МУС Польшчы: Апастыль на дакументах для беларусаў не патрэбны ў любым выпадку. ЗАГСы ўсё няправільна зразумелі
МУС Польшчы пракаментавала сітуацыю з апастылямі, якая выклікала рэзананс сярод беларусаў. Высветлілася, што ніякіх новых правілаў міністэрства не ўводзіла, піша «Белсат».
У прэс-службе Міністэрства ўнутраных спраў і адміністрацыі Польшчы пракаментавалі інфармацыю аб нібыта забароне для ЗАГСаў прымаць у беларусаў дакументы на бланках БССР ці СССР без апастыляў.
У МУС заявілі, што ніякіх новых рашэнняў не прымалі. А проста даслалі тлумачэнне, што рабіць, калі дакумент выклікае сумневы.
«МУС не прымала рашэння па гэтым пытанні. Наадварот, мы накіравалі дырэктарам аддзелаў грамадзянскіх спраў і раўназначных ваяводскіх упраўленняў інфармацыйны ліст, які тычыцца дакументаў грамадзянскага стану, выдадзеных, сярод іншага, установамі былога СССР і БССР», — заявілі ў прэс-службе міністэрства.
У МУС патлумачылі, што ЗАГСы, верагодна, няправільна зразумелі распараджэнне. Згодна з адказам, кіраўнік польскага ЗАГСа, толькі калі ён сумняваецца ў сапраўднасці канкрэтнага дакумента, можа запытаць яго пацвярджэнне, напрыклад, апастыль.
«Беларускія дакументы павінны ацэньвацца так жа, як і раней, і апастыль не павінен запытвацца ў любым выпадку (кіраўнік ЗАГСа павінен ацэньваць пададзены яму дакумент у кантэксце выкананай працэдуры)», — адзначылі ў МУС.
У міністэрстве паабяцалі даслаць яшчэ адзін ліст ваяводам, але ўжо так, каб там усё зразумелі правільна. У МУС падкрэслілі, што «бежанцы з Беларусі могуць заўсёды разлічваць на нашу падтрымку ў Польшчы, ім аказваецца абарона і неабходная дапамога».
Нагадаем, на тыдні беларусы сталі масава скардзіцца на тое, што ў польскіх ЗАГСах для рэгістрацыі больш не прымаюць дакументы часоў СССР і БССР, а таксама новыя дакументы без апастыляў. Чыноўнікі спасылаліся на распараджэнне ад МУС.
Каментары
Ад любой навіны мусяць бяжаць, займаць чаргу