Паліцыя завяршыла разгон пратэстнай акцыі на праспекце Руставелі ў Тбілісі. Ён доўжыўся амаль сем гадзін, піша Newsgeorgia.ge.
Да раніцы сілавікі адціснулі дэманстрантаў да станцыі метро «Руставелі», узяўшы іх у ачапленне. Адначасова адбываліся масавыя затрыманні.
СМІ паведамляюць пра мноства пацярпелых. Мяркуючы па ўсім, лік ідзе на дзясяткі. Некаторыя ўдзельнікі мітынгу атрымалі сур'ёзныя траўмы, да машын хуткай дапамогі іх даводзілася несці на насілках. Кадры збіцця зафіксавалі камеры.
У гэтыя хвіліны на Руставелі працуюць камунальныя службы. Яны разбіраюць рэшткі барыкад, якія дэманстранты збудавалі з лавак, смеццевых бакаў, пракатных самакатаў і іншых прадметаў.
Адтуль яны перыядычна стралялі ў бок паліцыі феерверкамі. У адказ з кардона ляцелі капсулы са слёзатачывым газам.
Сітуацыя на Руставелі асабліва напалілася бліжэй да 3 гадзін ночы. Асацыяцыя маладых юрыстаў Грузіі (АМЮГ) распаўсюдзіла заяву, у якой адзначалася, што паліцыя адначасова прымяняе адразу некалькі відаў спецсродкаў — вадамёты, пярцовы спрэй і пэўныя капсулы. У АМЮГ паказалі, што звычайна такая практыка забароненая, аднак МУС зняло абмежаванне «з мэтай спрасціць практыку разгону».
У НДА таксама выказалі здагадку, што перад спецназам паставілі задачу фізічна распраўляцца з пратэстоўцамі праз іх грамадзянскую пазіцыю.
Дэманстранты хаваліся ад паліцыі ў царкве Кашвеці, кругласутачных аптэках і супермаркетах, у вестыбюлі метро.
МУС Грузіі паведаміла пра затрыманне 107 чалавек. Паліцыя сцвярджае, што «ў выніку гвалтоўных дзеянняў пратэстоўцаў пацярпелі 10 супрацоўнікаў МУС», у лякарні застаецца адзін з сілавікоў (з апёкамі).
Колькасць пацярпелых пратэстоўцаў МУС не паведамляе. Усяго за двое сутак былі затрыманыя каля 150 удзельнікаў пратэстаў.
Маштабныя пратэсты ўспыхнулі ў Грузіі ўвечары 28 лістапада, пасля заявы прэм'ера Іраклія Кабахідзэ. Ён абвясціў пра зняцце з парадку дня да 2028 года пытання адкрыцця перамоў аб уступленні краіны ў EC і адмове ад усіх бюджэтных грантаў ЕС.
Людзі выходзяць на мітынгі ў Тбілісі і іншых гарадах без лідараў і спікераў.
Цяпер чытаюць
«Пенсіянерам дзеці перашкаджаюць!» У Брэсце не першы месяц ідуць спрэчкі наконт месца для будаўніцтва дзіцячага сада9
Каментары