Стаў вядомы прысуд адыёзнаму функцыянеру БРСМ з педафільскім мінулым, якога судзілі за здраду дзяржаве
У 2020 годзе Уладзімір Цюхай дапамагаў міліцыі патруляваць вуліцы, каб лавіць удзельнікаў пратэстаў. А судзілі яго за вайну ва Украіне.
Былога функцыянера БРСМ і Кампартыі Уладзіміра Цюхая судзілі па дзвюх частках артыкула «Здрада дзяржаве», а таксама ў «прымусе асобы да ўдзелу ў злачыннай дзейнасці з прымяненнем гвалту або знішчэннем маёмасці». Суд пачаўся 21 чэрвеня 2024 года. Толькі цяпер стаў вядомы вырак і сутнасць справы.
Паводле сведчання былога палітвязня, Цюхай з незразумелых прычын вырашыў сачыць за вайскоўцамі з мэтай перадаць звесткі Украіне. За гэта яму далі 17 гадоў.
Пра Цюхая раней «Наша Ніва» падрабязна распавядала.
Першую вядомасць Цюхай атрымаў у 2008-м. Тады ён быў сакратаром мінскай камуністычнай партыі і супрацоўнікам БРСМ. Дзеля таго, каб сваякі і паплечнікі палітвязня Аляксандра Баразенкі не маглі прайсці на суд, ён цалкам загаціў залу студэнтамі мінскіх ВНУ. У адказ на абурэнне маці палітвязня ён штурхнуў яе так, што яна ўпала на рукі мужа. Аніякай адказнасці за гэта не панёс.
У 2013‑м Цюхай зноўку аскандаліўся. Жодзінскія лаўцы педафілаў сцвярджалі, што злавілі яго на жыўца, калі вялі перапіску ад імя 15‑гадовага хлопца, які запрасіў функцыянера БРСМ на «гарачую ноч». Пры сустрэчы ў Цюхая пры сабе быццам знайшлі інтымную змазку і прэзерватывы. Сам ён гэта адмаўляў.
У 2020‑м мужчына дапамагаў міліцыі патруляваць вуліцы. Ён жаліўся тэлеканалу АНТ, што «не можа выйсці з сям'ёй на вуліцу ў нядзелю». Таму, маўляў, ён і яшчэ дзевяць яго прыяцеляў уступілі ў дружыны, каб «адсочваць, ці не праходзіць недзе несанкцыянаванае мерапрыемства».
Апошні раз анлайн Цюхай быў ва «Укантакце» ў ліпені 2022 года.
Цяпер чытаюць
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары