Многія беларусы страцяць магчымасць ехаць на працу ў Літву. Вось што зменіцца з лістапада
Нават нягледзячы на сур'ёзныя скарачэнні ў выдачы новых дазволаў на жыхарства, Літва ўсё адно заставалася даволі папулярным кірункам для працы сярод беларусаў — перш за ўсё дальнабойшчыкаў. Але ўжо хутка плынь працоўных мігрантаў у гэтую краіну можа амаль цалкам спыніцца.
Як працуе цяпер?
Да 1 лістапада беларусы могуць па-ранейшаму падаваць дакументы на атрыманне літоўскага працоўнага ДНЖ наўпрост у аддзяленнях Дэпартамента міграцыі Літвы. Галоўнае патрабаванне — легальнае знаходжанне на тэрыторыі Літвы на момант падачы.
І паколькі за некаторымі рэдкімі выключэннямі Літва ўжо шмат гадоў не выдае візы грамадзянам Беларусі, то ў асноўным беларусы падаваліся на атрыманне літоўскага ДНЖ, маючы ў пашпарце дзейную нацыянальную або шэнгенскую візу іншай краіны.
Што зменіцца?
Фармальна ніякай забароны ці новых абмежаванняў на працаўладкаванне беларусаў у Літве і, адпаведна, атрыманне працоўных ДНЖ не з'явіцца, але дэ-факта рабіць гэта з 1 лістапада стане амаль немагчыма.
Усё праз тое, што па новых правілах, якія прынялі яшчэ ў маі, падаць хадайніцтва ў Дэпартамент міграцыі на атрыманне часовага ДНЖ на падставе працы або вучобы можна толькі пры наяўнасці:
- дзейнага ДНЖ або выдадзенай Літвой нацыянальнай візы;
- дзейнага ДНЖ іншай краіны ЕС або краіны Шэнгенскай зоны;
- або законных падстаў для бязвізавага знаходжання.
Гэта азначае, што замежнікі, якія прыедуць у Літву з шэнгенскай візай або нацыянальнай візай іншай дзяржавы пасля 1 лістапада 2026 года, не змогуць падаць хадайніцтва аб выдачы дазволу на пражыванне ў Літве на падставе працы або навучання праз Дэпартамент міграцыі.
Ці ёсць альтэрнатыва?
У такіх выпадках грамадзяне замежных дзяржаў павінны будуць звярнуцца наконт выдачы дазволаў на пражыванне ў Літве ў цэнтры знешняга абслугоўвання VFS Global.
Але ў Беларусі атрымаць літоўскі ДНЖ праз VFS Global немагчыма. З 1 снежня 2024 года падаваць дакументы на атрыманне літоўскага ДНЖ за выключэннем высокакваліфікаваных спецыялістаў (Blue Card) і некаторых іншых выпадкаў, маюць права толькі грамадзяне той краіны, дзе знаходзіцца такі цэнтр.
То-бок умоўны айцішнік ці іншы высокакваліфікаваны спецыяліст з Беларусі, які адпавядае патрабаванням для атрымання літоўскага ДНЖ тыпу Blue Card, можа без візы прыляцець у Грузію ці Казахстан і там падаць дакументы на атрыманне ДНЖ (Blue Card), а звычайны дальнабойшчык ці будаўнік — не.
З улікам усіх гэтых абставін вынікае, што шэраговая працоўная міграцыя з Беларусі ў Літву неўзабаве стане фактычна немагчымай, таму можна меркаваць, што колькасць беларусаў з дзейнымі літоўскімі ДНЖ пачне скарачацца яшчэ хутчэй.
Па стане на 1 верасня 2026 года грамадзяне Беларусі мелі 47 872 дзейныя ДНЖ усіх тыпаў. З іх 33 203, ці амаль 70%, прыпадалі менавіта на працоўныя ДНЖ, выдадзеныя на падставе звычайнай працы.
Гэта ставіць грамадзян Беларусі на першае месца ў Літве па колькасці працоўных ДНЖ. Таксама беларусы працягваюць займаць першае месца ў спісе высокакваліфікаваных спецыялістаў. На 1 верасня такіх налічвалася 2 677 чалавек.
Калі браць агулам, то на першым месцы па колькасці дзейных ДНЖ у Літве ідуць украінцы — 80 312 чалавек, беларусы з 47 872 займаюць другое месца, а на трэцім ідуць расіяне з 13 272 ДНЖ у Літве.
На піку літоўскі ДНЖ (любых тыпаў) мелі 62 844 грамадзяніны Беларусі. Так, паводле афіцыйных даных ад літоўскага Дэпартамента міграцыі, было па стане на 1 красавіка 2024 года. Аднак ужо больш за два гады гэтая лічба стабільна скарачаецца.
Каментары
Тут галоўнае усімі праўдамі ці не зачыніць магчымасьці для беларусаў і адпаведна маскалей
Уся лявацкая лухта пра "права на свабоднае перамяшчэньне праз межы" мусіць быць выкінута на сьметнік. Гібрыдная вайна ўжо ідзе. Людзі гінуць ад рук дыверсантаў.