У «Паўночным беразе» анансавалі хуткі старт продажу кватэр у новабудоўлі Lake Views. Дом трапіў у катэгорыю калекцыйных, таму ўмовы куплі квадратаў у ім, мякка кажучы, нестандартныя.
Каб запісацца на прагляд кватэры з чарнавым аздабленнем і трохметровымі столямі, пакупніку давядзецца ўнесці дэпазіт у 7 тысяч рублёў, піша Onliner.by.
Забудоўшчык пакуль не раскрывае ўсю інфармацыю пра новабудоўлю Lake Views, але відавочна, што цікавасць да яе ўжо падсілкаваная. Пра дом вядома толькі тое, што ён уведзены ў эксплуатацыю і мае пераменную паверхавасць: ад 6 да 8 узроўняў. Паводле праекта, у яго ёсць уласны двор на стылабаце. За кожнай кватэрай замацавана асобнае парковачнае месца.
Новабудоўля прапісалася на першай берагавой лініі Цнянскага вадасховішча. Каб на свае вочы ўбачыць усю гэтую прыгажосць знутры, будзьце гатовыя выкласці за прагляд 7 тысяч рублёў.
— Гэта зваротны дэпазіт, які мы будзем прасіць размясціць у нашым банку-партнёры, — тлумачыць начальнік аддзела маркетынгу «Паўночнага берага» Ларыса Фішман.
— Толькі пасля размяшчэння дэпазіту будзе ажыццяўляцца запіс на кансультацыю па калекцыйных дамах. Lake Views — гэта першы калекцыйны дом катэгорыі ультрапрэміум у «Паўночным беразе». Продажы гэтага дома таксама будуць ажыццяўляцца толькі пасля таго, як патэнцыйны пакупнік размесціць дэпазіт у памеры 7000 беларускіх рублёў.
Пры куплі кватэры дэпазіт закрываецца і можа быць залічаны ў аплату дамовы. Калі здзелка не была здзейснена, грошы можна будзе зняць у любы момант. Пасля размяшчэння дэпазіту і абвяшчэння старту продажаў мы запісваем патэнцыйнага пакупніка на прагляд кватэр і агучваем цэны.
Па словах Ларысы Фішман, гэта новы фармат на сталічным рынку нерухомасці, але кватэры сапраўды ўнікальныя.
— Такога блізкага размяшчэння да вады практычна няма нідзе ў Мінску. Акрамя таго, дом з трохметровымі столямі, паркінгам, кладоўкамі і прыватным дваром на стылабаце. Мы хочам, каб старт продажу прайшоў у максімальна прыватным фармаце для будучых пакупнікоў, — падсумавала начальнік аддзела маркетынгу.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец81
Каментары