Белгідрамет: Мінулы жнівень стаў адным з самых гарачых з 1945 года
Беларускія метэаролагі далі ацэнку апошняму месяцу лета.
Сярэдняя тэмпература паветра ў Беларусі ў жніўні склала плюс 19,9 градуса, гэта на 1,9 градуса вышэй за кліматычную норму, гаворыцца ў аглядзе Белгідрамета, піша «Спутнік».
«Ён (жнівень 2024 год) заняў 5-е месца ў ранжыраваным шэрагу назіранняў ад самага цёплага да самага халоднага, пачынаючы з 1945 года», — адзначылі спецыялісты.
Прыкладна такая ж карціна была ў 2010, 2022 і 2023 гадах, а вось у 90-я гады мінулага стагоддзя жнівень амаль заўсёды быў халаднейшы за норму.
На гэты раз больш за ўсё слупок тэрмометра падняўся ў Гродзенскай вобласці, дзе сярэдняя тэмпература ў выніку была на 2,1 градуса цяплей, чым звычайна. У Віцебскай вобласці адхіленні былі найменшымі — 1,7.
Калі пачатак жніўня 2024 года быў усё ж такі халаднейшым (на 0,8 градуса ніжэй за норму), то ўжо ў другой дэкадзе тэмпература была вышэй за звычайную на 1,6.
Вельмі цёплай была трэцяя дэкада — на 4,7 градусаў цяплей за норму.
Як правіла, днём па краіне паветра прагравалася да 20-25 цяпла, а ў другой палове месяца — да +30 і вышэй. Максімум быў (плюс 35,1) зафіксаваны днём 19 жніўня паблізу гарпасёлка Акцябрскі і ў раёне Лельчыц.
«У асобныя суткі ў другой і трэцяй дэкадах месцамі па краіне былі зарэгістраваныя трапічныя ночы», — адзначана ў аглядзе.
Гэта значыць, у гэтыя ночы тэрмометр паказваў не ніжэй за 20 градусаў цяпла.
Каментары