MUS Polščy: Apastyl na dakumientach dla biełarusaŭ nie patrebny ŭ lubym vypadku. ZAHSy ŭsio niapravilna zrazumieli
MUS Polščy prakamientavała situacyju z apastylami, jakaja vyklikała rezanans siarod biełarusaŭ. Vyśvietliłasia, što nijakich novych praviłaŭ ministerstva nie ŭvodziła, piša «Biełsat».
U pres-słužbie Ministerstva ŭnutranych spraŭ i administracyi Polščy prakamientavali infarmacyju ab nibyta zabaronie dla ZAHSaŭ prymać u biełarusaŭ dakumienty na błankach BSSR ci SSSR biez apastylaŭ.
U MUS zajavili, što nijakich novych rašeńniaŭ nie prymali. A prosta dasłali tłumačeńnie, što rabić, kali dakumient vyklikaje sumnievy.
«MUS nie prymała rašeńnia pa hetym pytańni. Naadvarot, my nakiravali dyrektaram adździełaŭ hramadzianskich spraŭ i raŭnaznačnych vajavodskich upraŭleńniaŭ infarmacyjny list, jaki tyčycca dakumientaŭ hramadzianskaha stanu, vydadzienych, siarod inšaha, ustanovami byłoha SSSR i BSSR», — zajavili ŭ pres-słužbie ministerstva.
U MUS patłumačyli, što ZAHSy, vierahodna, niapravilna zrazumieli rasparadžeńnie. Zhodna z adkazam, kiraŭnik polskaha ZAHSa, tolki kali jon sumniavajecca ŭ sapraŭdnaści kankretnaha dakumienta, moža zapytać jaho paćviardžeńnie, naprykład, apastyl.
«Biełaruskija dakumienty pavinny aceńvacca tak ža, jak i raniej, i apastyl nie pavinien zapytvacca ŭ lubym vypadku (kiraŭnik ZAHSa pavinien aceńvać padadzieny jamu dakumient u kantekście vykananaj pracedury)», — adznačyli ŭ MUS.
U ministerstvie paabiacali dasłać jašče adzin list vajavodam, ale ŭžo tak, kab tam usio zrazumieli pravilna. U MUS padkreślili, što «biežancy ź Biełarusi mohuć zaŭsiody raźličvać na našu padtrymku ŭ Polščy, im akazvajecca abarona i nieabchodnaja dapamoha».
Nahadajem, na tydni biełarusy stali masava skardzicca na toje, što ŭ polskich ZAHSach dla rehistracyi bolš nie prymajuć dakumienty časoŭ SSSR i BSSR, a taksama novyja dakumienty biez apastylaŭ. Čynoŭniki spasyłalisia na rasparadžeńnie ad MUS.
Kala 19 tysiač kamier płanujuć ustalavać kala minskich padjezdaŭ. Heta amal u 10 razoŭ bolš, čym ciapier3
Kamientary
Ad luboj naviny musiać biažać, zajmać čarhu