Сябар маладосці Лукашэнкі застаўся кіраўніком федэрацыі гандбола. Ён кіруе з 2006 года
Уладзімір Канаплёў застанецца на чале федэрацыі як мінімум да 2029 года.
Уладзімір Канаплёў застанецца кіраўніком Беларускай федэрацыі гандбола яшчэ як мінімум чатыры гады. За яго пераабранне справаздачна-выбарная канферэнцыя федэрацыі прагаласавала аднагалосна — 92 дэлегаты выступілі «за».
Канаплёў узначальвае федэрацыю з 2006 года. Ніхто іншы з беларускіх спартыўных функцыянераў не можа пахваліцца такім апаратным доўгажыхарствам.
На канферэнцыі кіраўнік БФГ заявіў, што працэс развіцця гандбола ў Беларусі праходзіць упэўнена. Зборныя і клубныя каманды прымаюць удзел у міжнародных турнірах.
Але пад міжнароднымі турнірамі ён мае на ўвазе матчы, галоўным чынам, са зборнымі Расіі. Усе беларускія каманды пасля пачатку поўнамаштабнай вайны былі адхіленыя ад міжнародных спаборніцтваў.
Канаплёў сцвярджае, што кіраўнікі Міжнароднай і Еўрапейскай федэрацый прымаюць намаганні для вырашэння пытанняў аб допуску беларускіх каманд і паслалі свае прывітанні ўдзельнікам канферэнцыі.
Уладзімір Канаплёў быў шклоўскім участковым і сябрам маладосці Лукашэнкі. Ён быў памочнікам палітыка, калі той працаваў дэпутатам Вярхоўнага Савета, арганізоўваў выбарчую кампанію Лукашэнкі ў 1994 годзе. Пасля яго перамогі Канаплёў стаў нефармальна другім чалавекам у краіне.
«Наша Ніва» расказвала, што ў нейкі момант Канаплёў настолькі паверыў у сябе, што вырашыў стаць прэзідэнтам. Ён пачаў фармаваць групоўку і нават з’ездзіў у Маскву на агледзіны. Але Лукашэнка гэтую ініцыятыву задушыў, саюзнікаў свайго сябра пасадзіў, а сам Канаплёў пайшоў з пасады спікера Палаты прадстаўнікоў і апынуўся ў апале. Але пост кіраўніка БФГ захаваў.
У 2013 годзе Канаплёў нават трапіў у СІЗА па справе намесніка генпракурора Аляксандра Архіпава. На судзе ён абышоўся штрафам, але атрымаў кляймо судзімага. А ўжо ў 2022 годзе крыніцы «Нашай Нівы» гаварылі, што Лукашэнка вярнуў Канаплёва ў фавор. Аднак пасаду ў сістэме ён з тых часоў так і не атрымаў.
Цяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос1
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1414
Каментары