«Мянты забралі сабе яго пашпарт, сала і трусы»: беларусы дзеляцца ў сацсетках фота з вызваленымі палітвязнямі

Франак Вячорка апублікаваў у сваім фэйсбуку фота з Ігарам Лосікам і падпісаў: «Наш герой вярнуўся!». У каментарах Ігару людзі масава зычаць шчасця.

Беларуская журналістка Алёна Дубовік, якая цяпер працуе шэф-рэдактаркай на «Ходорковский LIVE», падзялілася здымкам Паўла Вінаградава.

«Травіць мне турэмныя байкі. Перадае, што хутка ўстановім цялегу і можаце пісаць яму. Мабілу раздабылі, сімку мае. Настрой ок. Перад вызваленнем мянты забралі сабе яго пашпарт, сала і трусы», — напісала яна.

Былы палітвязень Віктар Пархімчык у каментарах пажартаваў, што цяпер, імаверна, нехта з сілавікоў ганяе ў трусах Паўла. «Ганяе» — гэта на турэмным слэнгу значыць «мастурбуе».

Праваабаронца Леанід Судаленка выклаў фота з Ларысай Шчыраковай: «Сустрэча амаль праз пяць гадоў! Нам ёсць аб чым гаманіць! З вызваленнем і дай бог табе моцы як мага хутчэй сябе знайсці! А мы табе будзем у гэтым дапамагаць».

Адзін з найбольш папулярных каментароў такі: «Ваш выхад на волю — як прамень сонца пасля доўгай і змрочнай ночы.

Вас спрабавалі пазбавіць дому, сустрэч з роднымі, таго, што для чалавека — самае дарагое. Але яны не змаглі адабраць галоўнага — Вашай моцы, Вашай веры і Вашай праўды. Нават калі дзверы роднай хаты зачыненыя, калі родныя абдымкі засталіся за мяжою, — ведайце: побач з Вамі шмат сэрцаў, што б’юцца ў такт з Вашым. Мы бачым у Вас сімвал стойкасці і годнасці, і таму цяпер кожны з нас — гэта крыху Ваша сям’я, крыху Ваш дом. Вы не адна. Ваша мужнасць збірае вакол сябе людзей, здольных на спачуванне, падтрымку і любоў. І тут, у бяспецы, ёсць прастора, дзе Вы зможаце дыхаць вольна, дзе Вас сустрэнуць з адкрытымі абдымкамі і дзе Вашае слова будзе пачутае. Хай гэтая новая дарога прынясе спакой і моц, хай светлых людзей на ёй будзе больш, чым ценяў мінулага. Мы разам з Вамі — у думках, у сэрцы, у дзеяннях».

Галоўная рэдактарка «Белсата» Аліна Коўшык апублікавала здымак з вызваленымі журналістамі: «Наш шчаслівы дзень! Белсатаўцы выйшлі з-за кратаў. Думкамі з Кацяй Андрэевай», — напісала яна.

Але ж былі і тыя, хто ўчора так і не пабачыў сярод вызваленых сваіх блізкіх.

Палітык Анатоль Лябедзька ўчора ездзіў на мяжу і сярод першых сустракаў вызваленых закладнікаў рэжыму Лукашэнкі.

Анатоль так і не пабачыў учора свайго сына Арцёма. Палітык апублікаваў яго фота з унучкай на руках: «Дзень, які рве цябе на кавалкі. Мой розум дакладна ведаў, што Арцёма няма сярод вызваленых. Але сэрца і пульс усё роўна біліся надзеяй чакання цуду…»

Вольга Такарчук, якая сама была палітзняволенай, пакінула допіс, ад якога сэрца рвецца на кавалкі:

«Чакаючы сёння спісы вызваленых людзей, я расплакалася. Гэта нагадала мне 2020 год, калі мы пад Акрэсціна ці дома маніторылі спісы затрыманых на маршах. Гэта страшна. Кожны спадзяецца… Тады спадзяваліся, што не ў спісах, зараз, што ў спісе. Тады мая мама шукала мяне ў спісах, сёння я з заміраннем сэрца шукала яе. Як жа ўсё змянілася… І зараз я падзяляю боль тых, хто не ўбачыў запаветныя імёны і прозвішчы сваіх блізкіх у спісах вызваленых. Гэта сапраўды балюча! Але тое, што адбываецца зараз, дае нам надзею, што вельмі хутка імёны ўсіх нашых палітвязняў будуць у гэтых запаветных спісах. Не адчайваемся, чакаем, верым і рыхтуемся да сустрэчы. Мне таксама балюча. Але боль не замяняе надзеі! Яны ідуць паралельна».

• 15
• 0
• 0
• 0
• 1
• 11
• 0
• 6