Куба паведаміла пра арышт 17 чалавек па справе аб вярбоўцы на вайну ва Украіне
Удзельнікам злачыннай сеткі можа пагражаць да 30 гадоў турмы, пажыццёвае зняволенне або смяротнае пакаранне.
Улады Кубы паведамілі пра арышт 17 чалавек, што, як мяркуецца, звязаныя са злачыннай сеткай, якая вербавала кубінцаў у расійскую армію, паведамляе «Радыё Свабода» са спасылкай на Reuters.
На гэтым тыдні кубінскія ўлады паведамілі пра раскрыццё сеткі, удзельнікі якой прымушалі кубінскіх грамадзян ваяваць ва Украіне на баку Расіі. Тады ў МУС Кубы заявілі, што працуюць над «нейтралізацыяй і ліквідацыяй» групы.
«У выніку праведзенага расследавання на гэты момант арыштавана 17 чалавек, у тым ліку арганізатар гэтай дзейнасці», — сказаў палкоўнік Сезар Радрыгес.
Радрыгес не назваў імёнаў арыштаваных, але адзначыў, што лідар групы абапіраўся на двух чалавек, якія жывуць на востраве, каб вербаваць кубінцаў для ўдзелу ў баявых дзеяннях.
Пракурор Хасэ Луіс Рэес заявіў, што ўдзельнікам злачыннай сеткі можа пагражаць да 30 гадоў турмы, пажыццёвае зняволенне або смяротнае пакаранне — у залежнасці ад цяжару і характару ўчыненых злачынстваў.
Артыкулы, па якіх праходзяць абвінавачваныя, уключаюць гандаль людзьмі, найміцтва і варожыя дзеянні супраць замежнай дзяржавы.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»33
Каментары