«Mianty zabrali sabie jaho pašpart, sała i trusy»: biełarusy dzielacca ŭ sacsietkach fota z vyzvalenymi palitviaźniami

Franak Viačorka apublikavaŭ u svaim fejsbuku fota ź Iharam Łosikam i padpisaŭ: «Naš hieroj viarnuŭsia!». U kamientarach Iharu ludzi masava zyčać ščaścia.

Biełaruskaja žurnalistka Alona Dubovik, jakaja ciapier pracuje šef-redaktarkaj na «Chodorkovskij LIVE», padzialiłasia zdymkam Paŭła Vinahradava.

«Travić mnie turemnyja bajki. Pieradaje, što chutka ŭstanovim cialehu i možacie pisać jamu. Mabiłu razdabyli, simku maje. Nastroj ok. Pierad vyzvaleńniem mianty zabrali sabie jaho pašpart, sała i trusy», — napisała jana.

Były palitviazień Viktar Parchimčyk u kamientarach pažartavaŭ, što ciapier, imavierna, niechta ź siłavikoŭ haniaje ŭ trusach Paŭła. «Haniaje» — heta na turemnym słenhu značyć «masturbuje».

Pravaabaronca Leanid Sudalenka vykłaŭ fota z Łarysaj Ščyrakovaj: «Sustreča amal praź piać hadoŭ! Nam jość ab čym hamanić! Z vyzvaleńniem i daj boh tabie mocy jak maha chutčej siabie znajści! A my tabie budziem u hetym dapamahać».

Adzin z najbolš papularnych kamientaroŭ taki: «Vaš vychad na volu — jak pramień sonca paśla doŭhaj i zmročnaj nočy.

Vas sprabavali pazbavić domu, sustreč z rodnymi, taho, što dla čałavieka — samaje darahoje. Ale jany nie zmahli adabrać hałoŭnaha — Vašaj mocy, Vašaj viery i Vašaj praŭdy. Navat kali dźviery rodnaj chaty začynienyja, kali rodnyja abdymki zastalisia za miažoju, — viedajcie: pobač z Vami šmat sercaŭ, što bjucca ŭ takt z Vašym. My bačym u Vas simvał stojkaści i hodnaści, i tamu ciapier kožny z nas — heta krychu Vaša siamja, krychu Vaš dom. Vy nie adna. Vaša mužnaść źbiraje vakoł siabie ludziej, zdolnych na spačuvańnie, padtrymku i luboŭ. I tut, u biaśpiecy, jość prastora, dzie Vy zmožacie dychać volna, dzie Vas sustrenuć z adkrytymi abdymkami i dzie Vašaje słova budzie pačutaje. Chaj hetaja novaja daroha pryniasie spakoj i moc, chaj śvietłych ludziej na joj budzie bolš, čym cieniaŭ minułaha. My razam z Vami — u dumkach, u sercy, u dziejańniach».

Hałoŭnaja redaktarka «Biełsata» Alina Koŭšyk apublikavała zdymak z vyzvalenymi žurnalistami: «Naš ščaślivy dzień! Biełsataŭcy vyjšli z-za krataŭ. Dumkami z Kaciaj Andrejevaj», — napisała jana.

Ale ž byli i tyja, chto ŭčora tak i nie pabačyŭ siarod vyzvalenych svaich blizkich.

Palityk Anatol Labiedźka ŭčora jeździŭ na miažu i siarod pieršych sustrakaŭ vyzvalenych zakładnikaŭ režymu Łukašenki.

Anatol tak i nie pabačyŭ učora svajho syna Arcioma. Palityk apublikavaŭ jaho fota z unučkaj na rukach: «Dzień, jaki rvie ciabie na kavałki. Moj rozum dakładna viedaŭ, što Arcioma niama siarod vyzvalenych. Ale serca i puls usio roŭna bilisia nadziejaj čakańnia cudu…»

Volha Takarčuk, jakaja sama była palitźniavolenaj, pakinuła dopis, ad jakoha serca rviecca na kavałki:

«Čakajučy siońnia śpisy vyzvalenych ludziej, ja raspłakałasia. Heta nahadała mnie 2020 hod, kali my pad Akreścina ci doma manitoryli śpisy zatrymanych na maršach. Heta strašna. Kožny spadziajecca… Tady spadziavalisia, što nie ŭ śpisach, zaraz, što ŭ śpisie. Tady maja mama šukała mianie ŭ śpisach, siońnia ja z zamirańniem serca šukała jaje. Jak ža ŭsio źmianiłasia… I zaraz ja padzialaju bol tych, chto nie ŭbačyŭ zapavietnyja imiony i proźviščy svaich blizkich u śpisach vyzvalenych. Heta sapraŭdy baluča! Ale toje, što adbyvajecca zaraz, daje nam nadzieju, što vielmi chutka imiony ŭsich našych palitviaźniaŭ buduć u hetych zapavietnych śpisach. Nie adčajvajemsia, čakajem, vierym i rychtujemsia da sustrečy. Mnie taksama baluča. Ale bol nie zamianiaje nadziei! Jany iduć paralelna».

• 15
• 0
• 0
• 0
• 1
• 11
• 0
• 6