Расійскага апазіцыянера Аляксея Навальнага спрабавалі атруціць рэчывам класа «Навічок» другі раз, непасрэдна перад адпраўкай з Омска ў Нямеччыну, сцвярджае газета Sunday Times са спасылкай на ананімныя крыніцы. Пацверджанняў гэтай інфармацыі няма, улады Нямеччыны і Расіі пакуль не каментавалі заяву, затое адрэагавалі омскія чыноўнікі, адзначае ВВС.
«Крыніцы ў спецслужбах Германіі паведамілі сваім брытанскім калегам, што нападнікі здзейснілі яшчэ адну спробу, калі Навальны ляжаў у штучнай коме — перад тым, як яго адправілі медыцынскім рэйсам у Германію», — гаворыцца ў матэрыяле выдання.
«Гэта было зроблена, каб ён быў мёртвы да прыбыцця ў Берлін», — цытуе газета словы адной з крыніц.
Апытаныя эксперты заявілі Sunday Times, што Навальнага, па ўсім відаць, зноў выратаваў уведзены атрапін.
Галоўны таксіколаг Омскай вобласці і Сібірскай федэральнай акругі РФ Аляксандр Сабаеў назваў артыкул «качкай».
«Ніякіх пытанняў ні з чыйго боку да нас не ўзнікала. Ніхто, акрамя медыцынскіх работнікаў, доступу да яго не меў. Усё гэта выдумка ад пачатку да канца. Не было атручвання, ні першаснага, ні другаснага. Гэта інфармацыйная «качка», усе раскручваецца дзеля нейкіх пэўных мэтаў», — сказаў ён.
Навальнаму стала блага 20 жніўня на борце самалёта, калі ён ляцеў з Томска ў Маскву. Ён страціў прытомнасць, пасля чаго самалёт экстранна прызямліўся ў аэрапорце Омска, і палітыка даставілі ў мясцовую бальніцу хуткай дапамогі №1.
Улады Германіі, куды пазней быў транспартаваны Навальны, прыйшлі да высновы, што ён быў атручаны рэчывам групы «Навічок». Паводле іх звестак, наяўнасць у аналізах палітыка слядоў гэтага нервова-паралітычнага рэчыва пацвердзілі лабараторыі ў Францыі і Швецыі.
Таксама звесткі аб атручэнні пацвердзіла арганізацыя па забароне хімічнай зброі (АЗХЗ).
Расійскі бок настойвае, што ў аналізах, якія бралі ў Навальнага ў Омскай бальніцы, слядоў атрутных рэчываў не было. Крымінальная справа ў Расіі распачатая не была, але да гэтага часу вядзецца даследчая праверка.
Праверыць інцыдэнт у рамках крымінальнай справы немагчыма, бо для гэтага «няма матэрыялаў», сказаў прэзідэнт Расіі Уладзімір Пуцін падчас сустрэчы з Радай па правах чалавека.
«Калі чалавек ледзь не памёр, гэта не значыць, што трэба з любой нагоды распачынаць крымінальную справу», — адзначыў Пуцін.
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм15
Каментары