ЗША гатовыя ўвесці дадатковыя санкцыі супраць Расіі, але пакуль чакаюць рашучых крокаў з боку Еўропы
Новыя санкцыйныя меры падрыхтаваныя адміністрацыяй Дональда Трампа на выпадак, калі Пуцін працягне адкладаць спыненне вайны ва Украіне. Частка гэтых санкцый накіравана супраць банкаўскага сектара Расіі і інфраструктуры, якая выкарыстоўваецца для паставак нафты на сусветны рынак.
Пра гэта паведамляе Reuters са спасылкай на крыніцы, піша РБК-Украіна.
Раней украінскія ўлады прапанавалі ЗША ўвесці дадатковыя санкцыі, у тым ліку адключыць усе расійскія банкі ад доларавай сістэмы. Аднак пакуль невядома, наколькі сур’ёзна Вашынгтон разглядае гэтыя прапановы.
Тым часам у Сенаце ЗША зноў актывізаваліся спробы аднавіць разгляд двухпартыйнага законапраекта аб санкцыях, які раней быў замарожаны. Паводле крыніцы, блізкай да адміністрацыі, Трамп гатовы падтрымаць гэты пакет, але ў найбліжэйшы час яго зацвярджэнне малаверагоднае.
Па словах высокапастаўленага амерыканскага чыноўніка, цяпер ЗША хацелі б, каб еўрапейскія саюзнікі зрабілі наступны крок супраць Расіі — увялі новыя санкцыі і мыты. Іншая крыніца паведаміла, што Трамп, верагодна, возьме паўзу на некалькі тыдняў, каб ацаніць рэакцыю Масквы на нядаўна аб'яўленыя абмежаванні супраць «Лукойла» і «Раснафты».
Акрамя таго, ЗША заявілі, што падтрымліваюць ідэю выкарыстання Еўрасаюзам замарожаных расійскіх актываў для закупкі амерыканскай зброі для Украіны. Паводле яшчэ двух крыніц, у Вашынгтоне ўжо пачаліся ўнутраныя перамовы аб выкарыстанні расійскіх актываў, якія знаходзяцца ў ЗША, для падтрымкі ўкраінскіх узброеных сіл.
Нагадаем, што ў ноч на 23 кастрычніка ЗША абвясцілі санкцыі супраць дзвюх найбуйнейшых нафтавых кампаній Расіі — «Раснафты» і «Лукойла», каб прымусіць Пуціна сесці за стол перамоў з Украінай. У Міністэрстве фінансаў ЗША заклікалі Расію неадкладна пагадзіцца на спыненне агню і ўдакладнілі, што новыя меры закранаюць не толькі гэтыя дзве кампаніі, але і 36 іх даччыных структур. Пасля гэтага акцыі «Раснафты» і «Лукойла» рэзка ўпалі — на некалькі мільярдаў долараў.
На наступны дзень кіраўніца еўрапейскай дыпламатыі Кая Калас паведаміла, што Еўрасаюз ухваліў 19‑ы пакет санкцый, накіраваны супраць «ценявога флоту» Расіі і імпарту звадкаванага прыроднага газу.
Літва зноў закрывае мяжу з Беларуссю — на нявызначаны тэрмін9
Літва зноў закрывае мяжу з Беларуссю — на нявызначаны тэрмін
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары