У Беларусі ў найбліжэйшыя гады павінны з'явіцца панэльныя хмарачосы. Нават на 53 паверхі!
Міністр архітэктуры і будаўніцтва Беларусі Вадзім Альшэўскі заявіў, што ў краіне ў найбліжэйшыя некалькі гадоў могуць з'явіцца панэльныя дамы вышынёй не менш за 25 паверхаў. Пра гэта ён расказаў журналісту выдання Blizko.by на будаўнічай выставе BudExpo-2026.
Па словах міністра, над стварэннем такіх высокіх панэльных дамоў цяпер працуюць, але назваць дакладныя тэрміны пакуль складана. Пры гэтым ён запэўніў, што ў найбліжэйшыя пару гадоў такі праект абавязкова павінен быць рэалізаваны.
Акрамя панэльных дамоў, у Мінску плануюць узвесці і значна больш высокі маналітна-каркасны будынак.
Альшэўскі паведаміў, што ёсць задумка пабудаваць у сталіцы дом вышынёй 53 паверхі.
Пакуль самым высокім панэльным жылым домам у Беларусі лічыцца 24‑павярховы будынак у Гомелі, завершаны ў 2025 годзе. У ім 184 кватэры: аднапакаёвыя плошчай ад 46 квадратных метраў, двухпакаёвыя — ад 49, трохпакаёвыя — ад 83 квадратных метраў. Праект гэтага дома прэзентавалі яшчэ ў 2021 годзе. Спачатку будынак планавалі зрабіць авальнай формы, але праз год прадставілі абноўлены, прастакутны варыянт. Побач пачалі ўзводзіць яшчэ два такія дамы.
У Мінску панэльных дамоў вышынёй 24 паверхі пакуль няма. У мікрараёне Новая Баравая, які адміністрацыйна адносіцца да вёскі Копішча Бараўлянскага сельсавета, ёсць 23‑павярховы панэльны дом на вуліцы Авіяцыйнай, 47. Яго будавалі ў 2022—2024 гадах.
Ідэя ўзвядзення 25‑павярховых панэльных дамоў у Беларусі абмяркоўваецца ўжо больш за 15 гадоў. Яшчэ ў 2010 годзе намеснік галоўнага інжынера МАПІДа Андрэй Шаліма казаў, што дамы серыі М 111‑90 плануюць павялічыць да 25‑ці паверхаў. Паводле яго, гэта дазволіла б ушчыльняць забудову, рабіць новыя мікрараёны больш выразнымі і ствараць архітэктурныя акцэнты замест суцэльных шэрагаў шматпавярховікаў.
Пакуль такі праект так і не быў рэалізаваны. Найбольш высокія шматпад'ездныя панэльныя дамы цяпер будуе Завод эфектыўных прамысловых канструкцый. Серыя 24-РС, якая выкарыстоўваецца для іх узвядзення, прадугледжвае будаўніцтва дамоў не толькі на 19, але і да 24 паверхаў. Першыя дамы гэтай серыі цяпер маюць тры пад'езды і 19 паверхаў. Адзін з іх, на вуліцы Паўліны Мядзёлкі, ужо пабудаваны і ўведзены ў эксплуатацыю.
Цяпер чытаюць
28‑гадовага авіятара асудзілі на 13 гадоў калоніі: «здрада дзяржаве» за перапіску з аднакурснікамі з УСУ3
28‑гадовага авіятара асудзілі на 13 гадоў калоніі: «здрада дзяржаве» за перапіску з аднакурснікамі з УСУ
Небарака з Ляхавічаў знік «на СВА» ўжо на трэці дзень, а ў барацьбе за грабавыя счапіліся сястра, сужыцелька і жонка — з чатырма дзецьмі, але чужымі88
Каментары