Ён будзе падтрымліваць Дональда Трампа.
Незалежны кандыдат Роберт Кенэдзі-малодшы прыпыніў сваю перадвыбарчую кампанію на пасаду прэзідэнта ЗША. Пра гэта ён абвясціў у пятніцу, выступаючы перад журналістамі ў штаце Арызона.
Кенэдзі паведаміў, што не можа працягваць сваю кампанію з-за карупцыі ў органах улады, у прыватнасці Дэмакратычнай партыі, і з-за цэнзуры, якой вядучыя СМІ падвергнулі яго выбарчую кампанію. Ён заявіў, што падтрымае кандыдата ад Рэспубліканскай партыі Дональда Трампа, паведамляе Голас Амерыкі.
Па словах Роберта Кенэдзі, ён не спыняе, а толькі прыпыняе сваю перадвыбарчую кампанію. Ён сказаў, што яго імя застанецца ў выбарчых бюлетэнях у многіх штатах, але не ў дзесяці так званых штатах, што «вагаюцца».
Кенэдзі заявіў, што ў такіх штатах, як Арызона, Невада і Джорджыя, ён мог бы паўплываць на вынік выбараў на карысць дэмакратаў, аднак хоча гэтага пазбегнуць, бо разыходзіцца з дэмакратамі па многіх ідэалагічных пазіцыях.
«Шмат месяцаў таму я паабяцаў амерыканскаму народу, што выйду з гонкі, калі стану спойлерам, — нагадаў Роберт Кенэдзі-малодшы сваім выбаршчыкам. — Спойлер — гэта кандыдат, які зменіць вынік выбараў, але сам не мае шанцаў перамагчы. У маім сэрцы я больш не веру, што ў мяне ёсць рэальны шанец перамагчы на выбарах, з-за бесперапыннай, сістэмнай цэнзуры, якой мяне падвяргаюць СМІ. Так што я не магу з чыстым сумленнем казаць сябрам сваёй выбарчай каманды і валанцёрам працягваць дзень і ноч працаваць, або прасіць у спонсараў, каб яны працягвалі даваць мне грошы. Я не магу ім шчыра сказаць, што ў мяне ёсць рэальны шлях у Белы дом».
Спачатку Кенэдзі балатаваўся як дэмакрат, але, з ягоных слоў, кіраўніцтва Дэмакратычнай партыі ставіла перашкоды ягонай перадвыбарнай кампаніі, бо ён пайшоў супраць іх галоўнага кандыдата — Джо Байдэна. Тады Кенэдзі вырашыў ісці як «незалежны». За тое, каб яго імя трапіла ў выбарчыя бюлетэні, яму даводзілася змагацца ў кожным штаце. У Нью-Ёрку суд яму ў гэтым адмовіў.
Кенэдзі сабраў каля мільёна подпісаў выбаршчыкаў і заручыўся падтрымкай 5% адсоткаў насельніцтва. Яго палітычныя погляды прыцягвалі і левых, і правых: ён быў супраць дапамогі Украіне, але за падтрымку Ізраіля; супраць забаронаў на аборты, але за ахову паўднёвых межаў краіны ад прытоку імігрантаў.
Паводле яго ўласных слоў, для яго ідэалагічна самымі важнымі з'яўляюцца тры пазіцыі: праблемы са свабодай слова ў ЗША; вайна ва Украіне; хранічныя захворванні і атлусценне ў дзяцей, распаўсюджванню якіх спрыяю фінансавыя інтарэсы буйных фармацэўтычных карпарацый і карпарацый харчовай прамысловасці. Кенэдзі лічыць, што па гэтых пытаннях пазіцыі Дональда Трампа яму бліжэй, чым пазіцыі дэмакратаў.
Прэзідэнцкія выбары ў ЗША пройдуць 5 лістапада. Супернікі — віцэ-прэзідэнт Камала Харыс і 45-ы прэзідэнт ЗША Дональд Трамп.
Каментары