Finlandyja abviaściła pra rašeńnie ŭstupić u NATA. Rasija niazdolnaja heta sarvać

Rašeńniu papiaredničała abmierkavańnie na nacyjanalnym uzroŭni i kansultacyi z NATA, ZŠA i Šviecyjaj.

Šviecyja, jak i Finlandyja, maje padać zajaŭku ŭ Paŭnočnaatłantyčny aljans u paniadziełak 16 maja, paviedamlajuć sa spasyłkaj na kalandar parłamienta šviedskija ŚMI.

Jak čakajecca, dźvie krainy prymuć u NATA maksimalna chutka, ciaham miesiaca ci paŭtara. 

Dałučeńnie Finlandyi i Šviecyi istotna ŭzmacniaje aljans. U NATA źjaŭlajecca stratehičnaja hłybinia dla abarony Bałtyi. A vojski Finlandyi i Šviecyi — mocnyja, abiedźvie krainy majuć pieradavuju abaronnuju pramysłovaść. 

I Finlandyja, i Šviecyja doŭhi čas, apošniaja — 200 hadoŭ, byli niejtralnymi dziaržavami. Šviecyja zachoŭvała niejtralitet navat padčas Druhoj suśvietnaj vajny. Usio pamianiałasia imkliva paśla napadu Rasii na Ukrainu. Toj fakt, što Rasija dazvalaje sabie atakavać suvierennyja dziaržavy i navat stavić zadaču ich likvidacyi, staŭ tryvožnym zvankom dla rehijona. Jak palityčnyja elity, tak i nasielnictva Šviecyi i Finlandyi pabačyli, što na siońnia harantyjaj spakoju i biaśpieki dla susiedziaŭ Rasii moža być tolki nataŭski parason.

Napad na Ukrainu taksama ahaliŭ słabaść i nizki maralny duch rasijskaj armii. Stała jasna, što armija, jakaja zahruzła va Ukrainie i nie zdoleła ŭziać Charkaŭ i Kijeŭ, nie zmoža adkryć druhi front u Finlandyi i na Hotłandzie. Chielsinki i Stakholm uchapilisia za mahčymaść pierajści pad nataŭski parason, pakul ruki Maskvy zaniatyja.

Finlandyja i Šviecyja — adny z samych bahatych i technałahična pieradavych krain śvietu. Finlandyja ŭ 1939—1940 hadach adstajała svaju niezaležnaść u vajnie, jakaja šmat u čym padobnaja da ciapierašniaha kanfliktu va Ukrainie. SSSR chacieŭ dałučyć Finlandyju ŭ jakaści savieckaj respubliki, finy adčajna supraciŭlalisia. Jany stracili častku terytoryi, ale zdoleli zachavać niezaležnaść. Kali da Druhoj suśvietnaj Finlandyja znachodziłasia na adnym uzroŭni raźvićcia z Estonijaj, jakaja zdałasia savietam biez boju, praz dva pakaleńni jana ŭžo ŭ razy abhaniała paŭdniovych susiedziaŭ pa ekanamičnych pakazčykach.

Paśla napadu Rasii na Ukrainu i Finlandyja, i Šviecyja pačali pastaŭki zbroi Kijevu. U pryvatnaści, ukrainskaja armija atrymała supraćtankavyja rakiety NLAW brytanska-šviedskaj vytvorčaści, bolš efiektyŭnyja navat za «Džavieliny». Pačalisia razmovy ab pieradačy Ukrainie šviedskich źniščalnikaŭ «Hrypien».

Miaža NATA z Rasijaj pavialičycca bolš jak na tysiaču kiłamietraŭ. Dałučeńnie Finlandyi i Šviecyi da NATA — heta stratehičnaja paraza Maskvy vializnaj značnaści. Pucin chacieŭ zachopam Ukrainy pakazać słabaść NATA, zamiest hetaha aljans uzmacniŭsia.

Kab prademanstravać rašučaść Zachadu, u hety momant u Finlandyi i na ŭsim uschodnim fłanhu Aljansa pravodziacca maštabnyja vučeńni z udziełam vajskoŭcaŭ Finlandyi, Šviecyi, ZŠA, Brytanii i dziasiatka inšych krain. Finlandyja taksama zahadzia źniziła svaju zaležnaść ad rasijskich enierhanośbitaŭ, a finskija kampanii masava syšli z rasijskaha rynku. Tak bambiožki ŭkrainskich haradoŭ skončyli epochu asablivych adnosin Finlandyi i Rasii i 200-hadovy niejtralitet Stakholma.

• 64
• 0
• 0
• 0
• 0
• 0
• 0
• 0