Rasijskaha apazicyjaniera Alaksieja Navalnaha sprabavali atrucić rečyvam kłasa «Navičok» druhi raz, niepasredna pierad adpraŭkaj z Omska ŭ Niamieččynu, śćviardžaje hazieta Sunday Times sa spasyłkaj na ananimnyja krynicy. Paćvierdžańniaŭ hetaj infarmacyi niama, ułady Niamieččyny i Rasii pakul nie kamientavali zajavu, zatoje adreahavali omskija čynoŭniki, adznačaje VVS.
«Krynicy ŭ śpiecsłužbach Hiermanii paviedamili svaim brytanskim kaleham, što napadniki ździejśnili jašče adnu sprobu, kali Navalny lažaŭ u štučnaj komie — pierad tym, jak jaho adpravili miedycynskim rejsam u Hiermaniju», — havorycca ŭ materyjale vydańnia.
«Heta było zroblena, kab jon byŭ miortvy da prybyćcia ŭ Bierlin», — cytuje hazieta słovy adnoj z krynic.
Apytanyja ekśpierty zajavili Sunday Times, što Navalnaha, pa ŭsim vidać, znoŭ vyratavaŭ uviedzieny atrapin.
Hałoŭny taksikołah Omskaj vobłaści i Sibirskaj fiederalnaj akruhi RF Alaksandr Sabajeŭ nazvaŭ artykuł «kačkaj».
«Nijakich pytańniaŭ ni z čyjho boku da nas nie ŭźnikała. Nichto, akramia miedycynskich rabotnikaŭ, dostupu da jaho nie mieŭ. Usio heta vydumka ad pačatku da kanca. Nie było atručvańnia, ni pieršasnaha, ni druhasnaha. Heta infarmacyjnaja «kačka», usie raskručvajecca dziela niejkich peŭnych metaŭ», — skazaŭ jon.
Navalnamu stała błaha 20 žniŭnia na borcie samalota, kali jon lacieŭ z Tomska ŭ Maskvu. Jon straciŭ prytomnaść, paśla čaho samalot ekstranna pryziamliŭsia ŭ aeraporcie Omska, i palityka dastavili ŭ miascovuju balnicu chutkaj dapamohi №1.
Ułady Hiermanii, kudy paźniej byŭ transpartavany Navalny, pryjšli da vysnovy, što jon byŭ atručany rečyvam hrupy «Navičok». Pavodle ich źviestak, najaŭnaść u analizach palityka śladoŭ hetaha niervova-paralityčnaha rečyva paćvierdzili łabaratoryi ŭ Francyi i Šviecyi.
Taksama źviestki ab atručeńni paćvierdziła arhanizacyja pa zabaronie chimičnaj zbroi (AZCHZ).
Rasijski bok nastojvaje, što ŭ analizach, jakija brali ŭ Navalnaha ŭ Omskaj balnicy, śladoŭ atrutnych rečyvaŭ nie było. Kryminalnaja sprava ŭ Rasii raspačataja nie była, ale da hetaha času viadziecca daśledčaja pravierka.
Pravieryć incydent u ramkach kryminalnaj spravy niemahčyma, bo dla hetaha «niama materyjałaŭ», skazaŭ prezident Rasii Uładzimir Pucin padčas sustrečy z Radaj pa pravach čałavieka.
«Kali čałaviek ledź nie pamior, heta nie značyć, što treba ź luboj nahody raspačynać kryminalnuju spravu», — adznačyŭ Pucin.
Kamientary