У Беларусі засталося менш за 500 рыма-каталіцкіх парафій. Перарэгістрацыю праходзяць не ўсе
Свежая статыстыка па колькасці рэлігійных арганізацый Беларусі яшчэ не апублікаваная, але па прамежкавых дадзеных бачна, што за мінулы год колькасць рыма-каталіцкіх парафій у краіне скарацілася. Многія супольнасці Рыма-каталіцкай царквы былі ліквідаваныя ў мінулым годзе, і гэты працэс працягваецца, піша Katolik.life.
Калі па звестках на 1 студзеня 2024 года, апублікаваных на рэсурсе Упаўнаважанага па справах рэлігій і нацыянальнасцяў, у Беларусі налічвалася роўна 500 рыма-каталіцкіх парафій, то звесткі за сярэдзіну мінулага года кажуць пра тое, што цяпер іх стала меней.
Такую статыстыку выданне знайшло, напрыклад, на сайце Віцебскага аблвыканкама. Паводле даных на 1 ліпеня 2024 года, у рэгіёне налічвалася 85 супольнасцяў рыма-католікаў. Па стане на пачатак года іх было 94.
У Мінскай вобласці, у адпаведнасці з інфармацыяй, абноўленай у верасні, дзейнічае 97 рыма-каталіцкіх парафій. На пачатак 2024 года іх налічвалася 98.
Па звестках Гомельскага аблвыканкама, у рэгіёне 20 супольнасцяў рыма-католікаў, а ў пачатку года была 21 супольнасць.
Па іншых рэгіёнах адкрытых даных для параўнання няма, альбо яны састарэлі.
Як вядома, у 2024 годзе ў Беларусі пачалася перарэгістрацыя рэлігійных арганізацый. Гэта стварыла праблемы для невялікіх парафій. Да прыкладу, пробашч касцёла ў Бабруйску тлумачыў:
«Для рэгістрацыі парафіі патрэбныя 20 «заснавальнікаў» з парафіянаў, якія будуць ухваленыя ўладамі. А гэта не так проста. Напрыклад, пенсіянераў падаваць як заснавальнікаў можа быць вельмі нязручна — калі потым хтосьці з іх пераселіцца ў іншы горад ці ў лепшы свет, трэба будзе зноў збіраць сход, выбіраць новага чалавека на замену і зноў падаваць паперы ў выканкам. Таму лепш знайсці маладых, сярэдняга ўзросту. Шукаем».
Тыя супольнасці, якія зразумелі, што не змогуць выканаць новыя патрабаванні, падалі заявы на ліквідацыю арганізацыі. І гэты працэс яшчэ працягваецца — дакументы для перарэгістрацыі парафіі павінны падаць не пазней за 5 ліпеня 2025 года.
Пры гэтым вышэйадзначанае тычыцца не толькі каталікоў. Колькасць зарэгістраваных праваслаўных супольнасцяў у рэгіёнах таксама скарацілася.
Прынамсі, на дзве парафіі БПЦ стала менш у Мінскай вобласці (зноў жа па звестках за верасень 2024 года), адразу на 20 супольнасцяў — у Віцебскай вобласці (па звестках за ліпень). У цэлым у Беларусі налічвалася 1737 парафій БПЦ у адпаведнасці з данымі на пачатак 2024 года.
«Справа не ў палітыцы». Стала вядома, чаму закрылася каталіцкая семінарыя ў Пінску
«Ніколі ні ад каго не атрымлівалі скаргаў». Што вядома пра сітуацыю святара, якога судзяць у Шуміліне
«Бог даў вам усё, акрамя майго нумара тэлефона»: святар-уніят з Віцебска стаў зоркай сацсетак
Ксяндза Генрыка Акалатовіча прысудзілі да 11 гадоў калоніі
У свеце стала менш атэістаў. Але ў Еўропе рэлігія адступае
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга219219
Каментары