Raniej rak na hary śviśnie, čym viarchi paciarušać hałavu popiełam pierad Kazulinym. A voś kali na ekstraardynarnyja kroki idzie elektarat, jaki ciažka pryličyć da "admarozkaŭ", ułada adrazu pačynaje zaŭvažna nervavacca.
Siońnia Kazulin raspačaŭ anansavanuju haładoŭku. Z kalonii nadta nie dasi interviju, ale, va ŭsiakim razie, jahonaja žonka ŭpeŭnienaja, što toj nie pieradumaŭ.
Jakija perspektyvy ŭ hetaj akcyi?
Naturalna, nie vypadaje čakać, što vysokaja ŭłada, pacierušyŭšy hałavu popiełam, pryznaje: maješ racyju, spadaru Kazulin, nielehitymnyja my...
To bok, jak zaznačyŭ u hutarcy sa mnoj palitolah Valer Karbalevič, mety haładoŭki nierealnyja. Miž tym, na jahonuju dumku, raspačynajučy takuju akcyju, zaŭždy musiš vyrazna ŭjaŭlać, čym heta moža skončycca.
Adna reč, kali patrabavańni bolš-mienš realistyčnyja. Zhadajma: deputaty z "Respubliki" pazaletaś haładali dziela papravak u Vybarčy kodeks. I Pałata ŭklučyła pytańnie u paradak dnia. Naturalna, z pradkazalnym nulavym vynikam. Ale ž baki, va ŭsiakim razie, mieli mahčymaść u niejkaj stupieni zachavać tvar. U Bieraści ŭładalniki pryvatnych taksovak damahalisia skasavańnia abdzirałaŭki — i ŭrešcie atrymali adpaviedny ŭkaz. Całkam imavierna, što damožacca svajho — rehistracyi niezaležnaha prafźviazu dy vypłaty premijalnych jaho siabram — pracaŭnica "Babrujskšyny" Alena Zachožaja. Ci voś jašče śviežy prykład: pratestanty zmahajucca za budynak, i kiraŭnik dziaržavy nibyta ŭžo skazaŭ, što heta dobraja carkva i varta joj dapamahčy.
Ale ž raniej rak na hary śviśnie, čym naviersie skažuć, što prafesar Kazulin dobry čałaviek i varta jamu dapamahčy (chiba što nakormiać hvałtoŭna). To bok zastajecca abo iści da trahičnaha kanca, abo...
Eks-kandydat užo davioŭ ŭviesnu, što moža być rašučym, navat samaachviarnym. Razam z tym, zaraz jon pakidaje placdarm dla adychodu. Kaža, što spynieńnie haładoŭki mahčymaje, kali, naprykład, biełaruskim pytańniem ščylna zojmiecca AAN.
Z pazycyjaŭ abstraktnaha humanizmu — dziakuj bohu, što jość absiah dla maneŭru. Ź mierkavańniaŭ palittechnalahičnaści — efekt prablematyčny.
Mižnarodnaja supolnaść peŭna ž zładzić niejkija mierapryjemstvy, kab dać padstavu spynić ryzykoŭnuju akcyju. Ale apryjory zrazumieła, što amorfnyja struktury AAN (ci inšych mižnarodnych instytucyjaŭ) našych balučych pytańniaŭ anijak nia vyrašać. Budzie chiba imitacyja.
U vyniku — davajcie naŭprost, biez patasu! — ideja hetaj haładoŭki moža być devalvavanaja.
Inšaja reč, što kali razhladać źjavu ŭvohule, dyk ułada musić dobra pačuchać patylicu, nazirajučy za epidemijaj haładovak. Ci nia vypuščany džyn ź plaški? Sastupajučy, kiroŭnyja viarchi sparadžajuć novyja spakusy. U hramadztvie macnieje pierakanańnie: kab niešta, kažučy pa-saviecku, vybić, treba demanstratyŭna pakłaści zuby na palicu. I kali na ekstraardynarnyja kroki idzie elektarat, jaki ciažka pryličyć da "admarozkaŭ", to ŭłada adrazu pačynaje zaŭvažna nervavacca.
Na dumku majho kalehi Valera Karbaleviča, korań zła ŭ tym, što režym zablakavaŭ narmalnyja mechanizmy zvarotnaj suviazi.
U 1917 hodzie buržuj Rabušynski zaklikaŭ zadušyć balšavizm "kaščavaj rukoj hoładu". Tam išła typovaja klasavaja baraćba. Siońnia ž, jak bačym, ułasny elektarat usio čaściej sprabuje prycisnuć "rukoj hoładu" rodnuju ŭładu. Niešta nie dapasujecca da prapahandysckaj schiemy "dziaržavy dla naroda"!
Samym prostym vyjściem było b pakrysie adkručvać šrubki, pačynać paŭzučuju demakratyzacyju. Ale ž strašna! Tak što ŭłada choćki-niachoćki pieratvarajecca ŭ pažarnuju kamandu. Dzie siońnia zaharełasia? Chto tam jašče admoviŭsia ad pajki na našaj vyśpie stabilnaści?
Ciapier čytajuć
«Razahnać darmajedaŭ! Addać ludziam ziamlu!» Traktaryst z Chojnikaŭ, jaki ciapier žyvie ŭ Łatvii, paraŭnaŭ sielskuju haspadarku tam i ŭ nas11
Kamientary