Уладлена Зайцава суправаджае Лукашэнку не толькі на балах, але і, падобна, у замежных паездках. Калісьці «афіцэр» Зайцава працавала на мытні, але пасля конкурсу «Міс Беларусь» многае змянілася.
Сям'я Уладлены даволі простая. Маці працавала на «Магілёўхімвалакно», бацька даслужыўся да капітана міліцыі, але ў 2003 годзе трапіў пад скарачэнне. Пасля працаваў у розных месцах — быў начальнікам аховы (такія даныя ў базах «Белпола»).
Сама Уладлена скончыла Магілёўскі дзяржаўны ўніверсітэт імя Аркадзя Куляшова.
У 2020 годзе працаўладкавалася ў Магілёўскую абласную філармонію.
Адначасова дзяўчына займалася ў Таццяны Палазковай — кіраўніцы Цэнтра моды і Творчага цэнтра ў Магілёве. Там жа рыхтуюць прыгажунь да афіцыйных мерапрыемстваў. Палазкова вучыць даўганогіх і стройных дзяўчат выносіць чыноўнікам кветкі ці сустракаць Лукашэнку ў рэгіёнах хлебам-соллю.
Уладлена таксама была на розных ідэалагічных мерапрыемствах — дзесьці трэба ў нацыянальным строі пастаяць, дзесьці перадаць чыноўніку сімвалічны ключ ад новай паліклінікі.
У 2021 годзе Уладлена перайшла працаваць на мытню. Тады ж дзяўчына паўдзельнічала ў конкурсе «Міс Беларусь».
У выніку яна засталася без кароны каралевы, але праз некалькі месяцаў прыгажуні даручылі танчыць з Лукашэнкам на Рэспубліканскім балі моладзі. Потым яны не аднойчы з’яўляліся разам на публіцы.
Пасля таго конкурсу Уладлена змяніла месца працы — перайшла ў Нацыянальную школу прыгажосці. Летам 2022 года ў яе працоўнай кніжцы з’явіўся новы запіс — Адміністрацыя Лукашэнкі. Менавіта там, згодна з базай «Кіберпартызанаў», і па сёння афіцыйна працуе Уладлена.
Уладлена любіць брэндавыя рэчы. На інаўгурацыю Лукашэнкі сёлета яна прыйшла з белай класічнай сумачкай Chanel. Мініяцюрны аксэсуар з мяккай скуры і ланцужковым рамнём каштуе цяпер у фірмовай краме ад 5 да 7 тысяч еўра (залежыць ад памеру і матэрыялу — напрыклад, скура ягняці або цялячая скура).
Для гэтага ж мерапрыемства дзяўчына выбрала блузку італьянскага брэнда класа люкс Elisabetta Franchi. Першапачаткова такая каштавала каля 400 еўра.
Час ад часу на Уладлене можна пабачыць рэчы і з мас-маркету. Напрыклад, для прагулкі ля Опернага тэатра цёплым майскім днём яна выбрала майку ад расійскага брэнда «Твоё». Але сонечныя акуляры — Jimmy Choo, такія каштуюць такія каля 400 даляраў.
На фота, на якім Уладлена абедае ў рэстаране «Кантраст», на тонкім запясці дзяўчыны можна пабачыць гадзіннік, падобна, швейцарскага прэміяльнага брэнда TAG Heuer, лімітаванай калекцыі 2020 года. Кошт на такую мадэль у фірмовых буціках і ў афіцыйных дылераў даходзіў да 4 тысяч еўра.
Калі-некалі дзяўчына носіць і мерч Лукашэнкі — напрыклад, кепку з яго цытатай.
Сярод хобі Уладлены — катанне на горных лыжах. Сёлета яна выклала здымак з горналыжнага курорту ва Узбекістане. Для актыўнага адпачынку дзяўчына выбрала куртку нямецкага брэнда прэміум-класа Bogner. Цяпер такая каштуе ад 1700 еўра.
У вольны час Уладлена таксама грае ў квізы, спявае ў караоке і бывае з сяброўкамі на канцэртах. Напрыклад, у маі танчыла пад «Руки вверх».
Мяркуючы па сацыяльных сетках Зайцавай, яна даволі часта суправаджае Лукашэнку ў паездках — нават калі не трапляе ў аб’ектывы дзяржаўных СМІ. Так, восенню 2022 года Уладлена, падобна, была побач з палітыкам падчас яго першага афіцыйнага візіту ў Абхазію.
А сёлета дзяўчына была з ім у Маскве на парадзе 9 мая і здымала відэа, як Лукашэнка вітае беларускіх вайскоўцаў. Супадзенне ці не, але і ў Кітай Уладлена сёлета трапіла.
Каментары