Суд над Марын Лё Пэн сёння вырашае, ці зможа яна ўдзельнічаць у прэзідэнцкіх выбарах у Францыі ў наступным годзе
Лідарка французскіх ультраправых Марын Лё Пэн у аўторак паўстане перад судом, каб аспрэчыць абвінавачанне ў прысваенні сродкаў. Ад выніку гэтага працэсу залежыць, ці зможа яна прыняць удзел у прэзідэнцкіх выбарах у наступным годзе, дзе яна лічылася адной з найбольш верагодных прэтэндэнтак на перамогу, піша Бі-бі-сі.
У сакавіку французскі суд забараніў Лё Пэн займаць дзяржаўныя пасады на працягу пяці гадоў пасля таго, як яна і яшчэ восем былых дэпутатаў «Нацыянальнага аб’яднання» былі прызнаныя вінаватымі ў прысваенні больш як чатырох мільёнаў еўра з фондаў ЕС.
Паводле рашэння суда, з 2004 па 2016 год Лё Пэн і яе паплечнікі выкарыстоўвалі сродкі, выдзеленыя на працу ў Еўрапейскім парламенце, для аплаты працы супрацоўнікаў, якія насамрэч працавалі на партыю.
Лё Пэн заявіла, што спосаб выкарыстання грошай быў законным. «Мая адзіная лінія абароны ў апеляцыйным працэсе будзе такой жа, як і ў першым: гаварыць праўду», — заявіла Лё Пэн журналістам у панядзелак.
«Справу перагледзяць, і судзіць яе будуць новыя суддзі, — дадала яна. — Я спадзяюся пераканаць іх у сваёй невінаватасці».
Лё Пэн, якая тройчы ўдзельнічала ў прэзідэнцкіх выбарах, таксама была прысуджаная да чатырох гадоў пазбаўлення волі, з якіх два гады — умоўна, а таксама да штрафу 100 тысяч еўра. У адрозненне ад рашэння аб забароне, гэтыя пакаранні не ўступілі ў сілу, бо яна падала апеляцыю.
Палітык заўсёды сцвярджала, што невінаватая, і абскарджвае прысуд у надзеі атрымаць магчымасць чацвёртым разам балатавацца на пасаду прэзідэнта. Апеляцыю разам з Лё Пэн падалі 12 фігурантаў справы, у тым ліку намеснік лідара «Нацыянальнага аб’яднання» Луi Аліё, а таксама сама партыя.
Яшчэ 12 чалавек, у тым ліку адна з сясцёр Лё Пэн, вырашылі не абскарджваць прысуд, а адзін з асуджаных з таго часу памёр.
Слуханні пачынаюцца ў аўторак і павінны завяршыцца 12 лютага.
Адвакаты Марын Лё Пэн — Радольф Баселю і Сандра Шырак Каларык — адмовіліся даваць каментары перад пачаткам слуханняў.
Адвакат Еўрапейскага парламента Патрык Мезанёў выказаў надзею, што прысуд Лё Пэн і яе саўдзельнікам будзе пакінуты ў сіле, уключаючы выплату больш як 3 мільёнаў еўра ў якасці кампенсацыі шкоды Еўрапейскаму парламенту. «Нацыянальнае аб’яднанне» таксама павінна выплаціць штраф у 2 мільёны еўра, з якіх палова была ўмоўна адтэрмінаваная.
Рашэнне па справе чакаецца да лета, што азначае: калі пяцігадовая забарона на ўдзел у выбарах будзе адмененая або істотна скарочаная, у Лё Пэн застануцца шанцы ўдзельнічаць у выбарах 2027 года.
Калі ж суд пакіне ў сіле сваё першапачатковае рашэнне, Лё Пэн будзе забаронена ўдзельнічаць у выбарах 2027 года, якія многія лічаць яе найлепшым і, магчыма, апошнім шанцам стаць прэзідэнткай Францыі.
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары