Лукашэнка раскрытыкаваў экс-міністра Караева за выбачэнні перад пацярпелымі падчас пратэстаў 2020 года
Аляксандр Лукашэнка сцвярджае, што прабачэнні экс-міністра ўнутраных спраў Юрыя Караева перад выпадковымі людзьмі, што пацярпелі падчас пратэстаў пасля выбараў 2020 года, не былі з ім узгодненыя, і выбачацца не было патрэбы.
Пра гэта ён заявіў падчас інтэрв'ю з расійскім тэлевядучым Уладзімірам Салаўёвым, піша Zerkalo.io.
— [Караеў] пачаў прасіць прабачэння. Са мной не было ўзгоднена. Выбачацца не было за што. Так, ён выступіў: «Я гатовы ўзяць на сябе…», а не трэба нічога браць на сябе! Не трэба, калі ты не вінаваты! І не трэба патураць ім. Было б як у Казахстане.
— Вось якое стаўленне Лукашэнкі. (…). Лічыць прымяненне сілы, якое было, цалкам апраўданым — пракаментаваў Уладзімір Салаўёў.
13 жніўня 2020 года тагачасны міністр унутраных спраў Беларусі Юрый Караеў у эфіры тэлеканала АНТ выбачыўся за траўмы выпадковых людзей на вулічных акцыях пратэсту.
— Пры любой масавай сутычцы, пры спыненні групавых або масавых парушэнняў грамадскага парадку атрымліваецца так, што ўздзейнічаюць на тых, хто спецыяльна на гэта ішоў, і на тых, хто апынуўся побач, не сышоў своечасова, не здолеў адскочыць. Вось за гэтых людзей, тых, каму дасталася, я як камандзір хачу ўзяць на сябе адказнасць і папрасіць прабачэння чыста па-чалавечы перад гэтымі людзьмі, — заявіў тады Караеў.
Акрамя таго Караеў у тым інтэрв'ю паабяцаў як мага хутчэй адпусціць выпадкова затрыманых мірных людзей.
На сённяшні дзень невядома аб ніводнай крымінальнай справе, якая б была заведзена за гвалт у дачыненні да ўдзельнікаў масавых пратэстаў 2020 года.
Каментары