Беларускія мытнікі канфіскавалі чарговую буйную партыю наркатычных сродкаў. Гэтым разам парушальнікі спрабавалі незаконна ўвезці на тэрыторыю ЕАЭС 317 кілаграмаў гашышу, паведамляе Дзяржаўны мытны камітэт Беларусі.
Наркотыкі былі схаваныя ў спецыяльна абсталяваных тайніках сярод легальных тавараў. Груз прыбыў з Польшчы ў грузавіку польскага перавозчыка, якім кіраваў грамадзянін Беларусі.
Падчас неадкладных следчых дзеянняў беларускія мытнікі ўстанавілі, што забаронены груз павінен быў далей накіравацца ў Расію. У сувязі з гэтым аператыўна арганізавалі сумесныя аператыўна-вышуковыя мерапрыемствы з супрацоўнікамі Федэральнай мытнай службы Расіі.
У выніку на тэрыторыі Расіі быў затрыманы адзін з удзельнікаў злачыннай групы — атрымальнік наркотыкаў. Ім аказаўся 58‑гадовы грамадзянін Эстоніі, які раней ужо быў судзімы ў Расіі за цяжкія злачынствы.
Аператыўная мытня Беларусі завяла крымінальную справу ў дачыненні да групы асоб паводле часткі 2 артыкула 328‑1 Крымінальнага кодэкса Рэспублікі Беларусь, а Паўночна-Заходняя аператыўная мытня Расіі — паводле часткі 4 артыкула 229.1 Крымінальнага кодэкса Расійскай Федэрацыі.
Злачынцам можа пагражаць пакаранне ў выглядзе пазбаўлення волі на тэрмін да 20 гадоў.
Цяпер чытаюць
«Лена 20 рублёў» узялася за старое: знакамітая махлярка зноў разводзіць даверлівых беларусаў10
Каментары