Суддзю Брысіну, якая прысудзіла Паўлу Белавусу 13 гадоў калоніі, адправілі на пенсію і выдалі знак «За адданасць правасуддзю»
64‑гадовая Жанна Брысіна з Мінскага гарадскога суда датычная да дзясяткаў палітычных прысудаў.
14 кастрычніка ў Мінскім гарадскім судзе ўрачыста праводзілі ў адстаўку суддзю Жанну Брысіну, датычную да дзясяткаў палітычных судоў. Праз тыдзень ёй спаўняецца 65 гадоў.
Старшыня Мінгарсуда Таццяна Тупік падзякавала Брысінай за «шматгадовую добрасумленную працу, бездакорны прафесіяналізм і нязменную вернасць ідэалам правасуддзя». Ад імя старшыні Вярхоўнага суда Андрэя Шведа яна ўручыла ёй знак «За адданасць правасуддзю».
Найбольш вядомы прысуд Брысінай датычыцца Паўла Белавуса, заснавальніка крамы нацыянальнай сімволікі Symbal.by. 11 мая 2023 года яна на закрытым працэсе дала яму 13 гадоў калоніі. Белавуса прызналі вінаватым па чатырох артыкулах, у тым ліку ў «здрадзе дзяржаве» і «стварэнні экстрэмісцкага фармавання». За кратамі ён правёў амаль пяць гадоў.
У студзені 2024 года Брысіна прысудзіла тры гады калоніі барысаўскаму фотакарэспандэнту Аляксандру Зянькову. Яго абвінавацілі ва ўдзеле ў «экстрэмісцкім фармаванні».
Агулам жа ў базе «Дысідэнта» ёсць 40 палітычных прысудаў. Некаторых палітвязняў Брысіна судзіла ў першай інстанцыі, справы некаторых разглядала ў апеляцыйным парадку.
27 сакавіка 2025 года Еўрасаюз уключыў Брысіну ў санкцыйны спіс.
Гэта ўжо другі раз, калі Брысіна трапляе пад санкцыі. Упершыню яе ўключылі ў спіс у 2011 годзе, калі яна была суддзёй суда Заводскага раёна Мінска. Тады яна судзіла журналістку Ірыну Халіп, Сяргея Марцалева і Паўла Севярынца па справе Плошчы-2010.
Каментары