Фінляндыя абвясціла пра рашэнне ўступіць у НАТА. Расія няздольная гэта сарваць
Прэзідэнт Фінляндыі Саўлі Ніінісцё і прэм'ер краіны Сана Марын 12 мая выступілі з сумеснай заявай, у якой гаворыцца, што «Фінляндыя павінна неадкладна падаць заяўку на ўступленне ў NATO».
Рашэнню папярэднічала абмеркаванне на нацыянальным узроўні і кансультацыі з НАТА, ЗША і Швецыяй.
Швецыя, як і Фінляндыя, мае падаць заяўку ў Паўночнаатлантычны альянс у панядзелак 16 мая, паведамляюць са спасылкай на каляндар парламента шведскія СМІ.
Як чакаецца, дзве краіны прымуць у НАТА максімальна хутка, цягам месяца ці паўтара.
Далучэнне Фінляндыі і Швецыі істотна ўзмацняе альянс. У НАТА з'яўляецца стратэгічная глыбіня для абароны Балтыі. А войскі Фінляндыі і Швецыі — моцныя, абедзве краіны маюць перадавую абаронную прамысловасць.
І Фінляндыя, і Швецыя доўгі час, апошняя — 200 гадоў, былі нейтральнымі дзяржавамі. Швецыя захоўвала нейтралітэт нават падчас Другой сусветнай вайны. Усё памянялася імкліва пасля нападу Расіі на Украіну. Той факт, што Расія дазваляе сабе атакаваць суверэнныя дзяржавы і нават ставіць задачу іх ліквідацыі, стаў трывожным званком для рэгіёна. Як палітычныя эліты, так і насельніцтва Швецыі і Фінляндыі пабачылі, што на сёння гарантыяй спакою і бяспекі для суседзяў Расіі можа быць толькі натаўскі парасон.
Напад на Украіну таксама агаліў слабасць і нізкі маральны дух расійскай арміі. Стала ясна, што армія, якая загрузла ва Украіне і не здолела ўзяць Харкаў і Кіеў, не зможа адкрыць другі фронт у Фінляндыі і на Готландзе. Хельсінкі і Стакгольм ухапіліся за магчымасць перайсці пад натаўскі парасон, пакуль рукі Масквы занятыя.
Фінляндыя і Швецыя — адны з самых багатых і тэхналагічна перадавых краін свету. Фінляндыя ў 1939—1940 гадах адстаяла сваю незалежнасць у вайне, якая шмат у чым падобная да цяперашняга канфлікту ва Украіне. СССР хацеў далучыць Фінляндыю ў якасці савецкай рэспублікі, фіны адчайна супраціўляліся. Яны страцілі частку тэрыторыі, але здолелі захаваць незалежнасць. Калі да Другой сусветнай Фінляндыя знаходзілася на адным узроўні развіцця з Эстоніяй, якая здалася саветам без бою, праз два пакаленні яна ўжо ў разы абганяла паўднёвых суседзяў па эканамічных паказчыках.
Пасля нападу Расіі на Украіну і Фінляндыя, і Швецыя пачалі пастаўкі зброі Кіеву. У прыватнасці, украінская армія атрымала супрацьтанкавыя ракеты NLAW брытанска-шведскай вытворчасці, больш эфектыўныя нават за «Джавеліны». Пачаліся размовы аб перадачы Украіне шведскіх знішчальнікаў «Грыпен».
Мяжа НАТА з Расіяй павялічыцца больш як на тысячу кіламетраў. Далучэнне Фінляндыі і Швецыі да НАТА — гэта стратэгічная параза Масквы вялізнай значнасці. Пуцін хацеў захопам Украіны паказаць слабасць НАТА, замест гэтага альянс узмацніўся.
Каб прадэманстраваць рашучасць Захаду, у гэты момант у Фінляндыі і на ўсім усходнім флангу Альянса праводзяцца маштабныя вучэнні з удзелам вайскоўцаў Фінляндыі, Швецыі, ЗША, Брытаніі і дзясятка іншых краін. Фінляндыя таксама загадзя знізіла сваю залежнасць ад расійскіх энерганосьбітаў, а фінскія кампаніі масава сышлі з расійскага рынку. Так бамбёжкі ўкраінскіх гарадоў скончылі эпоху асаблівых адносін Фінляндыі і Расіі і 200-гадовы нейтралітэт Стакгольма.
Цяпер чытаюць
35‑гадовы дальнабойшчык з Беларусі раптоўна памёр у Кітаі. Гэта муж самай тытулаванай беларускай дзюдаісткі2
Каментары