У Рэдакцыю «Нашай Нівы» трапілі скрыншоты паведамленняў студэнтам БДУ, якія ім дасылае «камандзір студэнцкай службы бяспекі БДУ» Максім Шалюта.
Хлопец пераконвае, што студэнты мусяць усяляк «падтрымліваць кандытата ад БДУ» — Вольгу Цесакову. Гаворыцца, што за гэтым «пільна сочыць прарэктар», а ад вынікаў падтрымкі залежыць памер фінансавання той самай «студэнцкай службы бяспекі».
«Усе вашыя студэнты ў абавязковым парадку мусяць схадзіць 13 лютага на выбары», — піша ён.
«Наша Ніва» спытала, чаму для Максіма Шалюты гэта так важна, але кіраўнік «студэнцкай службы бяспекі» даў заднюю:
«Гэта [фота] цяпер выдаляецца з сеткі, і мы робім усё магчымае, каб пазбавіцца наступстваў гэтага», — сказаў ён.
«Калі казаць пра выбары, то гэта не тое каб… Я кажу, што хлопцы 100% павінны схадзіць на выбары 13 лютага, але ніхто ж не кажа, што калі яны не прагаласуюць у гэты дзень ці не сходзяць на выбары ўвогуле, то я буду нейкія захады прымаць. Проста мы, як студэнцкі актыў, павінны быць узорам для іншых студэнтаў, заахвочваць іх. Ясна, выбары — гэта добраахвота, але ўсё ж… Я трымаюся палітыкі, што мы, студэнты, павінны галасаваць», — дадаў Максім.
Мы перапыталі, дык навошта ён выдаляе фота з сеткі, калі яго пазіцыя цьвёрдая.
«Я не магу расказаць гэта», — адрэзаў хлопец.
Сама кандыдатка запэўнівае, што для яе самой гэта стала нечаканасцю.
«Гэта навіна для мяне! Слова «падтрымка» кожны разумее па-свойму, я ўпэўнена, што Максім не меў на ўвазе нешта кепскае, калі прасіў мяне падтрымаць. Пытанне ў падачы. Я нясу адказнасць выключна за свае словы і не магу трактаваць і каментаваць учынкі іншых людзей», — сказала яна.
Дзяўчына дадала, што падтрымку з боку адміністрацыі адчувае толькі ў выглядзе «цёплых словаў і даверу».
22-гадовая Вольга Цесакова мае быць абраная ў Мінгарсавет па Дзяржынскай акрузе №23 як праўладны кандыдат. Яна працуе культарганізатарам інтэрнатаў Студэнцкага гарадка БДУ. Гэта будзе самы малады дэпутат Мінгарсавета.
Чытайце таксама: 57 кандыдатаў, якія будуць абраныя ў Мінгарсавет — праверце спіс пасля выбараў ПРАГНОЗ «НН»
Цяпер чытаюць
Таксістка з Таджыкістана насмерць збіла беларуску ў Польшчы — і спакойна пакінула краіну8
Каментары