Sioleta mienš nazapasiać kapusty i bulby, a bolš — burakoŭ i morkvy
Urad vyznačyŭ płanavyja abjomy narychtoŭki sadaviny i harodniny ŭ stabilizacyjnyja fondy na mižsiezońnie 2026/2027 hadoŭ. Hetyja fondy vykarystoŭvajucca dziaržavaj dla rehulavańnia cen i zabieśpiačeńnia kramaŭ praduktami ŭ pieryjad, kali ich ułasnyja zapasy ŭžo skončyŭsia abo novy ŭradžaj jašče nie pačaŭ pastupać u dastatkovaj kolkaści.
Zhodna z pastanovaj urada №210, apublikavanaj na Nacyjanalnym pravavym partale, ahulny abjom narychtovak składzie kala 147,16 tysiačy ton. Heta prykładna na 5,6% mienš, čym było zapłanavana na papiaredni mižsiezonny pieryjad, kali ŭ vyniku karekcirovak abjomy dasiahnuli bolš za 157 tysiač ton.
Asobna dla handlovych sietak płanujecca pastavić kala 111,57 tysiač ton pradukcyi. Heta taksama mienš, čym hodam raniej — prykładna na 9 tysiač ton.
Najbolšaje skaračeńnie zakranuła kapustu, a taksama jabłyki i bulbu, jakija tradycyjna źjaŭlajucca bazavymi praduktami ŭ stabfondach.
Struktura narychtovak vyhladaje nastupnym čynam:
- bulba — kala 59,7 tysiačy ton (źnižeńnie ŭ paraŭnańni ź minułym hodam);
- kapusta biełakačannaja — kala 22,3 tysiačy ton (adno z samych istotnych skaračeńniaŭ, bolš za 15%);
- buraki stałovyja — kala 9,7 tysiačy ton (adna ź dźviuch pazicyj, dzie płanujecca rost);
- morkva — kala 15,4 tysiačy ton (taksama nievialiki rost);
- cybula repčataja — kala 15 tysiač ton (krychu mienš, čym raniej);
- jabłyki śviežyja — kala 25 tysiač ton (źnižeńnie na niekalki pracentaŭ).
Urad padkreślivaje, što hetyja ličby nie źjaŭlajucca kančatkovymi. Praktyka papiarednich hadoŭ pakazvaje, što abjomy časta pierahladajucca ŭžo paśla ŭborki ŭradžaju. Kali ŭradžaj akazvajecca bolšym abo mienšym za zapłanavany, to hetyja płanavyja pakazčyki mohuć jak pavialičvacca, tak i pamianšacca.
Ministerstva sielskaj haspadarki ŭžo vyznačyła maksimalnyja adpusknyja ceny na pradukcyju novaha ŭradžaju, jakija buduć dziejničać u mižsiezonny pieryjad 2026/2027 hadoŭ. Pavodle papiarednich danych, hetyja ceny buduć vyšejšyja za ŭzrovień biahučaha siezona, što tłumačycca ahulnym rostam vydatkaŭ na vytvorčaść i zachoŭvańnie.
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty1
Kamientary