Maryna Koktyš: «Narodnaja Vola» budzie vychodzić, pakul my žyvyja
Ministerstva infarmacyi nakiravała ŭ Vyšejšy haspadarčy sud pazovy ab spynieńni vypusku hazet «Naša Niva» i «Narodnaja Vola». Hościa ranišniaha efiru Radyjo Svaboda- namieśnica redaktara niezaležnaj hazety «Narodnaja vola» Maryna Koktyš.
Abłamiejka: Jak u kalektyvie hazety było ŭspryniata paviedamleńnie ab namiery Ministerstva infarmacyi začynić «Narodnuju Volu»?
Koktyš: Naturalna, pieršaja reakcyja — heta šok. Bo havorka idzie nie pra toje, što nas vykinuć z šapikaŭ «Biełsajuzdruku» ci z drukarni, i navat nie pra toje, što nam daviadziecca zapłacić jašče adzin vielmi bujny štraf. Havorka mienavita pra spynieńnie vychadu hazety, jakoj sioleta spoŭnicca 16 hadoŭ. Tamu pieršaja reakcyja — šok.
Abłamiejka: Učora hałoŭny redaktar «Narodnaj Voli» Iosif Siaredzič zajaviŭ, što hazetu chavać rana, i što redakcyja nakiroŭvaje telehramy na imia Alaksandra Łukašenki i kiraŭnika hramadzkaj kaardynacyjnaj rady pa ŚMI Paŭła Jakuboviča. Na vašu dumku, heta moža dapamahčy?
Koktyš: Viedajecie, jak kažuć, nadzieja pamiraje apošniaj. My nie źbirajemsia ni pierad kim stanavicca na kaleni, ale my ličym, što zaraz treba hrukacca va ŭsie dźviery. Navat kali jany začynienyja. I kali jość choć adzin najmienšy šaniec vyratavać hazetu, to jaho treba skarystoŭvać.
Abłamiejka: Ujavim sabie najhoršy varyjant — Haspadarčy sud prymaje rašeńnie začynić abiedźvie hazety. Jakija varyjanty dziejańniaŭ zastajucca ŭ vašym raparadžeńni?
Koktyš: Heta takaja testavaja sytuacyja dla ŭsich nas. I kali niezaležnaja, niezaanhažavanaja presa sapraŭdy patrebnaja hramadztvu, to jana budzie isnavać, nia hledziačy ni na jakija rašeńni sudu. A kali nie, to tady treba surjozna dumać pra svajo dalejšaje žyćcio. My ličym, što svajo słova ŭ abaronu «Narodnaj Voli» majuć skazać i našy čytačy, partyi, hramadzkija arhanizacyi. I było vielmi pryjemna, kali ŭčora, litaralna praz hadzinu paśla taho, jak stała viadoma pra hety krok Ministerstva infarmacyi, u redakcyju pačali zvanić ludzi i pytacca, čym my možam dapamahčy. Adny prapanoŭvali zładzić pikiety pierad domam taho ž ministra infarmacyi, inšyja telefanavali na haračuju liniju ministerstva i vykazvali svajo abureńnie. Niechta prapanoŭvaŭ bolš radykalnyja varyjanty. Ščyra kažučy,
u našaj redakcyi dziasiatki varyjantaŭ na samy horšy, jak vy kažacie, vypadak raźvićcia padziejaŭ.Možna źjechać u emihracyju i vydavać «Narodnuju Volu» za miažoj, možna syści ŭ padpolle i raspaŭsiudžvać hazetu miljonnymi nakładami na pavietranym šary — darečy, my nia pieršy raz havorym pra takija varyjanty ŭ ciažkija dla nas chviliny. Ale jak by tam nie razhortvałasia sytuacyja, navat u hety niaprosty čas my zastajomsia aptymistami i kažam: «Narodnaja Vola» budzie vychodzić, pakul my žyvyja.
Kamientary