Улады Ірана схапілі сотні чалавек па падазрэнні ў шпіянажы на Ізраіль. Пяцёра ўжо пакараныя
За апошнія дзве тыдні, з пачатку ірана-ізраільскай вайны, у Іране арыштавалі больш за 700 чалавек, падазраваных у сувязях з Ізраілем, паведамляюць іранскія дзяржаўныя СМІ. З мінулай нядзелі павесілі пяць чалавек, трое з іх — у сераду раніцай. Іранскія ўлады называюць іх «агентамі «Масада», піша Бі-бі-сі.
«З пачатку атакі Ізраіля на Іран шпіёнская сетка сіянісцкага рэжыму ў краіне надзвычайна актывізавалася», — піша іранскае агенцтва Fars News.
Іншае агенцтва, Mizan, што спецыялізуецца на навінах судовай сістэмы краіны, апублікавала імёны траіх пакаранных. Гэта Ідрыс Алі, Азад Шаджаі і Расул Ахмад Расул.
Яшчэ два чалавекі — Махамад-Амін Махдаві Шайстэх і Маджыд Мусайбі — былі пакараны адпаведна ў мінулую нядзелю і панядзелак. Паводле звестак СМІ, усе яны былі асуджаны за «супрацоўніцтва на карысць сіянісцкага рэжыму», у прыватнасці, за кантрабанду абсталявання, якое пазней выкарыстоўвалася для забойства неназваных высокапастаўленых асоб.
Смяротнае пакаранне ў сераду стала першым выкананым прысудам пасля таго, як Іран і Ізраіль абвясцілі пра спыненне агню. Яно адбылося ў горадзе Урмія на паўночным захадзе Ірана, недалёка ад мяжы з Турцыяй, паведамілі іранскія судовыя органы.
Тэгеран рэгулярна абвяшчае пра арышт і пакаранне агентаў, падазраваных у працы на замежныя разведслужбы, у тым ліку «Масад».
Пасля таго, як 13 чэрвеня Ізраіль нанёс першы ўдар па іранскіх ядзерных аб’ектах, Тэгеран паабяцаў хуткія судовыя працэсы над усімі, хто падазраецца ў супрацоўніцтве з ворагам.
На думку многіх экспертаў, пасля ўражальных поспехаў «Масада» на тэрыторыі Ірана і поўнага правалу іранскіх спецслужбаў, сведкам чаго два тыдні таму стаў увесь свет, іранскаму рэжыму не застаецца нічога, як хаця б у нечым прадэманстраваць свой кантроль над сітуацыяй.
Не выключана, што многія з 700 арыштаваных у бліжэйшы час стануць ахвярамі расправы.
Паводле звестак розных праваабарончых груп, уключаючы Amnesty International, Іран займае другое месца ў свеце па колькасці смяротных пакаранняў у год пасля Кітая.
Як праходзяць арышты
Маштаб арыштаў — каля 700 чалавек менш чым за дзве тыдні па ўсёй краіне — сведчыць пра тое, што на пошук агентаў «Масада» акрамя спецслужбаў кінуты ўсе магчымыя сілы, у тым ліку добраахвотныя ваенізаваныя фарміраванні.
Паводле звестак Financial Times, адно з такіх фарміраванняў — «Басідж», напрыклад, дзейнічае ў прыгарадах Тэгерана.
Бойцы «Басіджа» кантралююць дарогі, усталёўваюць часовыя КПП і даглядаюць транспарт.
«Цяпер на пад’ездах да горада можна ўбачыць кантрольна-прапускныя пункты, арганізаваныя «Басіджам», чаго не было да гэтай вайны з Ізраілем», — сказаў іранскі вадзіцель у каментарыі FT.
«У асноўным яны спыняюць усёдарожнікі, фургоны і грузавікі і старанна аглядаюць іх на прадмет выбухоўкі або кампанентаў беспілотнікаў», — распавёў ён.
Крыніцы FT паведамляюць, што арыштаваныя — у асноўным грамадзяне Ірана і Афганістана, сярод іх шмат вадзіцеляў грузавікоў і таксама шмат беспрацоўных.
Улады Ірана перакананыя, што агентурная сетка «Масада» падтрымлівала ізраільскія авіяўдары з зямлі разведданымі пра месцазнаходжанні цэляў і кантрабандай кампанентаў беспілотнікаў, выбуховых рэчываў і іншых інструментаў для ажыццяўлення дыверсій на месцы.
У Маскве мужчыны масава спрабуюць знаёміцца, мацаючы дзяўчат за ягадзіцы. Так загадаў рабіць сэкс-коўч з Беларусі8
Каментары