«Вы знаходзіцеся ў турме за тое, што выступалі за свабоду прэсы». Дэпутат нямецкага парламента даслаў ліст галоўнаму рэдактару «НН»
Дэпутат нямецкага парламента Андрэас Аўдрэч напісаў ліст галоўнаму рэдактару «Нашай Нівы», які больш за паўгода знаходзіцца ў зняволенні. Палітык выказвае падтрымку Ягору Марціновічу і сцвярджае, што разам з калегамі будзе працаваць над тым, каб абыходжанне з палітвязнямі ў Беларусі не засталося беспакараным.
«Вы знаходзіцеся ў турме за тое, што выступалі за свабоду прэсы і дэмакратыю ў Беларусі, — піша нямецкі палітык. — Як дэпутат нямецкага Бундэстагу, хачу вас запэўніць: вы не адзін, мы пільна сочым за тым, што з вамі адбываецца, і мы стаім на вашым баку.
Свабода прэсы і дэмакратыя неабходныя для сучаснага і справядлівага грамадства. Не толькі асобны чалавек, але перш за ўсё СМІ, павінны мець магчымасць свабодна выказвацца і паведамляць навіны. Калі гэтыя важныя правы абмяжоўваюцца, трэба ўставаць і пратэставаць.
Кожны, хто робіць гэта, асабліва калі гэта звязана з вялікай небяспекай, заслугоўвае нашай павагі, падзякі і падтрымкі. Мы выказваем салідарнасць усім дэмакратычна настроеным грамадзянам Беларусі, рашуча крытыкуем парушэнне вашых правоў і ваша зняволенне».
Андрэас Аўдрэч да таго, як пайсці ў палітыку, сам працаваў журналістам. У лісце да галоўнага рэдактара НН ён прыгадвае, што мог свабодна рабіць свае рэпартажы і не баяўся рэпрэсій і гвалту з боку ўладаў.
«Гэта магчымасць, якой не маюць многія журналісты ў свеце, — працягвае дэпутат. — Гэта яшчэ раз падкрэслівае, наколькі важна, што сёлета Нобелеўскую прэмію міру атрымалі журналісты Марыя Рэса і Дзмітрый Муратаў, якіх адзначылі за захаванне свабоды слова на Філіпінах і ў Расіі.
Мы ўсе павінны працаваць над тым, каб пабудаваць свет, у якім журналісты могуць працаваць без страху. Мы разам павінны выступаць за дэмакратыю, за дзяржаўныя сістэмы, у якіх крытыка не караецца і не душыцца, а з’яўляецца натуральнай і істотнай часткай грамадскай дыскусіі».
Андрэас Аўдрэч, звяртаючыся да Ягора Марціновіча, адзначае, што тое, як парушаліся яго правы і правы іншых журналістаў, абуральна.
«Мы будзем працаваць над тым, каб такое абыходжанне з вамі і ўсімі палітвязнямі ў Беларусі не засталося беспакараным, — кажа дэпутат. — Мне вельмі шкада, што вы не змаглі правесці Новы год з роднымі і блізкімі. Я жадаю вам шмат сіл і трываласці. Шчыра дзякую за вашу прыхільнасць да каштоўнасцяў, якія вельмі важныя для людзей ва ўсім свеце — свабоды і дэмакратыі».
Што можа кожны зрабіць для палітвязняў? Адправіць ліст ці паштоўку. Усяго некалькі словаў — вялікая падтрымка для людзей, якіх арыштавалі за погляды і імкненне зрабіць жыццё ў Беларусі лепшым.
Калі ласка, не забывайце пра нашаніўцаў, пішыце ім лісты.
Адрас: 220030, г. Мінск, вул. Валадарскага, 2. СІЗА №1
Марціновіч Ягор Аляксандравіч
Скурко Андрэй Генадзевіч
«Спадзяюся, нашым папярэднікам не было б за нас сорамна». Ягор Марціновіч з-за кратаў перадаў вітанні да 115-годдзя НН
«Капітан сыходзіць апошнім, а не першым». Галоўны рэдактар «Нашай Нівы» даў інтэрв’ю з СІЗА
«Главное»: хто стаіць за найбольшай сеткай рэгіянальных тэлеграм-каналаў Беларусі. Яе сляды вядуць у Расію4
Каментары