Падобна, што Статкевіч, Знак і Лосік працяглы час знаходзяцца ў ШІЗА — праваабаронцы
Пра тое, што палітвязні Мікалай Статкевіч, Максім Знак і Ігар Лосік ужо працяглы час знаходзяцца ў ШІЗА, выказвае меркаванне «Віцебская вясна», грунтуючыся на тым, што ад гэтых палітвязняў ўжо працяглы час няма лістоў, а ліставанне забароненае акурат са штрафных ізалятараў.
Зрэшты, адносна Максіма Знака ўдалося атрымаць і пацвярджэнне: адміністрацыя калоніі «Віцьба-3» паведаміла ягонай жонцы і адвакатцы Надзеі, што палітвязень насамрэч утрымліваецца ў ШІЗА.
Жонцы Мікалая Статкевіча з глыбоцкай калоніі №13 увогуле не адказалі нічога. Няма адказу і з Дэпартамента выканання пакаранняў.
Ад Максіма Знака сям'я не атрымлівае лістоў паўтара месяца. Апошні допіс ад яго прыйшоў 9 лютага. 20 лютага родныя атрымалі апошні ліст ад палітзняволенага журналіста Ігара Лосіка, які адбывае пакаранне ў наваполацкай ПК-1.
10 сакавіка да Лосіка не пусцілі адваката, а 15 сакавіка, як стала вядома праваабаронцам, ён дэманстратыўна парэзаў сабе лязом руку і шыю. Гэта было зроблена на знак нязгоды з тым, што яму прыгразілі змяшчэннем у ШІЗА — нібыта ён адмовіўся «займацца прыбіраннем памяшкання».
Пра здароўе сына і ягоны псіхалагічны стан спрабавалі даведацца бацькі, паехаўшы ў наваполацкую калонію. Але ім сказалі толькі тое, што з Ігарам «усё ў парадку», але за парушэнне рэжыму ён пазбаўлены доўгатэрміновага спаткання, якое планавалася ў канцы сакавіка. 3 красавіка адваката да Ігара Лосіка не пусцілі зноў.
У такіх сітуацыях, калі ад палітвязняў доўгі час няма лістоў, праваабаронцы раяць не хаваць праблему, а патрабаваць адказу ад адміністрацыі па месцы зняволення.
Яшчэ адзін адрас, куды можна звярнуцца — гэта Дэпартамент выканання пакаранняў. Разлічваць на хуткі і вычарпальны адказ, праўда, не даводзіцца, таму ў лістах варта задаваць канкрэтныя пытанні — пра здароўе, настрой, працоўны графік, наяўнасць спагнанняў і г.д.
«Набірала ваду з унітазнага бачка для гатавання, мыцця». Ганна Бонд шчыра распавяла пра цяжкае дзяцінства11
Каментары