Маладую супрацоўніцу «Пеленга» арыштавалі за «заклікі да нанясення шкоды Беларусі». Ёй пагражае да 12 гадоў
29-гадовую Карыну Праташчык чакае малое дзіця. Затрымаць дзяўчыну маглі падчас леташняй аблавы КДБ на прадпрыемстве.
Карыне Праташчык 29 гадоў. Яна родам з Мінска. Карына вельмі творчы чалавек — любіць падарожнічаць, фатаграфаваць і рабіць розныя рэчы рукамі. А пяць гадоў таму стварыла ўласныя развіваючыя карткі для дзяцей.
Мяркуючы па сацсетках, у дзяўчыны ёсць муж і непаўналетняе дзіця.
Па звестках «Белпола», з 2017 года Праташчык працавала на «Пеленгу». Апошнім часам — кантралёрам аптычных дэталяў і прыбораў 5 разраду ў бюро тэхнічнага кантролю аптычнай і касмічнай вытворчасці. Яна займалася праверкай якасці аптычных вырабаў.
Невядома напэўна, калі яе затрымалі — апошняя актыўнасць Карыны, якую мы адшукалі, адбывалася больш за 7 месяцаў таму. Прыкладна ў той жа час, у ліпені 2024 года, адбывалася аблава на супрацоўнікаў «Пеленга».
Звязаная яна была з вялікім расследаваннем «Белпола», якое грунтавалася на злітых з прадпрыемства дакументах. Супрацоўнікаў «Пеленга» вадзілі на паліграф, а некаторых — звольнілі. Пра крымінальныя справы па выніках аблавы дагэтуль не было вядома.
Суд над дзяўчынай пачынаецца 3 лютага 2025 года ў Мінскім гарадскім судзе. Карыну абвінавачваюць у «закліках да дзеянняў, якія наносяць шкоду Беларусі» (ч. 3 арт. 361 КК). Ёй пагражае ад чатырох да дванаццаці гадоў калоніі.
Каментары