У Вілейскім раёне адкапалі сляды ўзброенага канфлікту сярэдзіны І тысячагоддзя
Адкрыццё зрабілі падчас штогадовай археалагічнай практыкі студэнтаў гістарычнага факультэта БДУ. Раскопкі праходзяць каля вёскі Рэчкі Вілейскага раёна пад кіраўніцтвам загадчыцы кафедры археалогіі і спецыяльных гістарычных дысцыплін Паліны Курловіч, піша прэс-служба БДУ.
Падчас даследаванняў вучоныя выявілі рэшткі ўмацаванняў, знішчаныя пажарам. Сярод іх — земляны вал, на якім раней стаяла драўляная сцяна. У гэтым месцы таксама знайшлі наканечнікі стрэл, што сведчыць пра тое, што гарадзішча магло згарэць у выніку ваеннага сутыкнення.
Знойдзеныя ў пласце пажару прадметы дазваляюць папярэдне аднесці гэтыя падзеі да эпохі Вялікага перасялення народаў — прыкладна да IV — першай паловы V стагоддзяў.
Акрамя таго, археолагі даследуюць неўмацаванае паселішча каля падножжа гарадзішча. Там знаходзяць розныя рэчы таго часу: жалезныя і гліняныя прылады працы, элементы адзення, вырабы з косці і керамічны посуд.
Экспедыцыя ў Рэчках працягнецца да 28 ліпеня. Пасля заканчэння работ знойдзеныя артэфакты перададуць у навучальную лабараторыю музейнай справы гістарычнага факультэта БДУ, дзе іх дадаткова вывучаць, а потым уключаць у музейную экспазіцыю.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку23
Каментары