ЗША заўтра прапануюць Украіне і Еўропе прызнаць Крым расійскім — The Washington Post
Украінскія і еўрапейскія чыноўнікі, якія прыедуць у сераду на перамовы ў Лондан, сутыкнуцца з ціскам ЗША з мэтай дабіцца прызнання анексіі Крыма Расіяй і замарожвання лініі фронту ў рамках мірнага пагаднення. Пра гэта піша The Washington Post на падставе сведчанняў некалькіх крыніц, знаёмых з унутранымі абмеркаваннямі.
Паводле сведчання трох асоб, знаёмых з прапановамі ЗША, прадстаўленых Украіне ў Парыжы на мінулым тыдні, яны ўключаюць у сябе афіцыйнае прызнанне Крыма расійскай тэрыторыяй і паступовае зняцце санкцый супраць Расіі па будучай дамове. Узамен Масква павінна спыніць баявыя дзеянні ва Украіне ў той момант, калі яна мае перавагу ў сілах і ўзбраенні.
Прадстаўнік прэзідэнта Украіны Уладзіміра Зяленскага заявіў, што ў прапановах ЗША ёсць як такія ідэі, з якімі Кіеў згодны, так і такія, якія для яго непрымальныя. Але адзін заходні чыноўнік назваў ціск, які аказваецца на Украіну, «ашаламляльным».
Чыноўнік Дзярждэпартамента ЗША, праўда, не пацвярджае таго, што Вашынгтон навязвае Кіеву гатовую дамову, але ўсё больш публічнае незадаволенне адміністрацыі Трампа тэмпамі перамоў выклікае ў Кіева трывогу адносна магчымага пагаршэння адносін з ЗША. Па меры таго як перамовы набіраюць тэмп, прадстаўнікі ЗША пагражаюць выйсці з іх у найбліжэйшыя дні, і ціск на Кіеў узрастае.
Французскія, брытанскія і нямецкія перамоўшчыкі, якія актыўна ўдзельнічаюць у працэсе, будуць дамагацца ўключэння у дамову гарантый бяспекі для Украіны і праграм яе пасляваеннага аднаўлення. Часткова гэта можа быць фінансавана за кошт замарожаных расійскіх актываў.
Еўрапейскія і нават украінскія чыноўнікі прызнаюць, што Кіеў наўрад ці зможа неўзабаве вярнуць тэрыторыі, кантраляваныя Расіяй. Максімум, на што яны спадзяюцца — гэта стрымаць спробы зафіксаваць захопленыя землі за Расію і вызваліць апошнюю ад санкцый без істотных выгод для Украіны.
«Ёсць небяспека, што Трамп спрабуе прымусіць украінцаў пайсці на саступкі і не дзейнічае дастаткова жорстка ў дачыненні да Расіі, — сказаў Муджтаба Рахман, дырэктар Eurasia Group. — Асноўнае пытанне цяпер — што атрымае Украіна ўзамен за частковую страту сваёй тэрыторыі?»
Прапановы былі прадстаўлены ў Парыжы на мінулым тыдні і, па словах дзвюх асоб, Кіеў успрыняў іх як апошнюю прапанову Вашынгтона перад магчымым выхадам ЗША з мірнага працэсу.
Праўда, у апошні час атрымалі магчымасць уплываць на ход перамоў еўрапейскія лідары. І ў Еўропы ёсць рычагі ўплыву: мільярды замарожаных расійскіх актываў, якія могуць быць выкарыстаныя для фінансавання аднаўлення. Еўрасаюз таксама можа ўзмацніць санкцыі супраць Расіі праз каардынаваную палітыку.
«У еўрапейцаў ёсць рэальныя казыры, — адзначыў Рахман. — Калі Расія атрымае зняцце санкцый толькі з боку ЗША, без ЕС — гэта не дасць ёй вялікіх эканамічных выгод».
Паказалі партрэт Трампа, які яму ў сакавіку падарыў Пуцін
Трамп паабяцаў раскрыць дэталі «мірнага пагаднення» паміж Расіяй і Украінай на працягу трох дзён
ЗША прапанавалі Кіеву прызнаць Крым расійскім і адмовіцца ад уступлення ў НАТА — WSJ
Трамп: Спадзяюся, Расія і Украіна дасягнуць пагаднення на гэтым тыдні
Пасланнік Трампа Уіткаф зноў можа наведаць Расію на гэтым тыдні
Каментары