Крытыкаваў былых калег у інтэрнэце. У Гомелі паводле палітычнага артыкула затрымалі экс-міліцыянта
Прычына затрымання гамельчука Вілена Тургунава — каментары ў інтэрнэце, у тым ліку негатыўныя ў бок міліцыі, піша «Радыё Свабода».
Вілену Тургунаву 55 гадоў. Ягоны бацька паходзіць з Узбекістана, маці беларуска. Вілен скончыў універсітэт у расейскім Навазыбкаве (Бранская вобласць) па спецыяльнасці «правазнаўства». Жыў у Гомлі, быў жанаты, цяпер разведзены, паведамілі «Свабодзе» ў абʼяднанні былых сілавікоў BelPol.
Працаваў Вілен Тургунаў у Чыгуначным РАУСе абласнога цэнтра. Меў там перыядычна праблемы. Яшчэ ў 2001 годзе атрымаў вымову за «безадказнае стаўленне да службы», у 2002 годзе меў «няпоўную службовую неадпаведнасць», у 2004-м — вымову за «грубае парушэнне службовай дысцыпліны, парушэнне загаду МУС».
Пазней былы міліцыянт працаваў у будаўніча-мантажным трэсце ў Гомелі. Жыў у бацькоўскай кватэры.
Затрыманы актыўна вёў старонкі ў розных сацыяльных сетках, дзе выказваўся пра палітычныя і сацыяльныя падзеі. За падтрымку Украіны іншыя карыстальнікі сетак называлі яго «бандэраўцам».
«Свабодзе» стала вядома, што цяпер таксама адбывае пакаранне сваяк Вілена Тургунава, Ігар Казубаў. Як і Тургунаў, Казубаў служыў у гомельскай міліцыі, але ў 90-х. Пасьля працаваў кухарам. У сацыяльных сетках актыўна выказваўся, часам рэзка, пра беларускіх сілавікоў і чыноўнікаў. Затрымалі Казубава 8 чэрвеня 2023 году. Судзілі ў закрытым рэжыме паводле артыкулаў «распальванне варожасці», «абраза прэзідэнта», «паклёп на прэзідэнта». Ігара Казубава пакаралі пазбаўленнем волі, дакладны тэрмін невядомы.
Беларуская дзяржава пасля падзей 2020 году помсціць сілавікам, якія не падтрымалі «афіцыйнага курсу» ці звольніліся з працы. Пад крымінальны пераслед трапілі былыя следчыя Яўген Юшкевіч, Мікіта Старажэнка, Ягор Вяршынін, Аляксей Сянькоў.
«Хатнюю хімію» і калонію атрымалі былыя міліцыянты Дзмітры Кулакоўскі, Максім Клімовіч, Андрэй Гарун, Пятро Буцько і іншыя. Многія сілавікі, якія заявілі ў 2020 годзе пра сваю пазіцыю, вымушаныя былі пасля ўцякаць за мяжу.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна34
Каментары