Фёдар Паўлючэнка: У чым не мае рацыі Юлія Міцкевіч? Турма што, робіць кагосьці лепшым? Прыгажэйшым? Багацейшым?
«Калі ты тупы, вось як бы ў цябе зусім ужо мозг адбіты, можна прычапіцца да любога слова. Можна да слова «слова» прычапіцца. І з гэтага выкруціць цэлую хейтарскую кампанію».
«Турма нікога не робіць лепшым, толькі горшым», — так Юлія Міцкевіч, намесніца прадстаўніцы па сацыяльнай палітыцы Аб’яднанага пераходнага кабінета, пракаментавала скандал вакол паводзін Сяргея Ціханоўскага ў Нью-Ёрку. Многіх, у тым ліку былых палітвязняў, гэтае выказванне абразіла.
У падтрымку Міцкевіч у новым выпуску ютуб-праекта «Саша, что ты несёшь?…» выказаўся галоўны рэдактар Reform.news Фёдар Паўлючэнка.
«Усе носяцца цяпер як са сцягам з яе фразай. (…) То-бок, абвінавацілі ўжо проста ва ўсім яе, ва ўсіх смяротных грахах», —
рэзка заўважыў Паўлючэнка і акцэнтаваў увагу на тым, што ён сам гаварыў дакладна такую ж фразу ў эфіры свайго ютуб-канала.
«Я прапаную падумаць, у чым не мае рацыі Юлія Міцкевіч. Турма што, робіць кагосьці лепшым? Прыгажэйшым, маладзейшым? Багацейшым, можа? Лішнія зубы, печань, ныркі вырастаюць? І ўвогуле ў цэлым самаадчуванне паляпшаецца, так? Відаць, гэта маецца на ўвазе, калі крытыкуюць Юлію Міцкевіч за тое, што яна заявіла, што турма нікога не робіць лепш, толькі горш», —
працягнуў свае разважанні Паўлючэнка.
На яго погляд, крытыкі свядома вырываюць фразу з кантэксту. Ён тлумачыць гэта альбо неразуменнем, альбо мэтанакіраваным хейтам.
«Калі ты тупы, вось як бы ў цябе зусім ужо мозг адбіты, можна прычапіцца да любога слова. Можна да слова «слова» прычапіцца. І з гэтага выкруціць цэлую хейтарскую кампанію»,
— заявіў галоўны рэдактар Reform.news і працягнуў:
«Мне не падабаецца гэтая беларуская палітычная культура, якая нараджаецца, калі многія дазваляюць сабе (з гэтага палітычнага класа), выкарыстоўваць маніпуляцыі і проста адкрытае хамства для таго, каб хэйціць сваіх палітычных апанентаў. Канкурэнтаў. Калі ёсць канфлікт інтарэсаў. Выкарыстоўваць вось такія метады, на мой погляд, гэта неэтычна і непрыгожа».
Ён прызнаў, што выказванне пра турму магло пакрыўдзіць былых палітвязняў, і звярнуў увагу на эмацыйны пост былога палітвязня Сяргея Гуня, які ўбачыў у гэтых словах спробу выставіць вязняў «агрэсіўнымі аб'юзерамі са зламанай псіхікай, пагрозу, а не рэсурс». Паўлючэнка паспрабаваў развеяць гэтыя асцярогі:
«Я хацеў бы, калі раптам вы пачуеце ў маіх словах водгукі гэтай рыторыкі, проста спыніцца і сказаць, што не, мы так не гаворым. Я толькі спрабую падкрэсліць, што турма нікога не робіць лепшым.
Не становіцца чалавек лепшым ад таго, што ён трапляе ў турму. Гэта ўвогуле неабавязковы досвед. Асабліва для палітвязняў. Яго не трэба праходзіць. Гэта губіць жыццё. Гэта жахлівае выпрабаванне. Лепш бы гэтага ўвогуле ўсяго не было. Вось простая думка».
Каментары
Таму, калі ласка, ня трэба цяпер заліваць нам пра "печань, ныркі, зубы" і кантэкст, якога не было.
Рытарычных агульных абразаў "да вы (они) все там..", "вечно ты со своими..." варта пазьбягаць нават ў прыватным жыцці і ўжо тым больш ў грамадска-палітычным.