Вытворца папулярнай газіроўкі пайшоў з Расіі пасля пачатку поўнамаштабнай вайны. Але Coca-Cola вяртаецца на прылаўкі крам.
Расія пачала закупляць напоі Coca-Cola, Fanta і Sprite, а таксама энэргетыкі ў рэжыму талібаў у Афганістане.
Пасол Расіі ў Кабуле Дзмітрый Жырноў расказаў пра эканамічнае супрацоўніцтва з Талібанам.
«Расія купляе афганскія спецыі, газаваныя і энэргетычныя напоі, лекавыя травы — лаванду, чабор, салодку. Ну і казаны, вядома, для плову», — расказаў Жырноў РІА «Новости».
Галоўнымі артыкуламі экспарту Афганістана ў Расію з'яўляюцца сухафрукты і разынкі. Талібы таксама наладзілі вываз у Расію хромавых рудаў і канцэнтратаў, мінералаў, рубінаў і ізумрудаў. Паводле слоў пасла, гэта шостая частка імпарту.
На расійскіх маркетплэйсах ужо можна знайсці арыгінальную прадукцыю Coca-Cola з Афганістана. Першы завод Coca-Cola ў краіне пачаў працаваць яшчэ ў 2006 годзе. Яго адкрыў экс-прэзідэнт Афганістана Хамід Карзай. Прадпрыемствам, на якім выраблялася да 120 млн бутэлек газаваных напояў у год, валодала мясцовая кампанія Habib Gulzar Non-Alcoholic Beverages Ltd.
Пасля пачатку поўнамаштабнай вайны Расіі супраць Украіны The Coca-Cola Company згарнула бізнэс у Расіі і прыпыніла продаж сваёй прадукцыі ў краіне. Расійскае падраздзяленне змяніла назву і запусціла вытворчасць напою «Добрый Cola». Яго рэцэптура і смак адрозніваюцца ад арыгінала.
Талібан, які захапіў уладу ў Афганістане пасля сыходу адтуль амерыканскіх войскаў у 2021 годзе, у Расіі дагэтуль лічыцца тэрарыстычнай арганізацыяй. Пры гэтым Крэмль нарошчвае супрацоўніцтва з рэжымам талібаў.
Каментары