Дэмакраты апублікавалі запіску Эпштэйну, сцвярджаюць, што пад ёй подпіс Трампа
Дэмакраты ў Кангрэсе апублікавалі запіску з віншаваннем педафілу Джэфры Эпштэйну з 50-годдзем, падпісаную, як яны сцвярджаюць, цяперашнім прэзідэнтам ЗША Дональдам Трампам, піша Бі-бі-сі.
Юрысты, якія кіруюць маёмасцю Эпштэйна, перадалі дакументы, запатрабаваныя Камітэтам па наглядзе Палаты прадстаўнікоў у мінулым месяцы. Пасля гэтага дэмакраты — члены камітэта ў панядзелак апублікавалі копію ліста ў сетцы X.
Белы дом заявіў, што подпіс пад лістом не належыць Трампу. У ліпені, калі газета Wall Street Journal упершыню напісала пра існаванне гэтай запіскі, Трамп назваў публікацыю фэйкам і заявіў, што нічога падобнага не пісаў.
Трамп падаў пазоў аб паклёпе супраць газеты, аўтараў артыкула, выдаўца газеты, яе кіраўніцтва і канчатковага ўладальніка WSJ — Руперта Мэрдака.
«Прэзідэнт Трамп не маляваў гэты малюнак і не падпісваў яго, — заявіла ў панядзелак прэс-сакратарка Белага дома Кэралайн Левіт. — Адвакатская каманда прэзідэнта Трампа будзе рашуча працягваць судовае разбіральніцтва».
У запісцы напісана: «З днём нараджэння — і няхай кожны дзень становіцца цудоўнай таямніцай».
Намеснік кіраўніка апарату Белага дома Тэйлар Будовіч у панядзелак выклаў у X некалькі ўзораў подпісу прэзідэнта, дадаўшы, што подпіс пад запіскай падроблены, і зноў абвінаваціў выдаўцоў WSJ у дыфамацыі.
Як пісала газета, запіска ўваходзіла ў альбом з віншаваннямі Эпштэйну з днём нараджэння ад яго сяброў. Альбом падрыхтавала ў 2003 годзе ягоная саўдзельніца Гіслейн Максвел.
Трамп і Эпштэйн сябравалі на працягу многіх гадоў, але ў сярэдзіне 2000-х, як казаў Трамп, пасварыліся.
У 2019 годзе Эпштэйн памёр у турэмнай камеры ў чаканні суда; улады штата Нью-Ёрк прыйшлі да высновы, што ён скончыў жыццё самагубствам.
Цяпер чытаюць
У 2021 годзе выпускніца адмовілася паціснуць руку Гігіну на ўручэнні дыплома. Цяпер БДУ не хоча яго пацвярджаць9
Каментары