Dzie Mikałaj Statkievič? Ź miažy jaho zabrali nieviadomyja ŭ maskach. Što viadoma na hety momant
Dakładnaje miesca znachodžańnia palityka Mikałaja Statkieviča, jaki vybiŭ dźviery aŭtobusa, što vioz jaho ź biełaruskaj turmy ŭ Litvu, dahetul zastajecca nieviadomym. «Faktyčna, jon paŭtaryŭ podźvih Maryi Kaleśnikavaj, paŭtaryŭ u zusim inšych umovach, kali bolš niama nadziei na chutkuju pieramohu, kali tvaja admova moža aznačać navat fizičnuju śmierć», — kaža Pavieł Barkoŭski.
69-hadovy eks-kandydat u prezidenty Mikałaj Statkievič apynuŭsia ŭ hrupie 52 palitviaźniaŭ — 38 biełarusaŭ i 14 hramadzian inšych krain, vyzvalenych z turmaŭ 11 vieraśnia pry pasiarednictvie ZŠA.
Uzamien za vyzvaleńnie hrupy zakładnikaŭ Łukašenka vytarhavaŭ źniaćcio sankcyj ZŠA z «Biełavii», što, u pryvatnaści, dazvolić jamu absłuhoŭvać i ramantavać prezidencki «Boinh».
51 palitviazień ciapier znachodzicca ŭ ES. Častka ź ich nie radaja vyzvaleńniu, bo heta dla ich nie pra svabodu, a pra prymusovuju, hvałtoŭnuju departacyju z rodnaj krainy biez prava na viartańnie, biez opcyi naviedać mohiłki rodnych.
Mikałaj Statkievič u svaim žadańni zastacca na radzimie byŭ radykalnym — jon vybiŭ dźviery ŭ aŭtobusie, jaki vioz jaho za miažu. Pakinuŭšy transpart, palityk zastaŭsia ŭ niejtralnaj zonie pamiž Biełaruśsiu i Litvoj.
Statkievič prabyŭ u niejtralnaj pałasie prynamsi niekalki hadzin — za hetym usie mahli nazirać, dziakujučy anłajn-kamieram Dziaržaŭnaha pamiežnaha kamiteta Biełarusi.
Pajechać u Litvu Statkieviča hety čas uhavorvali paplečniki, dypłamaty i rodnyja, ale jon zastaŭsia niepachisny ŭ svaim rašeńni.
Kiraŭnik partyi «Narodnaja Hramada» na emihracyi Jaŭhien Vilski kala piaci chvilin prasiŭ Mikałaja dałučycca da ŭsich asabista, davodziŭ, što jaho mocna čakajuć, ale i heta nie dapamahło.
«Statkievič nastrojeny vielmi rašuča, jon razumieje svaju rolu i hatovy adyhrać jaje da kanca. Vyjści jon źbirajecca tolki tady, kali Biełaruś budzie volnaja ad ułady Łukašenki, a ciapier choča znachodzicca sa svaim narodam u lubych umovach. Fizična 69-hadovy palityk vyhladaje źniasilena, vielmi chudy, ale ducham badziory i ŭśmichajecca, jaho nie złamali. Biełarusam jon prasiŭ pieradać, kab trymalisia i zmahalisia», — raspavioŭ Jaŭhien Vilski litoŭskim žurnalistam.
Taksama jon bačyŭ, što paśla taho, jak Statkievič pačaŭ ruchacca ŭ bok Biełarusi, jaho zabrali ludzi ŭ maskach, jakija da hetaha znachodzilisia pobač. Ananimusy źvieźli palityka ŭ nieviadomym nakirunku.
Pradstaŭnik Słužby achovy dziaržaŭnaj miažy Litvy Hiedrus Mišucis paćvierdziŭ hetuju infarmacyju: «Jon znachodziŭsia na tym baku i ŭ Litvu nie pierachodziŭ, sprobaŭ pierasiekčy miažu nie było. Ciapier jaho ŭžo niama, tamu što jon pajšoŭ uhłyb punktu. Jaho supravadžali niekalki biełaruskich słužačych, ale jon išoŭ sam».
Hetyja śviedčańni ludziej ź miesca padziej całkam asprečvajuć fejki prapahandy, jakaja adrazu pačała raskidvać dezinfarmacyju, maŭlaŭ, Statkievič «vypiendryvaŭsia niekalki hadzin, a paśla zdrysnuŭ u Litvu».
Mikoła Statkievič byŭ aryštavany jašče da vybaraŭ 2020 hoda.
Kandydata ŭ prezidenty — 2010 utrymlivali ŭ režymie inkamunikada ŭ hłybockaj kałonii dla recydyvistaŭ. Dva hady i 7 miesiacaŭ jon znachodziŭsia ŭ režymie inkamunikada ŭ hłybockaj turmie — pra jaho los nie było viadoma navat svajakam, bo ad Mikałaja nie dalatała nivodnaj viestački.
Jaho ŭčynak pry ŭsich ryzykach dla zdaroŭja (Statkievič užo ciapier mocna chudy) biełarusy nazyvajuć pa-sapraŭdnamu hieraičnym.
«Adno dziejańnie — nul łozunhaŭ. Palityk numar adzin u Biełarusi prosta zaraz. Navat kali patencyjna. Na movie kultury heta časam nazyvajuć «pieravarot hulni»», — napisaŭ fatohraf Siarhiej Hudzilin.
«Čałaviek niejmaviernaj advahi. Faktyčna jon paŭtaryŭ podźvih Maryi Kaleśnikavaj, paŭtaryŭ u zusim inšych umovach, kali bolš niama nadziei na chutkuju pieramohu, kali tvaja admova moža aznačać navat fizičnuju śmierć (pamiatajem pra palityčnyja zabojstvy 1999 h. i toje, što ŭzurpatar zdolny addavać padobnyja zahady). Heta całkam inšy ŭzrovień samaasensavańnia, jaki naturalna nie źjaŭlajecca paprokam tym, chto prosta byŭ rady vyzvalicca z-za muroŭ i nie rabiŭ ź siabie hieroja. Ale toje, što Čałaviek zdolny adstojvać svoj vybar, navat pierad tvaram śmierci, mianie mocna ŭražvaje», — razvažaje fiłosaf, pradstaŭnik pa nacyjanalnym adradžeńni APK Pavieł Barkoŭski.
«Dla Statkieviča heta ŭžo žyćciovy kryž, misija. Heta nie zmahańnie za ŭładu, za, prabač boža, hranty. Žyćcio pražyŭ u zmahańni, dočki darosłyja. Zdavacca ciapier? U samym kancy ci samym pačatku? Dzie my ciapier, skazać składana. Jość tolki šlach i pryncypy», — ličyć pradprymalnik Ivan Šyła.
«Statkievič — sapraŭdny aficer»; «Heta vam nie Zianon P., jaki ŭsio žyćcio ckavaŭ Statkieviča i nazyvaŭ ahienturaj, a sam zvaliŭ z krainy pry pieršaj niebiaśpiecy»; «Statkievič — paśladoŭny ŭ svaich pryncypach. Voś tamu jon zubr. Jaho pryncyp — nie prahinacca pad łukašenkaŭskaje biaźmiežža. Departavać hramadzian z krainy za toje, što jany majuć inšuju dumku — «biespriedieł». Kali niama inšaj mahčymaści heta dakazać jon vyrašyŭ tak», — nie chavali zachapleńnia inšyja biełarusy ŭ sacsietkach.
Ciapier zastajecca tolki spadziavacca na toje, što ź Mikałajem usio budzie dobra i my daviedajemsia pra jaho los paśla źniknieńnia z kamier Dziaržkamiteta.
Ciapier čytajuć
Asudzili mazyrskaha błohiera Union Bell. Chłopiec niekalki hadoŭ chavaŭsia, ale paśla aryštu baćki byŭ vymušany źviarnucca ŭ balnicu8
Asudzili mazyrskaha błohiera Union Bell. Chłopiec niekalki hadoŭ chavaŭsia, ale paśla aryštu baćki byŭ vymušany źviarnucca ŭ balnicu
«Ja suprać. Movy, jakija pakinuli paśla siabie kałanizatary ŭ Afrycy, stali šlacham da cyvilizacyi». Aleksijevič adkazała, jak stavicca da admovy ad ruskaj movy va Ukrainie8888
Kamientary