Chronika postu-haładoŭki ŭ «Novym žyćci»
Śviatłana Mackievič u składzie delehacyi z carkvy «Novaje žyćcio» pryjšła na pryjom u Mienharvykankam, kab paskoryć pačatak pieramovaŭ z haradzkimi ŭładami.
2006-10-26 18:52:14
Śviatłana Mackievič u składzie delehacyi z carkvy «Novaje žyćcio» pryjšła na pryjom u Mienharvykankam, kab paskoryć pačatak pieramovaŭ z haradzkimi ŭładami. Na hety krok svajaki haładoŭnikaŭ byli vymušanyja pajści, bo stan mnohich haładoŭnikaŭ značna pahoršyŭsia, daktary kažuć, što dzień-dva i jany apynucca na špitalnych łožkach. Siarod haładoŭnikaŭ i muž spadaryni Śviatłany – viadomy hramadzki dziejač Uładzimier Mackievič. Adnak delehacyju stali vyciaśniać z budynku. Padčas hetaha i była zatrymanaja Śviatłana Mackievič, žonka Mackieviča. Jaje dastavili ŭ RUUS Maskoŭskaha rajonu stalicy, paśla praź niejki čas adpuścili, abaviazaŭšy źjavicca zaŭtra a 14-j hadzinie ŭ sud. Jaje abvinavačvajuć u niepadparadkavańni supracoŭniku milicyi.
?
2006-10-26 17:34:40
Dziela paskareńnia pracesu pieramovaŭ hrupa svajakoŭ haładoŭnikaŭ pastanaviła vypravicca ŭ Mienharvykankam na sustreču ź Michaiłam Paŭłavym. Ale ŭ vykankamie žančynam spačatku prapanavali sustrecca z kiraŭnikom idealahičnaha adździełu Mienharvykankamu Michaiłam Ciciankovym. Adnak i ź im sustrečy nia vyjšła: pratestoŭcaŭ vyjšli sustrakać dźvie žančyny, jakija nie nazvalisia.
Nie paśpieła zaviazacca hutarka, jak da pratestoŭcaŭ nablizilisia ludzi ŭ cyvilnym i pačali ich vyciaśniać z budynku.
Adnu žančynu vychapili z usiaje hrupy, zakinuli ŭ «varanok» i pavieźli ŭ bok Hrušaŭskaj.
Jak što bolšaść z taje hrupy mieła ŭłasnyja aŭto, pastanavili ruchacca za «varankom». Adnak i za tymi vypraviłasia mašyna ź ludźmi ŭ cyvilnym.
?
Šanoŭnyja suajčyńniki, kalehi, siabry!
Z 5 kastryčnika 2006 h. praciahvajecca post-haładoŭka chryścijanaŭ u padtrymku carkvy «Novaje žyćcio», jakaja patrabuje skasavać pastanovu Mienharvykankamu ab prymusovym prodažy budynku carkvy.
Na słovach paabiacaŭšy vyrašyć prablemu praz Vyšejšy haspadarčy sud, čynoŭniki stvaryli sytuacyju niavyśvietlenaści i čakańnia, jakoje moža ciahnucca tydni i navat miesiacy. Z humanitarnaha i etyčnaha hledzišča zaciahvańnie absalutna niedapuščalnaje.
Ciapier idzie ŭžo 21-šy dzień haładoŭki. Heta značyć, što pačaŭsia zvarotny adlik času da taho momantu, kali praz abyjakavaść i pasiŭnaść biełaruskaha hramadztva pačnuć pamirać ludzi, jakija nia majuć inšaj mahčymaści abaranić svaje pravy.
Siońnia prosta vykazać padtrymku ŭžo niedastatkova, a sprečki pra druharadnyja aspekty stali niedarečnymi. Ad tych, kamu nieabyjakavy los hetych ludziej, patrabujucca salidarnyja dziejańni.
Dla raźviazańnia sytuacyi i vyratavańnia žyćciaŭ nieabchodnaja arhanizacyja masavaha i mocnaha ŭździejańnia na dziaržaŭnyja orhany u jak najkaraciejšy termin. Takaja zadača vykanalnaja tolki dla šyrokich hramadzkich siłaŭ. Na nas lažyć adkaznaść za vynik kanfliktu i za žyćci ludziej.
My prapanujem hramadzianam Biełarusi – aktyvistam hramadzkich abjadnańniaŭ, relihijnych arhanizacyjaŭ, intelihiencyi, pradstaŭnikam biznesu, dziejačam kultury, sabracca na Hramadzianskuju naradu dla arhanizacyi salidarnych dziejańniaŭ, kab dapamahčy vyratavać ludziej, što ŭdzielničajuć u poście-haładoŭcy.
Asnoŭnaj zadačaj, jakuju musić vyrašyć Hramadzianskaja narada, jość raspracoŭka i ažyćciaŭleńnie mierapryjemstvaŭ (akcyjaŭ), jakija buduć uździejničać na dziaržaŭnyja struktury i asobnych čynoŭnikaŭ, adkaznych za sytuacyju. Nia mienš važnaj zadačaj jość taksama chutkaja mabilizacyja hramadzkaha mierkavańnia ŭ Biełarusi i zamiežžy.
My prapanujem sabrać Hramadzianskuju naradu ŭ subotu, 28 kastryčnika, a 12:00. Miesca budzie paźniej paviedamlena asobam, jakija abvieściać pra svoj namier uziać udzieł.
Dałučycca da bližejšych dziejańniaŭ možna ŭ 2 sposaby:
1. Albo asabista ŭziać udzieł u pracy ŭ subotu 28 kastryčnika.
2. Albo, u vypadku niemahčymaści prysutničać asabista, vykazać svaju padtrymku idei Hramadzianskaj narady i ŭnieści svajo imia ŭ skład udzielnikaŭ salidarnych dziejańniaŭ.
Prosim usich, chto hatovy ŭ toj ci inšy sposab udzielničać u hetaj pracy, paviedamić ab hetym jak najchutčej na eł.adras [email protected] ci praz telefon +375 29 6536080 (z 15 hadzinaŭ 26 kastryčnika 2006 h.).
Z pavahaj,
Inicyjatyŭnaja hrupa
?
«Zhurtavańnie biełarusaŭ śvietu «Baćkaŭščyna» padtrymała ŭdzielnikaŭ akcyi «post-haładoŭka»
MHA «Zhurtavańnie biełarusaŭ śvietu «Baćkaŭščyna» dasłała list u pres-centar «Novaha žyćcia» u padtrymku ŭdzielnikaŭ akcyi. U liście vykazvajecca zakłapočanaść i razumieńnie prablemaŭ, što paŭstali pierad pratestanckaj abščynaj. Sytuacyja vakoł carkvy «Novaje žyćcio» nahadvaje adrynutuju historyjaj leninska-stalinskuju i chruščoŭskuju baraćbu z relihijaj i patychaje palitykaj «vajaŭničaha ateizmu», – viadziecca ŭ zajavie.
Abjadnańnie źviartajecca da ŭsich zacikaŭlenych aficyjnych asobaŭ i hramadzkich strukturaŭ z prośbaj jak najchutčej vyrašyć uźnikły kanflikt z ulikam pažadańniaŭ viernikam i najdalej paźbiahać hetkich incydentaŭ na relihijnaj hlebie.
Na siońnia, 26 kastryčnika, u poście-haładoŭcy prymajuć udzieł 111 čałaviek. 34 čałavieki ŭvieś čas znachodziacca ŭ pamiaškańni carkvy, 40 haładajuć pa-za carkvoj, padtrymlivajuć akcyju ŭ inšych haradoch 37 viernikaŭ.
?
Pastaru «Novaha žyćcia» pahražaje štraf 6 młn. rubloŭ
Siońnia pastar carkvy «Novaje žyćcio» Viačasłaŭ Hančarenka byŭ papiaredžany Mienskim haradzkim sudom ab adkaznaści za nievykanańnie rašeńnia sudu ŭ vyhladzie štrafu u pamiery da 200 bazavych vieličyniaŭ (6 młn. 200 tys. biełaruskich rubloŭ).
Pra heta stała viadoma ź lista Haspadarčaha sudu, datavanaha 23 kastryčnikam. Havorka viadziecca pra patrabavańnie vyzvalić budynak carkvy paśla jaho prymusovaha vykupu.
U liście taksama paviedamlałasia, što z rachunku carkvy śpisvajecca dziaržpošlina ŭ pamiery 310 tysiač za prymusovaje vykanańnie sudom rašeńnia Mienharvykankama ab prodažy budynku.
Praŭnik carkvy Siarhiej Łukanin nazvaŭ heta prajavaj cynizmu: «Vierniki, čakajučy pazytyŭnaha rašeńnia sudu, uvieś hety čas znachodziacca ŭ haładoŭcy. Ale pieršaj viestkaj z Haspadarčaha sudu, kudy my źviarnulisia na prapanovu Aleha Pralaskoŭskaha, stałasia papiaredžańnie pra vialiki štraf».
25 kastryčnika carkva «Novaje žyćcio» nakiravała aficyjny list u Ministerstva achovy zdaroŭja. U im viadziecca pra toje, što iduć užo 20-ja sutki akcyi pratestu. 11 čałaviek udzielničajuć u akcyi ad samaha pačatku, stan zdaroŭja hetych ludziej rezka paharšajecca, a 2 čałavieki ŭžo špitalizavanyja.
?
Try tydni doŭžycca «post-haładoŭka» ŭ carkvie «Novaje žyćcio».
21 kastryčnika na płoščy Banhałor prajšoŭ dazvoleny haradzkimi ŭładami mitynh u padtrymku carkvy «Novaje žyćcio». Na akcyju sabrałasia kala tysiačy čałaviek z roznych haradoŭ Biełarusi. Udzielniki mitynhu pryniali rezalucyju. U joj, aprača patrabavańniaŭ viarnuć budynak carkvy viernikam i nadać jamu status kultavaha, prahučała patrabavańnie źmienaŭ u zakon ab svabodzie vieravyznańnia. Ciapierašni varyjant zakonu, na ich dumku, nosić dyskryminujučy charaktar, bo pazbaŭlaje viernikaŭ prava na svabodu vybaru miesca praviadzieńnia bohasłužeńniaŭ.
25 kastryčnika vierniki carkvy «Novaje žyćcio» źviarnulisia sa skarhaj u Prakuraturu z prośbaj pryciahnuć da kryminalnaj adkaznaści aŭtara i ŭdzielnikaŭ pakazanych telekanałam «Staličnaje telebačańnie» siužetaŭ: supracoŭnicu STB Ludmiłu Džurajevu, kiraŭničku adździełu ŭ spravach relihijaŭ i nacyjanalnaściaŭ Mienharvykankamu Ału Rabicavu i kandydata histaryčnych navuk Ivana Januškieviča.
Zhodna ź biełaruskim zakanadaŭstvam, 19 kastryčnika carkva padała zajavu z patrabavańniem da kiraŭnictva Staličnaha telebačańnia raźmiaścić abviaržeńnie niepraŭdzivaj infarmacyi pra carkvu «Novaje žyćcio», što prahučała ŭ vypuskach navinaŭ 14 i 15 kastryčnika.
Kančatkovaje rašeńnie źviarnucca ŭ prakuraturu było pryniataje paśla telefonnaj hutarki z praŭnikam telekanału Halinaj Dvarcovaj, jakaja zajaviła: «Pišycie kudy chočacie. Nas heta nie chvaluje».
Niama dahetul adkazu na skarhu, padadzienuju u Vyšejšy haspadarčy sud vosiem dzion tamu. Pavodle infarmacyi kiraŭnictva carkvy, za razhlad skarhi nichto jašče nia braŭsia. U suviazi z hetym vierniki carkvy dasłali ŭ Administracyju prezydenta i Haspadarčy sud admysłovy zvarot. 27 čałaviek ź liku haładoŭnikaŭ abvieścili pra hatovaść pratestavać datul, pakul hetaje pytańnie nia vyrašycca.
Haładoŭniki starejšaha vieku vychodziać z akcyi pratestu z pryčyny abvastreńnia sardečna-sudzinnych zachvorvańniaŭ. U aŭtorak špitalizavali najstarejšuju ŭdzielnicu pratestu -- 60-hadovuju Natallu Ivanovu. Daktary pastavili joj dyjahnazy hipertenzija, bradykardyja dy išemija.
U sieradu špitalizavali ŭdzielnicu akcyi pratestu, jakaja prahaładała 16 dzion, Tacianu Varancovu. Jak i Natallu Ivanovu, jaje advieźli ŭ 1 kliničnuju bolnicu.
Haładoŭka ŭvajšła ŭ krytyčnuju stadyju, kali ŭźnikaje pahroza niezvarotnych źmienaŭ u arhaniźmie haładoŭnikaŭ. Tym časam ułady pa-raniejšamu maŭčać.
?
Vierniki carkvy patrabujuć terminova vyrašyć ichniaje pytańnie
Fizyčny stan haładoŭnikaŭ paharšajecca – 2 čałavieki špitalizavanyja. Medyki prahnazujuć masavy zvarot u bolnicu tych, chto haładaje ad pačatku akcyi
Siońnia vierniki carkvy «Novaje žyćcio» dasłali čynoŭnikam Vyšejšaha haspadarčaha sudu, Administracyi prezydenta RB i Ŭpaŭnavažanamu ŭ spravach relihii i nacyjanalnaściaŭ pry Saviecie Ministraŭ RB admysłovy zvarot. U im vysunuta patrabavańnie da hetych viedamstvaŭ nie zaciahvać z rašeńniem pytańnia carkvy «Novaje žyćcio», bo zdaroŭje ludziej budzie zaležać ad chutkaści ich dziejańniaŭ.
Carkva padała skarhu ŭ Vyšejšy haspadarčy sud vosiem dzion tamu, ale, pavodle infarmacyi pres-centru, na kaniec pracoŭnaha dnia ŭ piatnicu 20 kastryčnika za razhlad skarhi jašče nichto nia braŭsia.
27 čałaviek z tych, chto stała znachodzicca ŭ carkvie, pryniali rašeńnie ŭdzielničać u biesterminovaj haładoŭcy, pakul ułady nie vykanajuć ich patrabavańniaŭ.
Fizyčny stan udzielnikaŭ haładoŭki vyklikaje nieŭpakoj. Na siońnia dźvie žančyny ź liku udzielnikaŭ akcyi špitalizavanyja ŭ 1-ju haradzkuju kliničnuju bolnicu. Jašče adna žančyna ad špitalizacyi admoviłasia. Hetyja žančyny na rekamendacyi lekaraŭ kinuli haładać dzień tamu.
Pavodle stanu na 25 kastryčnika, u poście-haładoŭcy biaruć udzieł 110 čałaviek. Ź ich u carkvie stała znachodziacca 33, pa-za carkvoj – 40, i ŭ inšych haradoch haładajuć 37 čałaviek.
?
STB nie chvaluje skarha ŭ prakuraturu
Praŭnica Staličnaha telebačańnia paviedamiła, što nia maje času zajmacca pytańniami ŭzajemaadnosin telekanału z carkvoj i što haładoŭka viernikaŭ jaje nie datyčyć
Zaŭtra, 25 kastryčnika, vierniki carkvy «Novaje žyćcio» źviernucca sa skarhaj u Prakuraturu Respubliki Biełaruś z prośbaj pryciahnuć da kryminalnaj adkaznaści aŭtara i ŭdzielnikaŭ pakazanych telekanałam «Staličnaje telebačańnie»: supracoŭnicu STV Ludmiłu Džurajevu, kiraŭničku adździełu ŭ spravach relihijaŭ i nacyjanalnaściaŭ Mienharvykankama Ału Rabicavu i kandydata histaryčnych navuk Ivana Januškieviča.
Zhona biełaruskaha zakanadaŭstva, 19 kastryčnika carkva padała zajavu z patrabavańniem da kiraŭnictva Staličnaha telebačańnia raźmiaścić abviaržeńnie iłžyvaj infarmacyi pra carkvu «Novaje žyćcio», što prahučała ŭ vypuskach navinaŭ 14 i 15 kastyčnika.
Kančatkovaje rašeńnie źviarnucca ŭ prakuraturu było pryniataje paśla telefonnaj hutarki z praŭnikam telekanału sp. Dvarcovaj. Z hutarki ź joj stała zrazumieła, što hetaje pytańnie dahetul navat nie razhladajecca kiraŭnictvam kanału, bo ŭ praŭnicy «niama času hetym zajmacca» i ŭvohule «haładoŭka viernikaŭ jaje nie datyčyć». Paviedamleńnie pra zvarot u prakuraturu nie raschvalavaŭ Halinu Dvarcovu: «Pišycie kudy chočacie. Nas heta nie chvaluje».
Adnu z udzielnic ładžanaj carkvoj «Novaje žyćcio» akcyi pratestu, jakaja ŭčora spyniła haładoŭku, siońnia špitalizavali. Medyka vyznačyli žančynie dyjahnazy hipertenzija, bradzikardyja dy išemija. Natalla Ivanova najstarejšaja ŭdzielnica postu-haładoŭki, joj 60 hod. Nahadajem, što jašče try čałavieki vyklikajuć u medykaŭ niespakoj i znachodziacca pad ich pilnym nahladam.
Z pryjemnaha: uviečary carkvu i jaje prychadžanaŭ, što trymajuć post, naviedaŭ eks-vakalist «Novaha Jerusalimu» Alaksandar Patlis. Jon padaravaŭ žančynam-udzielnicam postu ružy.
?
Try čałavieki vyjšli z postu-haładoŭki pavodle stanu zdaroŭja. Jašče troje znachodziacca pad pilnym nahladam daktaroŭ. Heta ludzi stałaha ŭzrostu z sardečna-sudzinnymi zachvorvańniami.
Pavodle stanu na ranicu 24 kastryčnika, u poście-haładoŭcy biaruć udzieł 103 čałavieki. Ź ich u carkvie ŭvieś čas znachodziacca 34 čałavieki, 32 vierniki pratestujuć pa-za carkvoj, naviedvajučysia siudy paśla pracy, u inšych haradoch akcyju pratestu padtrymlivajuć 37 čałaviek.
Pavodle słovaŭ supracoŭnicy pres-słužby carkvy «Novaje žyćcio» Iny Davydovič, učora z postu-haładoŭki vyjšli 3 čałavieki. Heta ludzi stałaha ŭzrostu, jakija trymali post ad pačatku akcyi. Praz prablemy z sercam ich nazirali lekary. Na siońnia jašče troje haładoŭnikaŭ znachodziacca pad pilnym nahladam lekaraŭ – jany taksama majuć sardečna-sudzinnyja zachvorvańni. Samačućcie astatnich haładoŭnikaŭ zdavalniajučaje.
Pobač z terytoryjaj carkvy znachodzicca budaŭničy vahon. Nieviadomyja čas ad času nazirajuć ź jaho ŭ binokl za budynkam carkvy. Siońnia hetaje nazirańnie adnaviłasia. «My nia viedajem, chto hetyja ludzi, ale nazirajem za imi ŭ svoj binokl. Pierahladajemsia», – śmiajecca I.Davydovič. Pakul budan byŭ pusty, na jaho nalapili papierčynu z daścipnym nadpisam «Sakretny naziralny punkt KDB».
?
23 kastryčnika carkvu naviedaŭ pastar carkvy «Novaje pakaleńnie» z h.Jałhavy (Łatvija) Uładzimier Ivanoŭ z žonkaj Vandaj. Vierniki jahonaj carkvy malilisia ŭ minułuju niadzielu za biełaruskich adzinaviercaŭ i abvieścili post. Pavodle słovaŭ łatyskaha pastara, akcyja pratestu biełaruskich viernikaŭ – nia prosta akcyja. Takim čynam pišacca historyja našaj krainy. Jon vieryć, što namahańniami biełarusaŭ Załaty viek, jaki byŭ na Biełarusi ŭ XVI st., vierniecca.
Siońnia pa abiedzie (24 kastryčnika) budzie vyrašanaje pytańnie nakont zvarotu ŭ prakuraturu na dziejańni supracoŭnikaŭ STB. «Hetaje pytańnie znachodzicca pakul na razhladzie i musić być razhledžanaje na pracoŭnym pasiedžańni kiraŭnictva carkvy», – adznačyŭ praŭnik carkvy Siarhiej Łukanin. Jak jon kaža, carkva nie dačakałasia ad Staličnaha telebačańnia jakoj-kolviek reakcyi na patrabavańnie źniapraŭdzić vykładzienuju ŭ repartažach Ludmiły Džurajevaj infarmacyju. «Siońnia ŭ druhoj pałovie dnia ci zaŭtra ŭranicy my źvierniemsia ŭ prakuraturu z zajavaj ab zaviadzieńni kryminalnaj spravy pavodle art.188 KK («Paklop»).
?
Milinkievič u «Novym žyćci»
Pierad viečarovym bohasłužeńniem carkvu «Novaje žyćcio» naviedaŭ Alaksandar Milinkievič.
?
Post-haładoŭka tryvaje ad 5 kastryčnika
Pavodle stanu na 23 kastryčnika, kolkaść haładoŭnikaŭ składaje 101 čałaviek. Ź ich znachodziacca ŭ carkvie – 38, pa-za carkvoj – 27, padtrymlivajuć akcyju ŭ inšych haradoch – 36. Z haładoŭki vychodziać zbolšaha ludzi, u jakich abvastrylisia chraničnyja zachvorvańni. Niestaje lekaraŭ. Hruntoŭna ahledzieć jany mohuć tolki tych haładoŭnikaŭ, što stała znachodziacca ŭ carkvie. Tyja, što nie pakinuli haładać, majuć zdavalniajučy stan zdaroŭja, adnak trymajucca i majuć nadzieju na pieramohu. «Siońnia ŭnačy ŭ carkvie zastavałasia kala 80 čałaviek. I bolšaść ź ich malilisia ŭsiu noč», – kaža Alena Papłaŭskaja, supracoŭnica pres-słužby carkvy. Pavodle jaje słovaŭ, ludzi natchnionyja subotnim mitynham i padtrymkaj u Biełarusi i z-pa-za jaje miežaŭ. U piatnicu ŭ Maskvie tamtejšyja pratestanty carkvy «Emanuił» pikietavali biełaruskuju ambasadu i maskoŭskuju meryju. U bližejšym časie padobnyja akcyi čakajucca ŭ inšych susiednich ź Biełarusiaj krainach.
Siońnia ŭviečary sychodzić čas, adviedzieny dziaržaŭnamu telekanału STB, kab adreahavać na patrabavańnie carkvy źniapraŭdzić raspaŭsiudžanuju kanałam infarmacyju. Kali hetak nie patrapić, dyk zaŭtra praŭnik «Novaha žyćcia» źvierniecca ŭ pravaachoŭnyja orhany z zajavaj ab zaviadzieńni kryminalnaj spravy pa artykule «Paklop».
Internet-statystyka
Cieraz uvieś čas praviadzieńnia akcyi sajt carkvy «Novaje žyćcio» naviedali 8600 čałaviek. Štodzień staronku www.newlife.by naviedvaje nia mienš jak 450 čałaviek, štodzionnaja kolkaść prahladaŭ składaje 850. 30% naviednikaŭ sajtu – žychary Biełarusi. Pa 8% składajuć internaŭty z Rasiei j ZŠA (uradavy sektar ZŠA – 224 naviedvańniaŭ sajtu). Siarod haściej sajtu zarehistravanyja žychary Izrailu, Čechii, Synhapuru, Aŭstryi, Niamieččyny, Anhielščyny, Polščy, ahułam kala 30 krainaŭ.
?
Pavodle stanu na subotu, 21 kastryčnika, trymajuć post-haładoŭku 142 čałavieki, ź ich 39 u carkvie, 67 pa-za carkvoj, 36 u inšych haradach. Da śpisu haradoŭ dałučylisia Čašniki i Białyničy.
Na płoščy Banhałor zakančvajecca mitynh u padtrymku patrabavańniaŭ carkvy «Novaje žyćcio». Na dadzieny momant sabrałosia kala 1000 čałaviek. Jość transparanty z nazvami haradoŭ, pradstaŭniki jakich prysutnyja na akcyi. U natoŭpie łunajuć lozunhi «Biełaruś dla Chrysta», «Čamu parušajecca kanstytucyja?» i inš. Siarod hledačoŭ šmat niepratestantaŭ. Vystupali pradstaŭniki z Maskvy, jakija ŭčora pikietavali biełaruskaje pasolstva ŭ Maskvie. Udzielnikaŭ mitynhu zaprasili paśla akcyi ŭziać udzieł u bohasłužeńni ŭ carkvie «Novaje žyćcio».
?
Pa stanie na subotu, 21 kastryčnika, trymajuć post-haładoŭku 142 čałavieki, ź ich 39 u carkvie, 67 pa-za carkvoj, 36 u inšych haradach. Da śpisu haradoŭ dałučylisia Čašniki i Białyničy.
Da viernikaŭ pryjaždžała niamieckaje telebačańnie. Jano zdymała siužet u carkvie, a siońnia majecca rabić repartaž ź mitynhu na Banhałory.
Naviedvajucca da viernikaŭ i niaklikanyja hości. Stali rehularna pryjaždžać mašyny ź ludźmi ŭ cyviłnym. Tyja chodziać la carkvy, a pry sprobie vyjści na kantakt źjaždžajuć.
U koliś hłuchim pryvatnym sektary na tupikovaj vułačcy źjaviłasia DAI. Inspektary praviarajuć dakumenty ŭ tych, chto padjaždžaje da carkvy.
?
19 kastryčnika kiraŭnictvu telekanału była pieradadzienaja aficyjnaja zajava z patrabavańniem dać carkvie mahčymaść źniapraŭdzić infarmacyju, ahučanuju STB. Pry hetym infarmacyja musić prahučać pa tych ža pytańniach i ŭ tym abjomie, što prahučała 14 i 15 kastryčnika ŭ prahramach «24 časa» i «168 časov».
U zajavie, miž inšym, adznačajecca, što žurnalistka Staličnaha telebačańnia Ludmiła Džurajeva, jakaja padrychtavała hety repartaž, u svaich vykazvańniach była nia prosta subjektyŭnaja, ale j dazvoliła sabie vykazvańni, jakija absalutna nie adpaviadali praŭdzie i nanieśli škodu honaru i hodnaści ludziej.
Varta adznačyć, što siužet STB, pryśviečany carkvie «Novaje žyćcio», dosyć hruba zmantažavany. Pra heta śviedčyć zrobleny pradstaŭnikom carkvy adnačasova z aperataram Staličnaha telebačańnia videazapis. Siarod inšych, praŭniku carkvy zadali pytańni pra toje, jakim čynam tut kłapociacca pra stan zdaroŭja haładoŭnikaŭ, a taksama jak doŭha tryvaćmie akcyja pratestu. Sp.Łukanin adkazaŭ na heta, što, biezumoŭna, pra ludziej kłapociacca i navat uziali z kožnaha raśpisku pra dazvoł na prymusovy vyvad z haładoŭki ŭ skrajnich vypadkach. Nakont terminovaści haładoŭki jon adznačyŭ, što jana biesterminovaja, to bok budzie praciahvacca pakul nie vykanajucca patrabavańni haładoŭnikaŭ. U siužecie, pakazanym na STB, pytańni apuścili, a adkaz S.Łukanina prahučaŭ prykładna tak: «My ŭziali ź ludziej admysłovyja zajavy, što budziem stajać da kanca».
U kadar patrapili j dzieci, što naviedvajuć niadzielnuju škołku. Ł.Džurajeva śćviardžała, što dziaciej taksama dałučyli da akcyi pratestu, što nie adpaviadaje rečaisnaści.
U tekście taksama prakamentavanyja vystupleńni načalnicy Adździełu ŭ spravach relihijaŭ i nacyjanalnaściaŭ Mienharvykankamu A.Rabicavaj i eksperta I.Januškieviča. Spn.Rabicava, u pryvatnaści, śćviardžała pra toje, što carkva nabyła ŭčastak ziamli ŭ miascovaha kałhasu, u toj čas, kali dziejnaje zakanadaŭstva praduhledžvaje dla jurydyčnych asobaŭ tolki arendu ziamli. Pavodle ž słovaŭ čynoŭnicy vychodzić, što carkva paśla ŭvachodžańnia terytoryi, na jakoj jana mieścicca, u miežy horadu nie žadaje rasstavacca z łasym kavałkam ziamli, jaki značna padaražeŭ za apošni čas. Ekspert Januškievič zapeŭniŭ telehledačoŭ, što biełaruskija pratestanckija supołki nia cierpiać ucisku i padčas apošniaj pierarehistracyi ŭsie z pośpiecham prajšli hetuju praceduru. Carkva «Novaje žyćcio» taksama. Jak kaža praŭnik carkvy Siarhiej Łukanin, nivodnaja z troch sprobaŭ pierarehistravacca nie pryviała da pośpiechu. Pry hetym čynoŭniki nie abciažarvali siabie tłumačeńniem pryčynaŭ admovy ŭ pierarehistracyi.
Zhodna ź biełaruskim zakanadaŭstvam, kali carkva nie atrymaje adkazu na svajo patrabavańnie da 23 kastryčnika, jana maje prava źviarnucca z zajavaj u pravaachoŭnyja orhany ab zaviadzieńni kryminalnaj spravy pa artykule «Paklop».
Na dadzieny momant (20 kastryčnika) u poście-haładoŭcy prymajuć udzieł 159 čałaviek. Ź ich 37 uvieś čas znachodziacca ŭ carkvie, pa-za carkvoj – 86 čałaviek, u inšych haradach akcyju padtrymlivajuć 36 viernikaŭ.
?
Carkva «Novaje žyćcio» padała skarhu ŭ Najvyšejšy Haspadarčy Sud
Ad STB patrabujuć eteru. U vypadku admovy – sud
18 kastryčnika praŭnik carkvy «Novaje žyćcio» padaŭ na imia staršyni Najvyšejšaha Haspadarčaha Sudu RB Kamiankova V.S. skarhu na rašeńnie Haspadarčaha sudu h.Miensku ad 27.10.2005 h. Pavodle jaho carkvie było admoŭlena ŭ pryznańni niezakonnym rašeńnia Mienharvykankamu ab pazbaŭleńni prava karystańnia ziamloj i prymusovym vykupie budynku.
U carkvie strymana-aptymistyčna vykazvajucca nakont prahnozaŭ na vynik zvarotu ŭ sud: «Vierniki na toje j vierniki, kab vieryć u lepšaje. Tym bolš, što ŭłada zrabiła faktyčna pieršy krok nasustrač u spravie vyrašeńnia našaj prablemy. Pačakajem, mahčyma, užo chutka pabačym, čym abierniecca hety krok».
Skarha takoha kštałtu musić być razhledžanaja na praciahu adnaho miesiaca z momantu padačy.
Siońnia pradstaŭniki carkvy majuć źviarnucca da kiraŭnictva STB z patrabavańniem eteru dla abviaržeńnia raspaŭsiudžanaj pra carkvu staličnym kanałam infarmacyi. Kali im budzie admoŭlena, carkva źvierniecca ŭ sud. Nahadajem, što padčas vizytu da carkvy zdymačnaj hrupy STB i čynoŭnikaŭ Mienharvykankamu pradstaŭnik carkvy vioŭ ŭłasnuju zdymku padziei. Admysłova da pres-kanferencyi byŭ zapisany dysk z dvuma siužetami – źniatym STV i carkvoj.
Pavodle stanu na 19 kastryčnika, u poście-haładoŭcy prymajuć udzieł 153 čałavieki, ź jakich 37 čałaviek stała znachodziacca ŭ pamiaškańni, 80 – pratestujuć pa-za carkvoj, 36 – u inšych haradoch. Učorašniaja viečarovaja słužba sabrała kala 600 viernikaŭ, na joj prysutničali dva dziasiatki pastaraŭ. Na noč u carkvie zastavałasia 136 čałaviek.
?
Pralaskoŭski ad imia Łukašenki: «Heta dobraja carkva, i joj treba dapamahčy»
Haładoŭka-post u padtrymku carkvy «Novaje žyćcio» praciahvajecca druhi tydzień. Ułady pajšli na kantakt z haładoŭnikami.
Kolkaść udzielnikaŭ akcyi pratestu pastupova skaračajecca za košt ludziej stałaha vieku. Pry hetym, adnak, šyrycca hieahrafija padtrymki biełaruskich pratestantaŭ. Da 17 kastryčnika ŭłady dziejničali zvykłymi metadami: kampanija dyskredytacyi ŭ ŚMI, ihnaravańnie patrabavańniaŭ, rekahnascyroŭka na miascovaści siłami milicyi.
Adnak 17 kastryčnika zdaryłasia toje, na što ŭłady raniej nikoli nie išli: pastara carkvy zaprasili na sustreču z načalnikam hałoŭnaha idealahičnaha ŭpraŭleńnia Administracyi prezydenta Aleham Pralaskoŭskim. U sieradu z hetaj nahody adbyłasia pres-kanferencyja. Nahodaj dla jaje byli vyniki pieramovaŭ u Administracyi prezydenta dy siužety «Staličnaha telebačańnia» pra padziei vakoł carkvy «Novaje žyćcio». Pastar Viačasłaŭ Hančarenka raspavioŭ, što jon painfarmavaŭ A.Pralaskoŭskaha ab usim, što dziejecca vakoł «Novaha žyćcia». Na što ŭ adkaz pačuŭ, što prezydent užo aznajomleny z sytuacyjaj i vykazaŭsia nakont carkvy nastupnym čynam: «Heta dobraja carkva, i joj treba dapamahčy. Ale tolki ŭ pravavych ramkach».
A.Pralaskoŭski nastojliva paraiŭ pastaru carkvy źviarnucca ŭ Haspadarčy sud, a taksama prasiŭ vyvieści ludziej z haładoŭki, spasyłajučysia na toje, što sprava razhladajecca na najvyšejšym uzroŭni.
V.Hančarenka kaža, što haładoŭka-post budzie praciahvacca da taho, pakul vierniki nie atrymajuć kančatkovy vynik: «Ja nie prypomniu vypadku, kab ułady pazytyŭna aceńvali takija voś ačahi niespakoju. Da ŭsiaho, na praciahu apošnich šaści hod my ni razu nie atrymali stanoŭčaha adkazu na svaje zvaroty».
STB padlivaje aleju
Na minułym tydni na haładoŭku źviarnuła ŭvahu «Staličnaje telebačańnie». U tuju piatnicu da carkvy pryjechała zdymačnaja hrupa STB, ź imi dva čałavieki, jakija nazvalisia čynoŭnikami z adździełu kultury i adździełu ŭ spravach relihii Maskoŭskaha rajonu, i mašyna chutkaj dapamohi z nadpisam «reanimacyja».
Daviedaŭšysia, što hości pryjechali nia dziela pieramovaŭ, vierniki admovilisia puskać ich u chram. Razmovu z pryježdžymi vioŭ juryst «Novaha žyćcia». Čynoŭniki skazali na kameru, što prapanoŭvali carkvie inšy ŭčastak i inšy budynak, jaki nie ŭ avaryjnym stanie. Juryst nazvaŭ hetyja słovy chłuśnioj. Paśla hetaha hości jašče paŭhadziny chadzili vakoł budynku, sprabavali zdymać praz šyby.
Potym na kanale STB byŭ pakazany siužet, pavodle jakoha žyćciu pratestujučych nibyta pahražaje niebiaśpieka. Maŭlaŭ, budynak pažaraniebiaśpiečny. Byli pakazanyja drovy, składzienyja z tylnaha boku budynku, pry hetym śćviardžałasia, što adna kinutaja zapałka moža pryvieści da trahiedyi. Raniej tam ža prahučała infarmacyja, što nibyta akcyja pratestu maje palityčnuju skiravanaść i ščodra finansujecca Zachadam.
Na pres-kanferencyi ŭ sieradu byli prademanstravanyja dva siužety: adzin źniaty STB i stužka, zroblenaja pradstaŭnikom carkvy. Pry supastaŭleńni robicca vidavočnym mantaž STB stužki, u vyniku čaho sens słovaŭ jurysta carkvy całkam skažony.
Lekary nia bačać patreby
Kolkaść haładoŭnikaŭ pastupova skaračajecca. Spynili post starejšyja. Lekary z 32-j palikliniki pierastali ahladać haładoŭnikaŭ, niahledziačy na raniejšyja damoŭlenaści. Zatoje ad aŭtorka haładoŭnikaŭ naviedvajuć medyki-chryścijanie z pratestanckich supołak.
Hieahrafija haładoŭki
Na siońnia ŭ akcyi pratestu biaruć udzieł vierniki z troch dziasiatkaŭ haradoŭ. Niekatoryja hramady dałučajucca da akcyi symbalična. Tak, mienskaja carkva «Błahavieščańnie» poŭnym składam (450 čałaviek) abvieściła adnadzionny post-malitvu na znak salidarnaści.
Kirmaš, paśla mitynh
Haradzkija ŭłady dazvolili praviadzieńnie zajaŭlenaha pratestantami na hetuju subotu mitynhu ŭ padtrymku «Novaha žyćcia» na płoščy Banhałor. Adnak pieranieśli jaho z 14–j hadziny na viečar a 18-j. Pieranos patłumačyli tym, što ŭ toj ža dzień na Banhałory adbudziecca vosieński kirmaš.
Na čas mitynhu ŭ carkvie zastaniecca 100 čałaviek – tyja, chto pratestuje, nie pakidajučy pamiaškańnia, i achova. Na płoščy čakajucca vystupy pastaraŭ i nieabyjakavych ludziej.
?
17 kastryčnika ŭviečary pastar carkvy «Novaje žyćcio» mieŭ sustreču z načalnikam hałoŭnaha idealahičnaha ŭpraŭleńnia Administracyi prezydenta Aleham Pralaskoŭskim.
Kab vyrašyć spravu z budynkam, sp.Pralaskoŭski nastojliva raiŭ carkvie źviarnucca ŭ haspadarčy sud i spynić haładoŭku, bo ichniaje «pytańnie ŭžo vyrašajecca na najvyšejšym uzroŭni». Aleh Pralaskoŭski paviedamiŭ pastara, što mieŭ sustreču z prezydentam, i toj kazaŭ, što «heta dobraja carkva, i joj treba dapamahčy, ale tolki ŭ praŭnych ramkach».
Tym časam pastar paviedamiŭ sp.Aleha, što carkva i tak dziejničała ŭ praŭnych ramkach, ale vialikich spadzievaŭ na vyrašeńnie pytańnia ŭ takich ramkach niama, bo za apošnija šeść hadoŭ carkva nie atrymała z sudu nivodnaha stanoŭčaha vodhuku. Tym nia mienš, zajavu dasłali i čakajuć na vynik.
Siužet STB proci videazapisu haładoŭnikaŭ
Staličny kanał STB u minułuju piatnicu rabiŭ zdymki la carkvy «Novaje žyćcio». Adnačasna z STB vierniki rabili svoj videazapis. Siužety STB pakazali 14 i 15 kastryčnika. Adnak jany vyklikali šyroki rozhałas niepraŭdzivaściu adlustravanaj u ich infarmacyi. Videazapis viernikaŭ jaskrava davodzić, što siužet STB, u jakim raspaviadajecca, nibyta carkva zmušaje viernikaŭ haładać, skažony cieraz kupiravańnie.
?
Dzień nadziei ŭ «Novym žyćci»
Siońniašni dzień dla ŭdzielnikaŭ pastu-haładoŭki prajšoŭ spakojna: milicyjanty ŭ cyvilnym nie turbavali, STB nie zdymała siužetaŭ. Uviečary čakajecca vizyt lekaraŭ, jakich znajšli pryvatnym čynam. Stan zdaroŭja niekatorych udzielnikaŭ haładoŭki pahoršyŭsia, tamu medyčny ahlad nieabchodny. Učora z haładoŭki vyjšła žančyna pensijnaha ŭzrostu – abvastryłasia chvaroba. Dvuch čałaviek, što stała znachodzilisia ŭ carkvie i taksama pa stanie zdaroŭja pakinuli haładać, zamianili dvoje mienčukoŭ.
Pavodle stanu na 15 hadzinaŭ u poście-haładoŭcy prymajuć udzieł 169 čałaviek. 32 vierniki stała znachodziacca ŭ carkvie, 100 čałaviek pa-za carkvoj, 37 – pratestujuć u inšych haradoch.
Pastar viciebskaj carkvy «Słova viery», što ciapier znachodzicca siarod haładoŭnikaŭ, paviedamiŭ, što jahonyja prychadžanie dałučajucca da ŭdzielnikaŭ akcyi pratestu i rapačynajuć malitvu ŭ poście.
U pres-słužbie carkvy hetak kamentujuć pieramovy z Pralaskoŭskim: «Zaprašeńnie ŭ Administracyju prezydenta kaža pra istotny zruch u spravie. Spadziajomsia, što ŭ lepšy bok». Zaŭtra a 12-j u budynku carkvy na Kavalova, 72 adbudziecca pres-kanferencyja, pryśviečanaja pieramovam z Administracyjaj prezydenta.
?
Pastar carkvy «Novaje žyćcio» sustreniecca z Pralaskoŭskim
...a tym časam za pośpiech spravy biełaruskich pratestantaŭ molacca ŭ Nihieryi i na Kipry...
Pavodle stanu na ranicu 17 kastryčnika, u poście-haładoŭcy biaruć udzieł 166 čałaviek. Ź ich 30 viernikaŭ uvieś čas znachodziacca ŭ carkvie, 100 čałaviek haładajuć pa-za carkvoj, 36 – u inšych haradoch. Da haradoŭ, dzie ładzicca akcyja pratestu, dałučylisia Ratamka i rasiejski Čalabinsk. Nastroj u haładoŭnikaŭ niebłahi, niahledziačy na toje, što akcyja idzie ciaham 12 sutak.
Učora pastara carkvy Viačasłava Hančarenku zaprasili na sustreču z načalnikam hałoŭnaha idealahičnaha ŭpraŭleńnia Administracyi prezydenta RB Aleham Pralaskoŭskim. Sustreča maje adbycca siońnia a 16:50.
Taksama ŭčora ŭviečary da carkvy pryjaždžali milicyjanty, jakija nie patłumačyli metaŭ svajho vizytu. Niekalki čałaviek u cyvilnym, siarod jakich byŭ aperatar STB, peŭny čas znachodzilisia ŭ aŭto, pryparkavanym la zajezdu na terytoryju carkvy. Potym da ich padyšli načalnik HUUS h.Miensku pałkoŭnik milicyi Najdzienka ŭ supravadžeńni namieśnika načalnika RUUS Maskoŭskaha rajonu h.Miensku pa hramadzkaj biaśpiecy.
Miž inšym, post-haładoŭka, što ładzicca biełaruskimi pratestantami, nie pakidaje abyjakavymi viernikaŭ-pratestantaŭ jak u Biełarusi, tak i daloka za jaje miežami. Zaŭtra mienskaja carkva «Błahoviestije» poŭnym składam (450 čałaviek) abvieścić adnadzionny post-malitvu na znak salidarnaści z adzinaviercami. Prychodziać listy z-za miažy. Finski pastar piša pra toje, što dasłaŭ listy pra padziei vakoł carkvy «Novaje žyćcio» premjer-ministru Finlandyi, lideram palityčnych partyj i Kanhresu. Pastar adnoj ź nihieryjskich cerkvaŭ paviedamiŭ pra štodzionnyja supolnyja malitvy za pośpiech mienskich adzinaviercaŭ. Anhielski pastar abviaściŭ pra mienskija padziei pastaraŭ anhielskich cerkvaŭ, abjadnanych Asamblejaj Božaj. Pastar z Kipru aznajomiŭ ź mienskimi navinami Eŭrapiejski Evanhielski Aljans, što maje adzin hołas u Eŭrakamisii. U bližejšy čas pytańnie ŭcisku biełaruskich pratestantaŭ maje prahučać u Strasburhu. Listy padtrymki prychodziać ź Niamieččyny dy ZŠA. Pastary z Kalarada dasłali listy z prośbaj paspryjać biełaruskim pratestantam u Administracyju Łukašenki.
?
Televizija rychtuje pratestantaŭ da razhonu?
Siońnia na kanale STB byŭ pakazany siužet, pavodle jakoha žyćciu pratestujučych nibyta pahražaje niebiaśpieka.Maŭlaŭ, sam budynak pažaraniebiaśpiečny. Byli pakazanyja drovy, składzienyja z tylnaha boku budynku, pry hetym śćviardžałasia, što adna kinutaja zapałka moža pryvieści da trahiedyi. Učora na tym ža kanale prahučała infarmacyja, što nibyta akcyja pratestu maje palityčnuju śkiravanaść i ščodra finansujecca Zachadam. Viałosia taksama pra toje, što haładoŭka nosić prymusovy charaktar. U carkvie «Novaje žyćcio» kažuć, što mahčyma takim čynam farmujecca hramadzkaja dumka pra nieabchodnaść siłavoha vyrašeńnia kanfliktu.U pres-słužbie nie vyklučajuć, što carkva budzie sudzicca z STB.
Cisk uładaŭ adčuvajuć nia tolki mienskija pratestanty. U Homieli namieśnica kiraŭnika haradzkoj administaracyi pa idealohii nastojliva raiła pastaram homielskich pratestanckich cerkvaŭ ustrymacca ad akcyjaŭ salidarnaści ź mienčukami, abiacajučy ŭ advarotnym vypadku prablemy.
Miž inšym u carkvu praciahvajuć prychodzić listy padtrymki z-za miažy. Pratestanty Čechii, jakija daviedvajucca pra padziei ŭ Miensku z polskich sajtaŭ, abiacajuć uźniać pytańnie pra prablemy biełaruskich kalehaŭ na Ŭsienarodnaj malitoŭnaj kanferencyi, što adbudziecca 27-28 kastryčnika ŭ Prazie.
Mienharvykankam sankcyjanavaŭ mitynh pratestantaŭ na Banhałory 21 kastryčnika. Adnak čas dla akcyi vyznačany niby na ździek — ad 18 da 20 hadzinaŭ.
[18:23, 16 kastryčnika 2006]
?
Pavodle stanu na ranicu 16 kastryčnika, post-haładoŭku trymajuć 175 čałaviek. Ź ich 32 čałavieki ŭvieś čas znachodziacca ŭ carkvie, pa-za carkvoj haładajuć 107 čałaviek, u inšych haradach Biełarusi – 36 čałaviek. Uvohule pa-za Mienskam haładoŭku trymajuć u 28 haradoch, za vychodnyja dałučylisia vierniki ź Biarozy, Biełaaziorsku, Ivacevičaŭ, Niaśvižu, Klecku, Krupak, Salihorsku, Śvietłahorsku, Smalavičaŭ.
Na niadzielnaj słužbie prysutničali 13 pastaraŭ. Siońniašniuju noč u carkvie praviali 86 čałaviek.
Pres-słužba carkvy paviedamlaje pra šyrokuju maralnuju padtrymku ad pratestanckich cerkvaŭ z usiaho śvietu: uražvaje adna ź ličbaŭ – 180 cerkvaŭ Paŭnočna-Zachodniaj federalnaj akruhi Rasiei dasłali listy sa słovami padtrymki.
?
Haładoŭniki-pratestanty nie puścili ŭ carkvu karespandentaŭ STB
Kali vierniki daviedalisia, što hości pryjechali nie dziela pieramovaŭ, to admovilisia puskać ich u carkvu.
Pa stanie na subotu, 14 kastryčnika, post-haładoŭku pratestu trymajuć:
180 čałaviek, ź ich:
33 — niepasredna ŭ carkvie
106 — pa-za carkvoj u Miensku
41 — pa-za Mienskam
Udzielniki akcyi kažuć, što ich nie biantežyć toje, što kolkaść haładoŭnikaŭ pamienieła. Z haładoŭki vychodziać stałyja ludzi, jakim tryvać hoład nie dazvalaje zdaroŭje.
Pašyryłasia hieahrafija haładoŭki – dałučylisia Pastavy i Pinsk.
Učora na viečarovaj słužbie prysutničali 33 pastyry pratestanckich supołak.
Uviečary da carkvy pryjechała zdymačnaja hrupa STB, dva čałavieki, jakija pradstavilisia čynoŭnikami z adździełu kultury i adździełu pa spravach relihii Maskoŭskaha rajonu, a taksama mašyna chutkaj dapamohi z nadpisam «reanimacyja».
Kali vierniki daviedalisia, što hości pryjechali nie dziela pieramovaŭ, to admovilisia puskać ich u carkvu. Razmovu z pryježdžymi vioŭ juryst «Novaha žyćcia». Čynoŭniki skazali na kameru, što prapanoŭvali carkvie inšy ŭčastak, i inšy budynak, jaki byŭ nie ŭ avaryjnym stanie. Juryst nazvaŭ hetyja słovy chłuśnioj. Paśla hetaha hości jašče paŭhadziny chadzili ŭkoła budynku, sprabavali zdymać praz vokny.
Siońnia ab 11-j ranku pryjechała taja samaja zdymačnaja hrupa, ale vierniki znoŭ admovilisia puścić jaje ŭsiaredzinu carkvy, matyvavaŭšy heta tym, što ŭ ich niama davieru da Staličnaha telebačańnia, zasnavalnikam jakoha źjaŭlajecca Mienharvykankam, jaki i čynić škodu carkvie.
?
Pavodle słovaŭ pres-sakratarki carkvy «Novaje žyćcio» Iny Davydovič, post-haładoŭka vyklikaje žyvuju zacikaŭlenaść u ludziej roznych vieravyznańniaŭ i palityčnych pohladaŭ. Dniami haładoŭnikaŭ naviedali niekalki maładych ludziej, što nazvalisia siabrami BRSM. Maładziony prysutničali ŭ carkvie padčas viečarovaj słužby. Ubačanaje zrabiła na ich vialikaje ŭražańnie. Kamsamolcy navat prapanavali jakuju-niebudź dapamohu. Učora z ułasnaj inicyjatyvy pravasłaŭny śviatar naviedaŭ udzielnikaŭ akcyi. Ź jahonych słovaŭ, jon zachacieŭ na ŭłasnyja vočy pabačyć haładoŭku i daviedacca pra akcyju niepasredna na miescy padziejaŭ. Na dadzieny momant u carkvie znachodziacca dźvie pradstaŭnicy ABSE, jakija majuć sabrać nieabchodnuju infarmacyju pra sytuacyju vakoł pratestanckich cerkvaŭ u Biełarusi.
Pavodle stanu na ranicu 13 kastryčnika, post-haładoŭku trymajuć 214 čałaviek. Ź ich 35 čałaviek stała znachodziacca ŭ pamiaškańni carkvy, 139 viernikaŭ haładajuć pa-za budynkam carkvy, 41 čałaviek haładaje ŭ inšych haradoch. Ciapier haładajuć, akramia ŭsiaho, u Lepieli dy Marjinaj Horcy. Paćvierdziłasia infarmacyja nakont Mahilovu, dzie taksama trymajuć post-haładoŭku. Pastar baptysckaj carkvy z Ratamki druhi raz naviedaŭ carkvu, i jak i ŭ pieršy raz – nie z pustymi rukami: pryvioz pitnuju vadu i spalnyja miachi.
Nastroj u ludziej bajavy, niahledziačy na padvyšeńnie cisku ŭ stałych ludziej. Špitalizavany ŭčora mužčyna ŭžo vypisany. Praz abvastreńnie chvaroby piačonak jamu rekamendavali terminova kinuć haładać.
?
Medyki admaŭlajucca ad rehularnaha nahladu za haładoŭnikami
Jak paviedamlałasia raniej, učora carkvu «Novaje žyćcio» naviedali 10 medykaŭ palikliniki №2 Frunzenskaha rajonu. Praŭnik carkvy Siarhiej Łukanin paviedamiŭ, što medyki paviali siabie dziŭna: medahlad adbyŭsia tolki paśla taho, jak byli zanatavanyja pašpartnyja dadzienyja ŭdzielnikaŭ haładoŭki. Pa vynikach ahladu trom čałaviekam było rekamendavana źviarnucca pa dapamohu ŭ špital. Była dasiahnutaja damoŭlenaść ab tym, što medyki buduć naviedvać pratestujučych u intervale ad 8-j pa 20-ju hadzinu štodzień.
Siońnia ŭ carkvu naviedalisia čatyry supracoŭniki palikliniki, jakija paviedamili, što heta apošni vizyt daktaroŭ da pratestantaŭ. Pryčyna: medyki nia bačać važkich pryčynaŭ dla štodzionnaha ahladu haładoŭščykaŭ. Bolš čym dziŭnaja padstava, na dumku sp.Łukanina, asabliva kali ŭličyć stan ludziej, što haładajuć ź pieršaha dnia.
«Doktar skazaŭ, što adpaviednaje rašeńnie pryniata naviersie», – zaznačyŭ praŭnik carkvy. Jon ličyć, što palityka ŭ hetym vypadku iznoŭ pieravažyła nad pavahaj da asoby i zdaroŭja čałavieka. «My prapanavali navat ukłaści damovu ab akazańni płatnych medyčnych pasłuhaŭ, uličvajučy stan ludziej, što haładajuć nia pieršy dzień, i toje, što vyjaŭlenaje padazreńnie na virusny hiepatyt, adnak atrymali admovu».
Varta adznačyć, što kiraŭnictvu carkvy stała viadoma pra nastupnaje: paśla vizytu supracoŭnikaŭ 2-j palikliniki na Kavalova, 72, u Mienharvykankamie byŭ sklikany kamitet pa achovie zdaroŭja. Mahčyma, tam i vyrašyli pytańnie stałaha nahladu za ŭdzielnikami akcyi pratestu. Adzinaje, što prapanavali supracoŭniki palikliniki, dyk heta vyklikać u vypadku vostraj nieabchodnaści chutkuju dapamohu.
Na dadzieny momant špitalizavany adzin čałaviek
Na hetuju chvilinu ŭ pamiaškańni carkvy znachodzicca kala sotni čałaviek. Da hieahrafii postu-haładoŭki dałučyłasia stalica susiedniaj dziaržavy – Kijeŭ. Tam pačaŭ haładać adzin čałaviek. Ad suboty da akcyi maje dałučycca Ratamka: 9 tamtejšych viernikaŭ-baptystaŭ abiacajuć raspačać post-haładoŭku.
?
Da postu-haładoŭki dałučajucca vierniki z novych haradoŭ Biełarusi: z Babrujsku, Biarezina, Homielu i Bychava.
Pavodle stanu na ranicu 12 kastryčnika, u akcyi biaruć udzieł 212 čałaviek. U pamiaškańni carkvy ŭvieś čas znachodziacca 36 čałaviek, 40 čałaviek trymajuć haładoŭku ŭ rehijonach, 136 čałaviek haładajuć pa-za budynkam carkvy, naviedvajučysia tudy ŭviečary. Načavała ŭ carkvie 105 čałaviek. Samačućcie ŭ tych, chto haładaje ad pieršaha dnia, zdavalniajučaje.
Da adnaho z damoŭ pryvatnaha sektaru raz-poraz pryjaždžaje lehkavik čyrvonaha koleru. Siońnia ranicaj jon padjaždžaŭ da hruzavika, što staić nasuprać carkvy ŭ bylli. U pres-centry nia majuć versijaŭ nakont hetych aŭto, tolki adsočvajuć ichnija pieramiaščeńni.
?
Jak paviedamiŭ praŭnik carkvy «Novaje žyćcio» Siarhiej Łukanin, raz-poraz la carkvy źjaŭlajucca nieviadomyja, što zdymajuć carkvu na videa. Kali jaki viernik sprabuje nablizicca da ich, dyk tyja adrazu sychodziać.
Pavodle stanu na viečar, na 17 hadzinaŭ 11 kastryčnika, u paście-haładoŭcy biaruć udzieł 210 čałaviek: 36 čałaviek stała znachodziacca ŭ pamiaškańni carkvy, 134 čałavieki naviedvajucca siudy ŭ paślapracoŭny čas i 40 čałaviek haładajuć u inšych haradoch Biełarusi.
Siońnia pratestujučych naviedali medyki 2-j palikliniki Frunzenskaha rajonu.
?
Mienskija haradzkija ŭłady aktyvizavalisia ŭ spravie prymusovaj pieradačy budynku carkvy «Novaje žyćcio».
Siońnia rankam da budynku carkvy «Novaje žyćcio» nabliziłasia kalona ciažkahruznych aŭtamabilaŭ, adzin ź jakich pryvioz na platformie buldozer. Supravadžali kalonu try mikraaŭtobusy. Šlach na terytoryju carkvy im pieraharadzili vierniki, pavyhaniaŭšy na darohu svaje aŭto. Kiroŭca buldozeru nie patłumačyŭ mety vizytu, skazaŭšy adno, što technika znachodzicca tut na zahad Mienharvykankamu. Vierniki carkvy źviarnulisia z pytańniami da načalnika aŭtakalony. Na što pačuli nievyraznaje: «Ja tut pryjechaŭ svoj učastak troški paraŭniać». Paśla hetaha buldozer źjechaŭ ź platformy i na praciahu paŭhadziny «raŭniaŭ» placoŭku niepadaloku ad aŭtamabilnaha pikietu. Astatnija aŭto nieŭzabavie źjechali, a buldozer źnik u bližejšym zavułku pryvatnaha sektaru.
Siońnia ž u carkvu patelefanavali z ŽREA Maskoŭskaha rajonu. Praŭnika carkvy zaprasili padpisać akt pieradačy budynku carkvy ŭ vałodańnie ŽREA Maskoŭskaha rajonu. Na pytańnie, čamu mienavita ŭ ŽREA, a nia ŭ Fond majomaści, praŭnik «Novaha žyćcia» pačuŭ, što Fond pieradaŭ budynak carkvy na balans Maskoŭskaha rajonu. Pres-słužba carkvy ličyć niezakonnym fakt pieradačy ich budynka da ŽREA Maskoŭskaha rajonu – u pieršuju čarhu pavinien być aformleny akt pieradačy budynku Fondu majomaści. Biaz hetaha apošni nia maje prava arudavać im i pieradavać jaho ŭ čyjości viedańnie.
?
Pašyrajecca hieahrafija haładoŭki.
Da haładoŭki, što ładzicca carkvoj «Novaje žyćcio», dałučylisia dva pastary ź Viciebsku i Voršy. Bližejšym časam jany majuć pryjechać u Miensk, kab być ź viernikami ŭ carkvie. Pavodle stanu na ranicu 11 kastryčnika, post-haładoŭku trymajuć 177 čałaviek. Uvieś čas u carkvie znachodziacca 34 čałavieki, 112 čałaviek prychodziać siudy paśla pracy, 31 čałaviek haładaje ŭ inšych haradoch Biełarusi. Na noč u carkvie zastavalisia 110 viernikaŭ. Učorašni viečarovy medyčny ahlad zaśviedčyŭ zdavalniajučy stan zdaroŭja pratestujučych.
Siońnia ŭranicy haładoŭnikaŭ naviedali pradstaŭniki amerykanskaj ambasady, jakija vykazali padtrymku ŭdzielnikam pratestu i paabiacali na praciahu ŭsioj akcyi pratestu infarmavać Dziarždepartament ZŠA ab raźvićci padziejaŭ.
?
Pavodle stanu na viečar 10 kastryčnika, u poście-haładoŭcy prymaje ŭdzieł 151 čałaviek. Ź ich 32 čałavieki ŭvieś čas znachodziacca ŭ carkvie «Novaje žyćcio», 94 čałavieki trymajuć haładoŭku i znachodziacca ŭ carkvie ŭ niepracoŭny čas. Pa-za Mienskam haładajuć 25 čałaviek z Barysava, Bieraścia, Homielu, Horadni, Dziaržynsku, Mazyra, Lidy, Tałačyna, Stoŭpcaŭ. Dva čałavieki vyjšli z haładoŭki. Heta pažyłaja žančyna, jakaja pakinuła haładać dziela stanu zdaroŭja i školnica z Tałačyna, čyje baćki praciahvajuć post-haładoŭku.
Akramia taho vierniki inšych pratestanckich cerkvaŭ Miensku na znak salidarnaści trymajuć post-haładoŭku niekalki sutak. Takich, jak paviedamlajuć u pres-słužbie carkvy, naličvajecca 100 čałaviek.
?
Noč u carkvie «Novaje žyćcio» prajšła spakojna. Hetym razam načavać zastavałasia 105 čałaviek. Siarod viernikaŭ było kala dziasiatka pastaraŭ, jakija pradstaŭlali supołki Mazyra, Bieraścia, Homiela, Horadni, Barysava, Tałačyna dy inšych biełaruskich haradoŭ. Usiaho ciapier trymajuć post-haładoŭku 132 čałavieki. Ź ich 32 čałavieki haładajuć u carkvie, 73 čałavieki pratestujuć u Miensku pa-za budynkam carkvy i 27 čałaviek pa ŭsioj Biełarusi.
Haładoŭniki majuć dobry nastroj, jany peŭnyja svajoj praŭdy.
9 kastryčnika syšoŭ termin, kali pavodle zakonu budynak pavinien byŭ pierajści da dziaržavy (dziesiać dzion tamu na rachunak carkvy było pieraličana 17 tys. dalaraŭ, jakija ŭłady vyznačyli jak kampensacyju za vializny budynak).
Post-haładoŭka praciahvajecca ŭ budynku carkvy ad 6 kastryčnika. Pastar carkvy «Novaje žyćcio» Viačasłaŭ Hančarenka kaža pra istotnuju padtrymku z boku pratestanckich cerkvaŭ Biełarusi. Taksama, jak jon kaža, čakajucca akcyi salidarnaści za miažoju – pikiety kala biełaruskich pasolstvaŭ. A ŭžo ciapier z-za miažy telefanujuć i pišuć nieabyjakavyja ludzi, vykazvajuć padtrymku haładoŭnikam.
Pastar Hančarenka nia viedaje, čaho čakać ad uładaŭ ad siońniašniaha dnia, ale vykazvaje ŭpeŭnienaść u dziejańniach pratestujučych: «My ŭžo nieadnarazova vykazvalisia na hetuju temu i mahu jašče raz skazać – svaju carkvu my nie addamo». Na pytańnie pra nastroj ludziej, što na dadzieny momant znachodziacca ŭ carkvie, jon kaža, što zaraz idzie abmierkavańnie nakont aptymizacyi ŭmovaŭ haładoŭki. «Ludzi nastrojenyja rašuča i ŭpeŭniena», – kaža V.Hančarenka.
Sustaršynia arhkamitetu Biełaruskaj chryścijanskaj demakratyi Alaksiej Šein taksama dałučyŭsia da haładoŭki. Jon kaža, što akcyja pratestu viernikaŭ carkvy «Novaje žyćcio» nie zastałasia pa-za ŭvahaj pradstaŭnikoŭ inšych cerkvaŭ: «Učora na słužbie byli pradstaŭniki Sajuzu cerkvaŭ viery evanhielskaj, z Baranavičaŭ vierniki piacidziasiatnickich cerkvaŭ «Zbaŭleńnie» i «Novaje žyćcio» (nia błytać ź mienskaj carkvoj)».
Častka ludziej trymaje haładoŭku ŭ samim budynku carkvy (ciapier tam znachodzicca blizka paŭsotni čałaviek), častka – pa-za jaje miežami.
Na dumku sp.Šeina, sytuacyja z budynkam carkvy maje niekalki varyjantaŭ raźviazańnia. Pieršaje, siłavoje vyrašeńnie z pryciahnieńniem da vysialeńnia milicyi. Druhoje, što padajecca bolš vierajemnym, zaciahvańnie vyrašeńnia prablemy. «Na nosie zima, i, mahčyma, ułady spadziajucca, što ludzi stomiacca pratestavać, uvaha da akcyi pratestu apadzie, – miarkuje A.Šein. – Adnak druhi varyjant taksama nienadziejny, kali ŭličyć, nakolki nieadekvatnyja byvajuć učynki ŭładaŭ. Tamu my musim być hatovyja da ŭsiaho».
?
Daviedka
Carkva «Novaje žyćcio» źjaŭlajecca adnoj z cerkvaŭ poŭnaha evanhiella. Kolkaść viernikaŭ u Miensku składaje 750 čałaviek. U Biełarusi carkva maje svaje filii ŭ Baraŭlanach – carkva «Žyvoje słova», Žodzinie – carkva «Novaje pakaleńnie», u Lidzie, Ivanavie, Stoŭpcach, Horadni, Smalavičach i Haradziščy – cerkvy «Novaje žyćcio». Adna filija znachodzicca ŭ Azerbajdžanie (h. Baku). Ahulnaja kolkaść prychadžanaŭ u filijach składaje paŭtysiačy čałaviek.
Aficyjnym dniom narodzinaŭ carkvy ličycca 17 červienia 1992 h., kali adbyłasia pieršaje vodnaje chryščeńnie. U tym ža hodzie carkva była zarehistravanaja ŭ Mienharvykankamie. A pačanałasia ŭsio z nabaženstvaŭ, dziela jakich vykupaoisia ŭsie kvitki ŭ adnym ź mienskich kinateatraŭ. Adno takoje mierapryjemstva kaštavała budučamu pastaru miesiačnaha zarobku, adnak vyklikała vialikuju cikavaść siarod viernikaŭ. Supravadžalisia nabaženstvy adnoj kalonkaj i hitaraj, padoranymi misijaneram z Narvehii.
Carkva «Novaje žyćcio» naležyć da Sajuzu chryścijanaŭ poŭnaha Evanhiella, ci, jak jašče pryniata kazać, heta charyzmatyčnaja carkva. U asobny ruch charyzmaty vyłučylisia na pačatku 90-ch ź piacidziasiatnikaŭ – chryścijanaŭ viery evanhielskaj.
Charyzmataŭ vyłučaje bolš raźniavolenaja i dynamičnaja forma nabaženstvaŭ: pastar začytvaje i kamentuje ŭryŭki Evanhiella, padčas słužby vykonvajucca relihijnyja pieśni i himny ŭ sučasnaj muzyčnaj aranžyroŭcy. Schody viernikaŭ, jak praviła, adbyvajucca ŭ vialikich pamiaškańniach. U piacidziasiatnikaŭ i charyzmataŭ isnuje viera ŭ toje, što atrymaŭšy chryščeńnie Śviatym ducham čałaviek pačynaje havaryć zrazumiełymi tolki Bohu movami. Istotnaje adroźnieńnie charyzmatyčnaj carkvy ad piacidziasiatnickaj heta toje, što pastaram ŭ charyzmataŭ moža stać žančyna.
Baptysty vyznajuć tolki Śviatoje pisańnie, nie vyznajuć kryžoŭ i abrazoŭ. Nie pryniata siarod baptystaŭ chryścić dziaciej.
Jašče adna z raspaŭsiudžanych na Biełarusi denaminacyj – Adventysty siomaha dnia. Vierniki hetaj carkvy śviatoj ličać subotu. Jany aktyŭna apelujuć da Staroha zapavietu. Nie ŭžyvajuć u ježu śvininu, što daje nahodu paraŭnovać ich ź judejami, jakija taksama vyznajuć pieradapošni dzień tydnia.
?
Na hetuju ž temu hladzi:
– Ivan Paškievič: Vučań Łukašenka hodny svajho nastaŭnika Stalina. (Były namieśnik kiraŭnika Administracyi prezydenta, a ciapier daradca staršyni Sajuzu evanhielskich chryścijan-baptystaŭ kamentuje haładoŭku evanhielistaŭ z carkvy «Novaje žyćcio»);
– a taksama błohi Julii Daraškievič i Andreja Lankieviča.
Kamientary