай асацыяцыі паруснага спорту. Артыст сапраўды не выключае, што ў будучыні зможа выходзіць у мора як капітан разам з турыстычнымі групамі.
«З гэтага часу вы можаце называць мяне «мой капітан!»», — пракаментаваў ён новую для сябе прафесію.
Юрый Стыльскі распавёў «Нашай Ніве», што для яго самога ўсё пачалося са звычайных турыстычных выхадаў у мора разам з беларускім клубам яхтсменаў Damora.
«У мяне набралася недзе чатыры выхады (прычым часам я мог падмяняць капітана). І ў нейкі момант я зразумеў, што мог бы і сам стаць капітанам. Паразмаўляў з DaMora, курс навучання цягнуўся каля 10 дзён і потым мне толькі заставалася чакаць адказ ад Міжнароднай асацыяцыі паруснага спорту».
Юрый прызнаецца, што цяжэй за ўсё яму давалася паркоўка яхты.
«Асабліва, калі падымаецца вецер і вялікія хвалі, а вакол стаяць катамараны па мільёну еўра».
Гарантыяй таго, што навічок сапраўды засвоіў курс «на выдатна», з’яўляецца імя і прозвішча інструктара, пазначанага на пасведчанні — ён як бы ручаецца за свайго вучня.
Што тычыцца цэн, музыка раіць запытваць іх персанальна ў яхтсменаў «Дамора» (навучанне на шкіпера на Балтыцы на дадзены момант каштуе амаль $1450).
«Шмат залежыць ад таго месца, дзе вы будзеце вучыцца. Я, напрыклад, праходзіў курс на Тэнэрыфэ».
Пакуль Юрый будзе напрацоўваць практыку ў ролі капітана. У будучыні ж артыст марыць сабраць уласную каманду і прапаноўваць свае паслугі правадніка ў свет на адкрытай вадзе.
«Проста ўзяць яхту ў арэнду і адправіцца куды-небудзь там з групай жадаючых па Нарвегіі, па ф’ёрдах (на якіх я, дарэчы, ужо быў, але не ў ролі капітана). Мы так з клубам каталіся па Канарскіх выспах, усе аб’ездзілі. 1500 еўра, калі я не памыляюся, агулам выходзіць за 10‑дзённы заплыў».
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты2
Каментары